LiveTV

Live

National

ഇന്ത്യയില്‍ രണ്ട് കോവിഡ് വാക്സിനുകള്‍ക്ക് അനുമതി

കോവിഷീൽഡ്, കോവാക്‌സിൻ എന്നിവക്കാണ് അനുമതി ലഭിച്ചത്. കോവാക്‌സിൻ മൂന്നാം ഘട്ട പരീക്ഷണത്തിലാണെങ്കിലും സുരക്ഷിതമാണെന്ന് ഡ്രഗ് കൺട്രോളർ ജനറൽ വി.ജി സോമാനി.

ഇന്ത്യയില്‍ രണ്ട് കോവിഡ് വാക്സിനുകള്‍ക്ക് അനുമതി

രാജ്യത്ത് കോവിഡ് വാക്‌സിനുകൾക്ക് അടിയന്തര ഉപയോഗത്തിന് ഡ്രഗ് കൺട്രോളർ ജനറൽ അനുമതി നല്‍കി. കോവിഷീൽഡ്, കോവാക്‌സിൻ എന്നിവക്കാണ് അനുമതി ലഭിച്ചത്. കോവാക്‌സിൻ മൂന്നാം ഘട്ട പരീക്ഷണത്തിലാണെങ്കിലും സുരക്ഷിതമാണെന്ന് ഡ്രഗ് കൺട്രോളർ ജനറൽ വി.ജി സോമാനി പറഞ്ഞു.

ആദ്യ ഘട്ടത്തില്‍ 3 കോടി ആളുകള്‍ക്കാണ് വാക്സിന്‍ നല്‍കുക. ഓക്സ്ഫോര്‍ഡ് യൂണിവേഴ്സിറ്റിയാണ് കോവിഷീല്‍ഡ് വികസിപ്പിച്ചത്. ഇന്ത്യയില്‍ പുനെയിലെ സിറം ഇന്‍സ്റ്റിറ്റ്യൂട്ടാണ് ഉത്പാദകര്‍. തദ്ദേശീയമായി വികസിപ്പിച്ച വാക്സിനാണ് കോവാക്സിന്‍. ഇത് നിയന്ത്രിതമായി ഉപയോ​ഗിക്കാനുള്ള അനുമതിയാണ് നല്‍കിയത്. ഐസിഎംആറിന്‍റ സഹായത്തോടെ ഭാരത് ബയോടെക് ആണ് കോവാക്സിന്‍ വികസിപ്പിച്ചത്. സൈഡസ് കാഡിലയുടെ മൂന്നാംഘട്ട പരീക്ഷണത്തിനും അനുമതിയുണ്ട്.

ആരോഗ്യ പ്രവർത്തകർക്കും മറ്റ് ആളുകളിൽ ഗുരുതര സാഹചര്യം പരിഗണിച്ചും അടിയന്തിര ഉപയോഗം നടത്താം. രോഗ പ്രതിരോധത്തിന് വാക്‌സിനുകളുടെ രണ്ട് ഡോസുകളാണ് സ്വീകരിക്കേണ്ടത്.

ക്ലിനിക്കൽ പരീക്ഷണം പൂർത്തിയാകാതെ എങ്ങനെ കോവാക്‌സിന് അനുമതി നൽകും എന്നതടക്കമുള്ള മാധ്യമ പ്രവർത്തകരുടെ ചോദ്യങ്ങളോട് വി ജി സോമാനി പ്രതികരിച്ചില്ല. വാക്‌സിനുകൾ 110 ശതമാനം സുരക്ഷിതമാണെന്ന് അദ്ദേഹം പറഞ്ഞു. കോവി ഷീൽഡ് 70.42 ശതമാനം ഫലപ്രദമാണ്. 5 കോടി ഡോസുകൾ നിർമിച്ചു കഴിഞ്ഞുവെന്ന് കോവിഷീൽഡ് ഉത്പാദകർ വ്യക്തമാക്കി.

വാക്സിന് പിന്നില്‍ പ്രവര്‍ത്തിച്ചവരെ പ്രധാനമന്ത്രി നരേന്ദ്ര മോദി അഭിനന്ദിച്ചു. വാക്സിൻ രാജ്യത്തെ വേഗത്തിൽ കോവിഡ് മുക്തമാക്കുമെന്നും പ്രധാനമന്ത്രി വ്യക്തമാക്കി. അതേസമയം കോവാക്സിന് അനുമതി നൽകിയതിനെ ശശി തരൂർ എംപി വിമർശിച്ചു. മൂന്നാം ഘട്ട ക്ലിനിക്കൽ പരീക്ഷണം തുടരുന്നതിനിടെ കോവാക്സിന് അനുമതി നൽകിയത് അപകടകരമാണെന്നാണ് തരൂരിന്റെ പ്രതികരണം.