LiveTV

Live

National

45 ജാമിഅ മില്ലിയ വിദ്യാർത്ഥികളെ പൊലീസ് ലൈംഗികമായി ഉപദ്രവിച്ചെന്ന് റിപ്പോർട്ട്

ഫെബ്രുവരി 10ന് നടന്ന സമരത്തില്‍ 30 വിദ്യാർത്ഥികളും 15 വിദ്യാർത്ഥിനികളും ലൈംഗികമായി ഉപദ്രവിക്കപ്പെട്ടു എന്ന് റിപ്പോർട്ടിൽ സൂചിപ്പിക്കുന്നു.

45 ജാമിഅ മില്ലിയ വിദ്യാർത്ഥികളെ പൊലീസ് ലൈംഗികമായി ഉപദ്രവിച്ചെന്ന് റിപ്പോർട്ട്

പൗരത്വ നിയമഭേദഗതിക്കെതിരായ സമരത്തിൽ പങ്കെടുത്ത 45 ജാമിഅ മില്ലിയ വിദ്യാർത്ഥികളെ പൊലീസ് ലൈംഗികമായി ഉപദ്രവിച്ചുവെന്ന് റിപ്പോർട്ട്. നാഷണൽ ഫെഡറേഷൻ ഓഫ് ഇന്ത്യൻ വുമൺ എന്ന സംഘടനയുടെ (എന്‍.എഫ്.ഐ,ഡബ്യൂ) ഫാക്ട് ഫൈന്‍ഡിങ് റിപ്പോര്‍ട്ടിലാണ് ഇക്കാര്യങ്ങളുള്ളത്. ഫെബ്രുവരി 10ന് നടന്ന സമരത്തില്‍ 30 വിദ്യാർത്ഥികളും 15 വിദ്യാർത്ഥിനികളും ലൈംഗികമായി ഉപദ്രവിക്കപ്പെട്ടു എന്ന് റിപ്പോർട്ടിൽ സൂചിപ്പിക്കുന്നു.

സ്ത്രീകളെ പുരുഷ പൊലീസുകാര്‍ ലൈംഗികമായി ഉപദ്രവിച്ചു. അവരുടെ വസ്ത്രങ്ങള്‍ കീറിയെറിയാന്‍ ശ്രമിച്ചു. മാറില്‍ ഇടിക്കുകയും ബൂട്ട് കൊണ്ട് ചവിട്ടുകയും ചെയ്തു. വിദ്യാര്‍ഥികളുടെ ലൈംഗികാവയവത്തില്‍ ലാത്തി കുത്തിക്കയറ്റി. ക്രൂരമായ ഉപദ്രവത്തെ തുടര്‍ന്ന് ഇവര്‍ക്ക് ലൈംഗികാവയത്തില്‍ പരുക്കേല്‍ക്കുകയും ചെയ്തു എന്നും റിപ്പോര്‍ട്ടില്‍ പറയുന്നു. 16 മുതല്‍ 60 വയസ്സു വരെയുള്ള സ്ത്രീകള്‍ ലൈംഗികമായി ഉപദ്രവിക്കപ്പെട്ടിരുന്നു. സിസേറിയന്‍ കഴിഞ്ഞ ഒരു യുവതി തന്നെ അടിക്കരുതെന്ന് കരഞ്ഞുപറഞ്ഞിട്ടും പൊലീസുകാരന്‍ നിര്‍ത്തിയില്ല. പുരുഷന്‍മാര്‍ക്ക് നേരേയും പൊലീസ് ലൈംഗികാതിക്രമം നടത്തിയിട്ടുണ്ട്. പുരുഷന്മാരുടെ ലൈംഗികാവയവത്തെ അവര്‍ മര്‍ദ്ദിച്ചു എന്നും റിപ്പോര്‍ട്ടില്‍ പറയുന്നു

പൊലീസ് യൂണിഫോമണിഞ്ഞ ചിലര്‍ തങ്ങളെ ക്രൂരമായി മര്‍ദ്ദിച്ചുവെന്ന് അധ്യാപകരും വിദ്യാര്‍ഥികളും പറയുന്നു. പൊലീസ് ഹെല്‍മെറ്റോ യൂണിഫോമോ ഇല്ലാത്തവരും ഇത്തരം മര്‍ദ്ദനത്തിന് നേതൃത്വം നല്‍കിയതായും വിദ്യാര്‍ഥികള്‍ വ്യക്തമാക്കി. അതിക്രമത്തിന് ഒരാഴ്ചയ്ക്ക് ശേഷം പലര്‍ക്കും ലൈംഗികാവയങ്ങളില്‍ നിന്ന് രക്തസ്രാവം ഉണ്ടായിരുന്നു. പല വിദ്യാര്‍ഥികള്‍ക്കും ശ്വാസംമുട്ടലും ഛര്‍ദ്ദിയും റിപ്പോര്‍ട്ട് ചെയ്തിരുന്നു.

പൊലീസ് ഉദ്യോഗസ്ഥരുടെ ഈ ക്രൂരകൃത്യം അന്വേഷിക്കാന്‍ പ്രത്യേക ജുഡീഷ്യൽ അന്വേഷണം പ്രഖ്യാപിക്കണമെന്നും ഇരയായവർക്ക് നഷ്ടപരിഹാരം നൽകണമെന്നും റിപ്പോര്‍ട്ട് പുറത്തുവിട്ട് എന്‍.എഫ്.ഐ,ഡബ്യൂ പ്രസിഡന്റ് അരുണ റോയ് വ്യക്തമാക്കുന്നു.