LiveTV

Live

National

പ്രിയങ്കയുടെ വസ്ത്രത്തില്‍ കൈവെക്കാന്‍ എങ്ങനെ ധൈര്യം വന്നു? യു.പി പൊലീസിനെതിരെ ബിജെപി നേതാവ്

ഒരു വനിതാ നേതാവിന്‍റെ വസ്ത്രത്തില്‍ കൈവെയ്ക്കാന്‍ യു.പി പുരുഷ പൊലീസിന് എങ്ങനെ ധൈര്യം വന്നുവെന്നാണ് ചിത്രയുടെ ചോദ്യം

പ്രിയങ്കയുടെ വസ്ത്രത്തില്‍ കൈവെക്കാന്‍ എങ്ങനെ ധൈര്യം വന്നു?  യു.പി പൊലീസിനെതിരെ ബിജെപി നേതാവ്

കോണ്‍ഗ്രസ് നേതാവ് പ്രിയങ്ക ഗാന്ധിയെ ഉത്തര്‍പ്രദേശിലെ പുരുഷ പൊലീസ് കയ്യേറ്റം ചെയ്ത സംഭവത്തില്‍ രൂക്ഷവിമര്‍ശനവുമായി ബിജെപി നേതാവ് ചിത്ര വാഘ്. ഒരു വനിതാ നേതാവിന്‍റെ വസ്ത്രത്തില്‍ കൈവെയ്ക്കാന്‍ യു.പി പൊലീസിന് എങ്ങനെ ധൈര്യം വന്നുവെന്നാണ് ചിത്രയുടെ ചോദ്യം. മഹാരാഷ്ട്രയിലെ ബിജെപി വൈസ് പ്രസിഡന്‍റാണ് ചിത്ര.

ഹാഥ്റസിലേക്കുള്ള യാത്രക്കിടെയാണ് യു.പി പൊലീസ് പ്രിയങ്കയെ തടയുകയും കയ്യേറ്റം ചെയ്യുകയും ചെയ്തത്. പ്രിയങ്കയുടെ കുര്‍ത്തയില്‍ പിടിച്ച പൊലീസുകാരന്‍റെ ദൃശ്യം പുറത്തുവന്നതോടെ വ്യാപക പ്രതിഷേധം ഉയര്‍ന്നിരുന്നു. ഈ പൊലീസുകാര്‍ക്കെതിരെ കര്‍ശന നടപടിയെടുക്കണമെന്ന് ചിത്ര ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥിനോട് ആവശ്യപ്പെട്ടു.

പൊലീസുകാര്‍ അവരുടെ പരിധി മനസ്സിലാക്കി വേണം പ്രവര്‍ത്തിക്കാന്‍. ഒരു വനിതാ നേതാവിനോട് ഇങ്ങനെ ചെയ്യാന്‍ എങ്ങനെ ധൈര്യം വന്നു? ഇന്ത്യന്‍ സംസ്കാരത്തില്‍ വിശ്വസിക്കുന്ന യോഗി ആദിത്യനാഥ് ഇത്തരം പൊലീസുകാര്‍ക്കെതിരെ കര്‍ശന നടപടിയെടുക്കണമെന്നാണ് ചിത്ര ട്വീറ്റില്‍ ആവശ്യപ്പെട്ടത്. പൊലീസ് പ്രിയങ്കയെ കയ്യേറ്റംചെയ്യുന്ന ചിത്രം സഹിതമാണ് ട്വീറ്റ്.

കഴിഞ്ഞ വര്‍ഷം എന്‍സിപി വിട്ട് ബിജെപിയിലെത്തിയ നേതാവാണ് ചിത്ര വാഘ്. ചിത്രയുടെ നിലപാടിനെ മഹാരാഷ്ട്ര യൂത്ത് കോണ്‍ഗ്രസ് സ്വാഗതം ചെയ്തു. പാര്‍ട്ടി മാറിയെങ്കിലും ചിത്ര മൂല്യങ്ങള്‍ മറന്നില്ലെന്ന് മഹാരാഷ്ട്ര യൂത്ത് കോണ്‍ഗ്രസ് നേതാവ് സത്യജിത്ത് താമ്പെ പ്രതികരിച്ചു.

പ്രിയങ്കയെ കയ്യേറ്റം ചെയ്ത സംഭവത്തില്‍ വ്യാപക പ്രതിഷേധം ഉയര്‍ന്നതോടെ ഗൌതം ബുദ്ധ നഗര്‍ പൊലീസ് ഇന്നലെ ഖേദം പ്രകടിപ്പിച്ചിരുന്നു. സംഭവത്തില്‍ അന്വേഷണവും പ്രഖ്യാപിച്ചിട്ടുണ്ട്.