LiveTV

Live

National

പെണ്‍കുട്ടികളെ സംസ്കാരം പഠിപ്പിച്ചാല്‍ പീഡനം അവസാനിപ്പിക്കാം: വിവാദ പരാമര്‍ശവുമായി ബിജെപി എംഎല്‍എ

പെണ്‍കുട്ടികള്‍ ബലാത്സംഗം ചെയ്യപ്പെടുന്നത് പെണ്‍കുട്ടികളുടെ കുഴപ്പം കൊണ്ടാണെന്ന് പരോക്ഷമായി പറയുകയാണ് എംഎല്‍എ.

പെണ്‍കുട്ടികളെ സംസ്കാരം പഠിപ്പിച്ചാല്‍ പീഡനം അവസാനിപ്പിക്കാം: വിവാദ പരാമര്‍ശവുമായി ബിജെപി എംഎല്‍എ

ഹാഥ്റസിലെ ദലിത് പെണ്‍കുട്ടി അതിക്രൂരമായി പീഡിപ്പിക്കപ്പെട്ട് കൊല്ലപ്പെട്ടതിന് പിന്നാലെ വിവാദ പരാമര്‍ശവുമായി ബിജെപി എംഎല്‍എ സുരേന്ദ്ര സിങ്. മാതാപിതാക്കള്‍ പെണ്‍മക്കളില്‍ നല്ല മൂല്യങ്ങള്‍ വളര്‍ത്തിയെടുക്കുകയാണെങ്കില്‍ ഹാഥ്‌റസ് സംഭവങ്ങള്‍ ഇല്ലാതാകുമെന്നാണ് എംഎല്‍എ പറഞ്ഞത്.

"എല്ലാ മാതാപിതാക്കളും പെണ്‍മക്കളെ മൂല്യങ്ങള്‍ പകര്‍ന്നുനല്‍കി സംസ്കാരമുള്ളവരായി വളര്‍ത്തണം. ഞാന്‍ എംഎല്‍എ മാത്രമല്ല, അധ്യാപകനുമാണ്. സംസ്കാരം കൊണ്ടു മാത്രമേ പീഡനങ്ങള്‍ അവസാനിപ്പിക്കാനാവൂ. നല്ല ഭരണം കൊണ്ടോ ആയുധം കൊണ്ടോ സാധ്യമല്ലത്. സര്‍ക്കാരിന് കടമയുണ്ട്. അതോടൊപ്പം കുടുംബവും ഉത്തരവാദിത്വം നിര്‍വഹിക്കണം. സുരക്ഷ ഉറപ്പാക്കാന്‍ സര്‍ക്കാരിന് ഉത്തരവാദിത്വമുള്ളതുപോലെ തന്നെ പെണ്‍മക്കളില്‍ മൂല്യങ്ങള്‍ വളര്‍ത്താന്‍ കുടുംബവും ശ്രദ്ധിക്കണം. നല്ല ഭരണവും സംസ്കാരവും രാജ്യത്തെ സുന്ദരമാക്കും. അല്ലാതെ വേറെ വഴിയില്ല".

യുപിയിലെ ഭല്ലിയയില്‍ നിന്നുള്ള എംഎല്‍എയാണ് സുരേന്ദ്ര സിങ്. പെണ്‍കുട്ടികള്‍ ബലാത്സംഗം ചെയ്യപ്പെടുന്നതിന് കാരണം അവരുടെ സ്വഭാവ ദൂഷ്യമാണെന്ന് പരോക്ഷമായി പറയുകയാണ് എംഎല്‍എ. നട്ടെല്ല് തകര്‍ന്ന് നാവ് അറുക്കപ്പെട്ട് പെണ്‍കുട്ടി കൊല്ലപ്പെട്ട സംഭവത്തിലാണ് ബിജെപി എംഎല്‍എയുടെ ഈ പരാമര്‍ശം. രാമരാജ്യം എന്ന് അവകാശപ്പെടുന്നിടത്ത് എന്തുകൊണ്ടാണ് ബലാത്സംഗ കേസുകള്‍ വര്‍ധിക്കുന്നത് എന്ന ചോദ്യത്തോടാണ് എംഎല്‍എയുടെ ക്രൂരമായ ഈ പ്രതികരണം.

സുരേന്ദ്ര സിങ് ഇതിന് മുന്‍പും വിവാദ പരാമര്‍ശങ്ങള്‍ നടത്തിയിട്ടുണ്ട്. ഗാന്ധിജിയെ വധിച്ച ഗോഡ്സെ തീവ്രവാദിയല്ലെന്നും അദ്ദേഹത്തിന് ഒരു തെറ്റ് പറ്റിയതാണെന്നുമായിരുന്നു സുരേന്ദ്ര സിങിന്‍റെ ന്യായീകരണം. ഇന്ത്യാവിഭജന സമയത്ത് തന്നെ രാജ്യത്തെ ഹിന്ദുരാഷ്ട്രമായി പ്രഖ്യാപിക്കണമായിരുന്നുവെന്നും സുരേന്ദ്ര സിങ് പറയുകയുണ്ടായി. സ്ത്രീസുരക്ഷയും ക്രമസമാധാനവും ഉറപ്പാക്കാനോ കൊല്ലപ്പെട്ട പെണ്‍കുട്ടിയുടെ കുടുംബത്തിന് നീതി ഉറപ്പാക്കാനോ യോഗി സര്‍ക്കാര്‍ തയ്യാറാകാത്തതിനെതിരെ രാജ്യവ്യാപകമായി പ്രതിഷേധം ഉയരുന്നതിനിടെയാണ് പെണ്‍കുട്ടികളെയും മാതാപിതാക്കളെയും കുറ്റപ്പെടുത്തി എംഎല്‍എ രംഗത്തുവന്നത്.