LiveTV

Live

National

പൗരത്വ ഭേദഗതി ബില്‍ ന്യൂനപക്ഷങ്ങള്‍ക്ക് എതിരല്ലെന്ന് അമിത് ഷാ; രാജ്യത്തെ രണ്ടായി വിഭജിക്കുന്നതെന്ന് പ്രതിപക്ഷ പാര്‍ട്ടികള്‍

പാകിസ്താന്‍, ബംഗ്ലാദേശ്, അഫ്ഗാനിസ്ഥാന്‍ എന്നീ രാജ്യങ്ങളില്‍ നിന്നുള്ള മുസ്‍ലിംങ്ങള്‍ ഒഴികെയുള്ള അഭയാര്‍ത്ഥികള്‍ക്ക് പൗരത്വത്തിന് വ്യവസ്ഥ ചെയ്യുന്നതാണ് ബില്‍

പൗരത്വ ഭേദഗതി ബില്‍ ന്യൂനപക്ഷങ്ങള്‍ക്ക് എതിരല്ലെന്ന് അമിത് ഷാ; രാജ്യത്തെ രണ്ടായി വിഭജിക്കുന്നതെന്ന് പ്രതിപക്ഷ പാര്‍ട്ടികള്‍

പൗരത്വ ഭേദഗതി ബില്‍ ന്യൂനപക്ഷങ്ങള്‍ക്ക് എതിരല്ലെന്ന് ആഭ്യന്തര മന്ത്രി അമിത് ഷാ. ബില്ലില്‍ അമിത്ഷാ അവതരാണാനുമതി തേടി സംസാരിക്കുന്നതിനിടെ ശക്തമായ പ്രതിഷേധമാണ് പ്രതിപക്ഷ നിരയില്‍ നിന്നും ഉയര്‍ന്നത്. ബില്ലുമായി ബന്ധപ്പെട്ട എല്ലാ ചോദ്യങ്ങള്‍ക്കും മറുപടി നല്‍കാന്‍ തയ്യാറാണെന്ന് അമിത് ഷാ പറഞ്ഞു. ബില്ലിനെതിരെ ശക്തമായ പ്രതിഷേധമാണ് സഭയില്‍ നടക്കുന്നത്. ന്യൂനപക്ഷങ്ങളെ വേട്ടായാടാനുള്ള ഉദ്ദേശം മാത്രമാണ് ബില്ലിനുള്ളതെന്ന് കോണ്‍ഗ്രസ് വ്യക്തമാക്കി. ബില്ലിനെ സഭയില്‍ പല്ലും നഖവും ഉപയോഗിച്ച് എതിര്‍ക്കുമെന്ന് കോണ്‍ഗ്രസ് വ്യക്തമാക്കി.

പാകിസ്താന്‍, ബംഗ്ലാദേശ്, അഫ്ഗാനിസ്ഥാന്‍ എന്നീ രാജ്യങ്ങളില്‍ നിന്നുള്ള മുസ്‍ലിംകള്‍ ഒഴികയുള്ള അഭയാര്‍ത്ഥികള്‍ക്ക് പൗരത്വത്തിന് വ്യവസ്ഥ ചെയ്യുന്നതാണ് ബില്‍. വിഷയം രാജ്യത്തെ കിഴക്കന്‍ സംസ്ഥാനങ്ങളില്‍ അടക്കം വലിയ പ്രതിഷേധങ്ങള്‍ക്ക് വഴിവെച്ചതിന് പിന്നാലെയാണ് സഭയില്‍ ബില്‍ എത്തുന്നത്. 9 ആം തിയതി മുതല്‍ 12 വരെ പാര്‍ലമെന്റില്‍ ഉണ്ടായിരിക്കണമെന്ന് ബി.ജെ.പി എം.പിമാര്‍ക്ക് പാര്‍ട്ടി വിപ്പ് നല്‍കിയിട്ടുണ്ട്.

ലോക്സഭയില്‍ പാസായാല്‍ 11ന് തന്നെ രാജ്യസഭയിലും ബില്‍ എത്തും. ബില്‍ സഭയില്‍ പാസായില്‍ സുപ്രീം കോടതിയെ ഇക്കാര്യത്തില്‍ സമീപിക്കാനാകും പ്രതിപക്ഷം ശ്രമിക്കുക. രണ്ട് പ്രധാന ഭേദഗതികള്‍ വേണമെന്നും വോട്ടെടുപ്പ് വേണമമെന്നും സി.പി.എം അടക്കമുള്ള ഇടത് പാര്‍ട്ടികള്‍ ആവശ്യപ്പെടും. കോണ്‍ഗ്രസിന് പുറമെ ഇടത് പാര്‍ട്ടികള്‍ , ആര്‍.ജെ.ഡി , ഡി.എം.കെ, മുസ്ലീംലീഗ്, എസ്.പി , ബി.എസ്.പി, ആം ആദ്മി പാര്‍ട്ടി എന്നിവര്‍ ബില്ലിനെ എതിര്‍ത്ത് വോട്ട് ചെയ്യും. ശിവസേനയും തൃണമൂല്‍ കോണ്‍ഗ്രസും സഭയില്‍ എന്ത് നിലപാട് സ്വീകരിക്കുമെന്നതാണ് കണ്ടറിയേണ്ടത്. എന്‍.ഡി.എ ഘടകക്ഷികള്‍ അല്ലെങ്കിലും ബി.ജെ.ഡി, ടി.ആര്‍.എസ്, വൈ.എസ്‍.ആര്‍ എസ്.പി എന്നീ പാര്‍ട്ടികളും ബില്ലിനെ സഭയില്‍ അനുകൂലിച്ചേക്കും.

അതെ സമയം പൗരത്വ ഭേദഗതി ബില്ലിനെതിരെ അസമില്‍ വ്യാപക പ്രതിഷേധമാണ് ഉയരുന്നത്. വിവിധ സംഘടനകളുടെ നേതൃത്വത്തില്‍ സംസ്ഥാനത്ത് രണ്ട് ദിവസത്തെ ബന്ദും പ്രഖ്യാപിച്ചിട്ടുണ്ട്. അസമിലെ വിദ്യാര്‍ഥി സംഘടനകളും സമരത്തിന് സജീവ പിന്തുണ അറിയിച്ചിട്ടുണ്ട്.