LiveTV

Live

National

കോവിഡ് ബാധിച്ച് 3 പൊലീസുകാര്‍ മരിച്ചു; മുംബൈയില്‍ 55 വയസിന് മുകളിലുള്ള പൊലീസുകാരോട് അവധിയില്‍ പോകാന്‍ നിര്‍ദ്ദേശം

ഏതെങ്കിലും രോഗത്തിന് ചികിത്സ തേടുന്നവരോടും ജോലിയില്‍ നിന്ന് അവധിയെടുക്കാന്‍ അധികൃതര്‍ നിര്‍ദ്ദേശം നല്‍കി

കോവിഡ് ബാധിച്ച് 3 പൊലീസുകാര്‍ മരിച്ചു; മുംബൈയില്‍ 55 വയസിന് മുകളിലുള്ള പൊലീസുകാരോട് അവധിയില്‍ പോകാന്‍ നിര്‍ദ്ദേശം

മുംബൈയില്‍ 55 വയസിന് മുകളിലുള്ള പൊലീസ് കോണ്‍സ്റ്റബിള്‍മാരോട് അവധിയില്‍ പോകാന്‍ നിര്‍ദേശം. കൊവിഡ് ബാധിച്ച് മൂന്ന് പൊലീസുകാര്‍ മരിച്ച സാഹചര്യത്തിലാണ് തീരുമാനം. ഏതെങ്കിലും രോഗത്തിന് ചികിത്സ തേടുന്നവരോടും ജോലിയില്‍ നിന്ന് അവധിയെടുക്കാന്‍ അധികൃതര്‍ നിര്‍ദ്ദേശം നല്‍കി. മുംബൈയില്‍ ഇതുവരെ മൂന്ന് പൊലീസുകാരാണ് കൊവിഡ് ബാധിച്ച് മരിച്ചത്. മൂവരും 50 വയസിന് മുകളില്‍ പ്രായമുള്ളവരായിരുന്നു.

ഇത് സംബന്ധിച്ച് മുംബൈ പൊലീസ് കമ്മീഷണര്‍ പരം വീര്‍ സിംഗ് നഗരത്തിലെ 94 പൊലീസ് സ്റ്റേഷനുകളിലേക്ക് സന്ദേശം അയച്ചിട്ടുണ്ട്. ഹെഡ് കോണ്‍സ്റ്റബിള്‍ ശിവാജി നാരായണ്‍ സോനാവാനെ ആണ് കഴിഞ്ഞ ദിവസം കോവിഡ് ബാധിച്ച് മരിച്ചത്. . കൊവിഡ് ബാധിച്ച് ചികില്‍സയിലായിരുന്ന ഇദ്ദേഹത്തെ മുംബൈയിലെ കെ.ഇ.എം ആശുപത്രിയിലാണ് പ്രവേശിപ്പിച്ചിരുന്നത്.

കുര്‍ള ഡിവിഷനിലെ ട്രാഫിക് പൊലീസിലെ ഹെഡ് കോണ്‍സ്റ്റബിളായിട്ടാണ് ശിവാജി സേവനം അനുഷ്ടിച്ചിരുന്നത്. മുംബൈ നഗരത്തിലെ പ്രധാന കൊവിഡ് ഹോട്ട്‌സ്‌പോട്ടുകളിലൊന്നായ എല്‍-വാര്‍ഡില്‍ (കുര്‍ല ഡിവിഷന്‍) ശിവാജി നാരായണനെ ഡ്യൂട്ടിയില്‍ നിയോഗിച്ചിരുന്നു.

മുംബൈ പൊലീസിലെ രണ്ട് ഹെഡ് കോണ്‍സ്റ്റബിള്‍മാരാണ് കഴിഞ്ഞ രണ്ടു ദിവസത്തിനിടെ കൊവിഡ് ബാധിച്ച് മരിച്ചത്. വകോല പൊലീസ് സ്റ്റേഷനിലെ കോണ്‍സ്റ്റബിള്‍ ചന്ദ്രകാന്ത് പെന്‍ഡുര്‍ക്കര്‍, ഹെഡ് കോണ്‍സ്റ്റബിള്‍ സന്ദീപ് സര്‍വ് എന്നിവരാണ് രണ്ട് ദിവസങ്ങളിലായി കോവിഡ് ബാധയേറ്റ് മരിച്ചത്.

ഇതോടൊപ്പം ധാരാവിയില്‍ ജോലി ചെയ്ത ആറ് പൊലീസുകാര്‍ക്കും രോഗം സ്ഥിരീകരിച്ചിരുന്നു.ഇതിന് പുറമെ ധാരാവിയില്‍ കൊവിഡ് പരിശോധന നടത്തിയ മൂന്ന് ഡോക്ടര്‍മാര്‍ക്കും രോഗം സ്ഥിരീകരിച്ചിരുന്നു. മഹാരാഷ്ട്രയില്‍ ഇതുവരെ 20 ഉദ്യോഗസ്ഥരടക്കം 107 പൊലീസുകാര്‍ക്കാണ് കോവിഡ് 19 സ്ഥിരീകരിച്ചത്. ഇതില്‍ ഭൂരിഭാഗവും മുംബൈ പൊലീസില്‍ നിന്നുള്ളവരാണ്.

അതിനിടെ മഹാരാഷ്ട്രയില്‍ ഗര്‍ഭിണികള്‍ക്ക് കൊവിഡ് പരിശോധന നടത്താനായി മൊബൈല്‍ ഡിസ്‌പെന്‍സറികള്‍ ആരംഭിച്ചു. നാഗ്പൂര്‍ മുനിസിപ്പല്‍ കോര്‍പ്പറേഷനില്‍ ആണ് പദ്ധതി തുടങ്ങിയത്. കൊവിഡ് ബാധിത പ്രദേശങ്ങളിലെ ഗര്‍ഭിണികള്‍ക്ക് രോഗമില്ലെന്ന് ഉറപ്പാക്കുകയാണ് ലക്ഷ്യം. മുംബൈയില്‍ മുന്‍സിപ്പല്‍ സ്‌കൂളുകള്‍ ക്വാറന്റൈന്‍ കേന്ദ്രങ്ങള്‍ ആക്കാനുള്ള നീക്കങ്ങളും പുരോഗമിക്കുന്നുണ്ട്.