LiveTV

Live

National

ഡൽഹി ഇസ്രായേൽ എംബസിക്ക് സമീപത്തെ സ്ഫോടനം: ഇറാൻ പൗരന്മാരെ ചോദ്യം ചെയ്യുന്നു

വിസ കാലാവധി കഴിഞ്ഞവരടക്കമുള്ള ഇറാൻ പൗരന്മാരെയാണ് പൊലീസ് ചോദ്യം ചെയ്യുന്നത്

ഡൽഹി ഇസ്രായേൽ എംബസിക്ക് സമീപത്തെ സ്ഫോടനം: ഇറാൻ പൗരന്മാരെ ചോദ്യം ചെയ്യുന്നു

ഡൽഹിയിലെ ഇസ്രായേൽ എംബസിക്ക് സമീപത്തെ സ്‌ഫോടനവുമായി ബന്ധപ്പെട്ട് ഇറാൻ പൗരന്മാരെ ഡൽഹി സ്‌പെഷ്യൽ സെല്‍ ചോദ്യം ചെയ്യുന്നു. വിസ കാലാവധി കഴിഞ്ഞവരടക്കമുള്ള ഇറാൻ പൗരന്മാരെയാണ് പൊലീസ് ചോദ്യം ചെയ്യുന്നത്. വെള്ളിയാഴ്ച വൈകീട്ടാണ് പൂച്ചെട്ടിയിൽ സ്ഥാപിച്ച ശേഷി കുറഞ്ഞ ബോംബ് പൊട്ടിത്തെറിച്ചത്. സ്‌ഫോടനത്തിൽ മൂന്ന് കാറുകൾക്ക് കേടുപാട് സംഭവിച്ചു.

ഡൽഹി പൊലീസ് സ്‌പെഷ്യൽ സെൽ സംഭവം അന്വേഷിച്ച് വരികയാണ്. സ്‌ഫോടക വസ്തു കൊണ്ട് വെച്ചതെന്ന് സംശയിക്കുന്ന രണ്ട് പേരുടെ സിസിടിവി ദൃശ്യങ്ങളും പൊലീസിന് ലഭിച്ചിട്ടുണ്ട്. ഇവരെ കൊണ്ടുവിട്ട ടാക്‌സി ഡ്രൈവറെ തിരിച്ചറിഞ്ഞതായി പൊലീസ് വ്യക്തമാക്കി. ഇദ്ദേഹത്തിന്റെ സഹായത്തോടെ ഇവരുടെ രേഖാചിത്രം തയ്യാറാക്കി വരികയാണ്.

സ്‌ഫോടന സമയത്ത് സ്ഥലത്ത് ആക്ടീവായിരുന്ന 45000 മൊബൈൽ ഫോൺ വിശദാംശങ്ങളും പൊലീസ് പരിശോധിച്ച് വരികയാണ്. അന്വേഷണത്തെ സഹായിക്കാനായി ഇസ്രയേലിൽ നിന്ന് ഒരു സംഘം ഇന്ന് ഇന്ത്യയിലെത്തിയേക്കുമെന്നും റിപ്പോർട്ടുണ്ട്.

എംബസി ലക്ഷ്യം വെച്ചുള്ള ഭീകരാക്രമണമാണ് ഇന്നലെയുണ്ടായതെന്ന് ഇന്ത്യയിലെ ഇസ്രയേൽ സ്ഥാനപതി റോൺ മൽക്ക പ്രതികരിച്ചു. കുറ്റക്കാരെ കണ്ടെത്തി ശിക്ഷ ഉറപ്പാക്കുമെന്ന് കേന്ദ്ര വിദേശകാര്യ മന്ത്രാലയം വ്യക്തമാക്കി. സ്‌ഫോടനം നടന്ന പശ്ചാത്തലത്തിൽ കേന്ദ്ര ആഭ്യന്തര മന്ത്രി അമിത്ഷാ രണ്ട് ദിവസത്തെ പശ്ചിമ ബംഗാൾ സന്ദർശനം റദ്ദാക്കിയിട്ടുണ്ട്