LiveTV

Live

National

ഒരു സെല്ലില്‍ 50 പേര്‍, പുറം ലോകം കാണാനാവാത്ത വിധം 20 അടി പൊക്കമുള്ള ചുറ്റുമതില്‍: പൗരത്വ പട്ടികയില്‍ പെടാത്തവര്‍ക്ക് തടങ്കല്‍ പാളയം

1000 കോടി ബജറ്റില്‍ ബാര്‍പേട്ട, ദിമാ, ഹസൗ, കാംരൂപ്, കരംഗഞ്ച്, ലഖിംപൂര്‍ തുടങ്ങിയ 11 ജില്ലകളിലാണ് ക്യാമ്പുകളുടെ പണി പൂര്‍ത്തിയാവുന്നത്.

ഒരു സെല്ലില്‍ 50 പേര്‍, പുറം ലോകം കാണാനാവാത്ത വിധം 20 അടി പൊക്കമുള്ള ചുറ്റുമതില്‍: പൗരത്വ പട്ടികയില്‍ പെടാത്തവര്‍ക്ക് തടങ്കല്‍ പാളയം

പൗരത്വ രജിസ്റ്ററില്‍ പെടാതെ പോയവര്‍ക്കുള്ള അവസാനത്തെ കേന്ദ്രങ്ങളിലൊന്നാണ് അസമിലെ ഗോല്‍പാറയില്‍ പണി പൂര്‍ത്തിയാക്കുന്ന തടങ്കല്‍ പാളയം. അസമിലെ 11 ജില്ലകളില്‍ പണി പൂര്‍ത്തിയാവുന്ന ഇത്തരം ക്യാമ്പുകളില്‍ ഓരോന്നിലും 1000 മുതല്‍ 3000 പേരെ തടവിലാക്കുമെന്നാണ് സര്‍ക്കാര്‍ പറയുന്നത്.

ഒരാള്‍ക്ക് കിടക്കാന്‍ ഒന്നരയടി വീതി. ഒരു സെല്ലില്‍ 50 പേര്‍. പുറം ലോകം കാണാനാവാത്ത വിധം 20 അടി പൊക്കമുള്ള ചുറ്റുമതില്‍. സ്ത്രീകള്‍ക്കുള്ള സെല്ലുകള്‍ പ്രത്യേകം വേര്‍തിരിച്ച മതില്‍കെട്ടിനകത്തായിരിക്കും. മനുഷ്യത്വത്തിന്റെ നേരിയ കണിക പോലും കാണാനില്ലാത്ത ഈ തടങ്കല്‍ പാളയങ്ങള്‍ക്കകത്ത് എത്തിപ്പെടുന്ന മക്കളും ഭാര്യയും ഭര്‍ത്താവും കണ്ടുമുട്ടാനുള്ള സാഹചര്യങ്ങള്‍ തീര്‍ത്തും ഇല്ല എന്നു തന്നെ പറയാം. 1000 കോടി ബജറ്റില്‍ ബാര്‍പേട്ട, ദിമാ, ഹസൗ, കാംരൂപ്, കരംഗഞ്ച്, ലഖിംപൂര്‍ തുടങ്ങിയ 11 ജില്ലകളിലാണ് ക്യാമ്പുകളുടെ പണി പൂര്‍ത്തിയാവുന്നത്. ഇക്കൂട്ടത്തില്‍ 3000 പേരെ ഉള്‍ക്കൊള്ളാന്‍ ശേഷിയുള്ള ഏറ്റവും വലിയ തടങ്കല്‍പാളയമാണ് ഗോല്‍പാറയിലേത്.

19 ലക്ഷത്തിലധികം പേര്‍ പൗരത്വ പട്ടികയില്‍ നിന്ന് പുറത്തായ അസമില്‍ സര്‍ക്കാര്‍ കണക്കുകളനുസരിച്ച് തന്നെ ഈ 11 ക്യാമ്പുകളില്‍ പരമാവധി താമസിപ്പിക്കാനാവുക 30,000 പേരെയാണ്. ശേഷിച്ചവരെ അസമിലെയും കേന്ദ്രത്തിലെയും സര്‍ക്കാര്‍ എന്ത് ചെയ്യുമെന്ന ചോദ്യവും ഈ തടങ്കല്‍ പാളയങ്ങള്‍ ബാക്കിയാക്കുന്നുണ്ട്.