LiveTV

Live

National

ജവഹര്‍ലാല്‍ നെഹ്റു ഏറ്റവും വലിയ ലൈംഗിക പീഡകനെന്ന് സാധ്വി പ്രാചി

ഇന്ത്യയെ ലോകത്തിന്റെ ബലാത്സംഗ തലസ്ഥാനമെന്ന് വിളിച്ചതിന് രാഹുൽ ഗാന്ധി ലജ്ജിക്കണം. ഏറ്റവും വലിയ ലൈംഗിക പീഡകന്‍ നെഹ്‌റു ആയിരുന്നു. 

ജവഹര്‍ലാല്‍ നെഹ്റു ഏറ്റവും വലിയ ലൈംഗിക പീഡകനെന്ന് സാധ്വി പ്രാചി

ഇന്ത്യയുടെ പ്രഥമ പ്രധാനമന്ത്രി ജവഹര്‍ലാല്‍ നെഹ്റുവിനെ കടുത്ത ഭാഷയില്‍ അധിക്ഷേപിച്ച് വിശ്വഹിന്ദു പരിഷത്ത് നേതാവ് സാധ്വി പ്രാചി. ഏറ്റവും വലിയ ലൈംഗിക പീഡകന്‍ നെഹ്റു ആണെന്നാണ് പ്രാചിയുടെ വിവാദ പരാമര്‍ശം. ലോകത്തിന്റെ ബലാത്സംഗ തലസ്ഥാനമായി ഇന്ത്യ മാറിയെന്ന രാഹുല്‍ ഗാന്ധിയുടെ പ്രസ്താവനയോട് പ്രതികരിക്കുകയായിരുന്നു പ്രാചി. ഇന്ത്യയിലെ എല്ലാ പ്രശ്‌നങ്ങൾക്കും നെഹ്‌റു-ഗാന്ധി കുടുംബമാണ് കാരണക്കാരെന്നും പ്രാചി പറഞ്ഞു.

ഇന്ത്യയെ ലോകത്തിന്റെ ബലാത്സംഗ തലസ്ഥാനമെന്ന് വിളിച്ചതിന് രാഹുൽ ഗാന്ധി ലജ്ജിക്കണം. ഏറ്റവും വലിയ ലൈംഗിക പീഡകന്‍ നെഹ്‌റു ആയിരുന്നു. നെഹ്‌റു കുടുംബത്തെക്കുറിച്ച് അന്വേഷിക്കണം. ഞാൻ കൂടുതലൊന്നും പറയുന്നില്ല, പക്ഷേ രാഹുൽ ഗാന്ധി ഉടൻ തന്നെ രാജ്യത്തോട് മാപ്പ് പറയണം. ഭീകരത, നക്സലിസം, ബലാത്സംഗം എന്നിങ്ങനെ ഇന്ന് നാം കാണുന്ന ഏത് പ്രശ്‌നങ്ങള്‍ക്കും കാരണക്കാര്‍ നെഹ്‌റു കുടുംബമാണ്. ഈ കുടുംബങ്ങളുടെ പാപഭാരമാണ് രാജ്യത്തെ പൗരന്മാർ ചുമക്കുന്നതെന്നും,” വി.എച്ച്.പി നേതാവ് പറഞ്ഞു. ഉന്നാവ ബലാത്സംഗ കേസിലെ പ്രതികളെയും ഹൈദരാബാദ് മോഡലില്‍ വധിക്കണമെന്നും പ്രാചി ആവശ്യപ്പെട്ടു.

രാജ്യം ഭരിക്കുന്നയാള്‍ അക്രമത്തില്‍ വിശ്വസിക്കുന്നത് കൊണ്ടാണ് ജനങ്ങള്‍ നിയമം കയ്യിലെടുക്കുന്നതെന്നും രാജ്യത്ത് സ്ത്രീകള്‍ക്കെതിരായ അക്രമങ്ങള്‍ വര്‍ധിച്ചു വരികയാണെന്നും രാഹുല്‍ ഗാന്ധി നേരത്തെ പറഞ്ഞിരുന്നു. നിങ്ങൾ രാജ്യാന്തര മാധ്യമങ്ങളുടെ തലക്കെട്ട് നോക്കൂ, അവർ ഇന്ത്യയെ വിശേഷിപ്പിക്കുന്നത് ബലാത്സംഗ തലസ്ഥാനമെന്നാണ്. പീഡനക്കേസിൽ ബി.ജെ.പി എം.എൽ.എ പ്രതിയായിട്ടും പ്രധാനമന്ത്രി പ്രതികരിക്കുന്നില്ലെന്നും രാഹുല്‍ ഗാന്ധി വിമര്‍ശിച്ചിരുന്നു. രാജ്യത്തിന്റെ പെൺമക്കളെയും സഹോദരിമാരെയും സംരക്ഷിക്കാന്‍ ഭരിക്കുന്നവര്‍ക്ക് കഴിയുന്നില്ലെന്നും രാഹുല്‍ കുറ്റപ്പെടുത്തി.