LiveTV

Live

UAE

യു.എ.ഇ ഫെഡറല്‍ ദേശീയ കൗണ്‍സിലില്‍ വനിതാ പ്രാതിനിധ്യം അന്‍പത് ശതമാനമായി ഉയര്‍ത്താന്‍ ഉത്തരവ്

യു.എ.ഇ ഫെഡറല്‍ ദേശീയ കൗണ്‍സിലില്‍ വനിതാ പ്രാതിനിധ്യം അന്‍പത് ശതമാനമായി ഉയര്‍ത്താന്‍ ഉത്തരവ്

യു.എ.ഇ ഫെഡറൽ ദേശീയ കൗൺസിലിൽ വനിതാ പ്രാതിനിധ്യം അമ്പതു ശതമാനമായി ഉയർത്താൻ ഉത്തരവ്​. എല്ലാ തുറകളിലും മതിയായ ലിംഗസമത്വം ഉറപ്പു വരുത്താനുള്ള യു.എ.ഇയുടെ പ്രഖ്യാപിത നയത്തി​ന്റെ ഭാഗമായാണ്​ പുതിയ തീരുമാനം.

അടുത്ത പാർലമെൻറ്​ കാലയളവിൽ തന്നെ മൊത്തം അംഗങ്ങളുടെ പകുതി വനിതകളായിരിക്കണം എന്നാണ്​ ഉത്തരവ്​. യു.എ.ഇ പ്രസിഡൻറ്​ ശൈഖ്​ ഖലീഫാ ബിൻ സായിദ്​ ആൽ നഹ്​യാനാണ്​ ഇതു സംബന്​ധിച്ച ഉത്തരവ്​ പുറപ്പെടുവിച്ചത്​. മന്ത്രിസഭയിൽ ഉൾപ്പെടെ വനിതകൾക്ക്​ വേണ്ടത്ര പ്രാതിനിധ്യം യു.എ.ഇ നൽകിയിട്ടുണ്ട്​. ഫെഡറൽ ദേശീയ കൗൺസിലിലും വനിതകളുടെ പങ്കാളിത്തം ഉയരുന്നത്​ ഗുണപരമായ മാറ്റങ്ങൾ കൊണ്ടു വരുമെന്നാണ്​ യു.എ.ഇ നേതൃത്വം വിലയിരുത്തുന്നത്​. ഇപ്പോൾ ഫെഡറൽ ദേശീയ കൗൺസിലിൽ 22.5 ശതമാനം മാത്രമാണ്​ വനിതാ പ്രാതിനിധ്യം. വനിതകൾക്ക്​ നിയമനിർമാണസഭകളിൽ ഏറ്റവും ഉയർന്ന പരിഗണന നൽകുന്ന അറബ്​ രാജ്യമെന്ന പദവി കൂടിയാണ്​ ഇതോടെ യു.എ.ഇ തേടിയെത്തുക.

ആഗോളതലത്തിൽ തന്നെ മികച്ച പ്രതികരണമാണ്​ യു.എ.ഇ തീരുമാനത്തിന്​ ലഭിച്ചു വരുന്നതും. ഫെഡറൽ ദേശീയ കൗൺസിലിൽ വനിതകളുടെ പ്രാതിനിധ്യം അമ്പതു ശതമാനമായി വർധിപ്പിച്ച പ്രസിഡൻറിന്റെ നടപടിയെ യു.എ.ഇ വൈസ്​ പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽമക്​തം പ്രകീർത്തിച്ചു. യു.എ.ഇ വനിതകൾക്ക്​ ലഭിച്ച മികച്ച അംഗീകാരം കൂടിയാണിതെന്ന്​ ട്വിറ്റർ സന്ദേശത്തിൽ ശൈഖ്​ മുഹമ്മദ്​ പറഞ്ഞു. യു.എ.ഇ സായുധ സേനയുടെ ഉപ സർവ സൈന്യാധിപനും അബൂദബി കിരീടാവകാശിയുമായ ശൈഖ്​ മുഹമ്മദ്​ ബിൻ സായിദ്​ ആൽ നഹ്​യാനും യു.എ.ഇ വനിതകൾക്ക്​ ഭാവുകങ്ങൾ നേർന്നു.