LiveTV

Live

National

കര്‍ണാടകയില്‍ ഭരണ പ്രതിസന്ധി മറികടക്കാന്‍ തിരക്കിട്ട നീക്കം; രാജിവെച്ച എം.എല്‍.എമാര്‍ക്ക് മന്ത്രിസ്ഥാനം നല്‍കാന്‍ നീക്കം

സിദ്ദരാമയ്യയെ മുഖ്യമന്ത്രി ആക്കിയാല്‍ രാജി പിന്‍വലിക്കുമെന്ന് ജെ.ഡി.എസ് എം.എല്‍.എ എച്ച് വിശ്വനാഥ് വ്യക്തമാക്കി. വിദേശത്തായിരുന്ന മുഖ്യമന്ത്രി എച്ച്.ഡി കുമാരസ്വാമി ബംഗളുരുവിലെത്തി

കര്‍ണാടകയില്‍ ഭരണ പ്രതിസന്ധി മറികടക്കാന്‍ തിരക്കിട്ട നീക്കം; രാജിവെച്ച എം.എല്‍.എമാര്‍ക്ക് മന്ത്രിസ്ഥാനം നല്‍കാന്‍ നീക്കം

കര്‍ണാടകയിലെ സഖ്യസര്‍ക്കാരിനെ നിലനിര്‍ത്താന്‍ പുതിയ ഫോര്‍മുലയുമായി കോണ്‍ഗ്രസ്. രാജിവെച്ച എം.എല്‍.എമാര്‍ക്ക് മന്ത്രിസ്ഥാനം നല്‍കി പ്രശ്നം പരിഹരിക്കാനാണ് കോണ്‍ഗ്രസ് ശ്രമിക്കുന്നത്. നിലവിലെ മന്ത്രിസഭയിലെ ആറ് പേര്‍ രാജിവെക്കും. പകരം രാജിവെച്ച എം.എല്‍.എമാരെ പരിഗണിക്കാനാണ് തീരുമാനം.

സിദ്ധരാമയ്യയെ മുഖ്യമന്ത്രിയാക്കണമെന്ന് രാജിവെച്ച കോണ്‍ഗ്രസ് എം.എല്‍.എമാരില്‍ ചിലര്‍ ആവശ്യപ്പെട്ടു. സിദ്ദരാമയ്യ മുഖ്യമന്ത്രി ആയാല്‍ എതിര്‍ക്കില്ലെന്ന് ജെ.ഡി.എസ് മന്ത്രി ജി.ടി ദേവഗൗഡ. ഇരു കക്ഷികളും ചേര്‍ന്ന് സിദ്ദരാമയ്യയെ മുഖ്യമന്ത്രി ആക്കിയാല്‍ രാജി പിന്‍വലിക്കുമെന്ന് ജെ.ഡി.എസ് എം.എല്‍.എ എച്ച് വിശ്വനാഥ് വ്യക്തമാക്കി.

പ്രതിസന്ധിയെ തുടര്‍ന്ന് വിദേശത്തായിരുന്ന കര്‍ണാടക മുഖ്യമന്ത്രി എച്ച്.ഡി കുമാരസ്വാമി ബംഗളുരുവിലെത്തിയിട്ടുണ്ട്. സഖ്യസര്‍ക്കാരിന് ഭീഷണിയില്ലെന്ന് സിദ്ധരാമയ്യ പ്രതികരിച്ചു. സ്ഥിതിഗതികള്‍ വിലയിരുത്താന്‍ കോണ്‍ഗ്രസ് നേതാക്കളായ സിദ്ധരാമയ്യ, ജി പരമേശ്വര, കെസി വേണുഗോപാല്‍, മല്ലികാര്‍ജുന ഖാര്‍ഗെ എന്നിവര്‍ യോഗം ചേര്‍ന്നു.

കോണ്‍ഗ്രസില്‍ നിന്നും ജെ.ഡി.എസില്‍ നിന്നുമായി 11 എം.എല്‍.എമാര്‍ ഇന്നലെ കര്‍ണാടക ഗവര്‍ണര്‍ക്ക് രാജിക്കത്ത് നല്‍കിയതോടെയാണ് സഖ്യസര്‍ക്കാറിന്റെ നിലനില്‍പ് അനിശ്ചിതത്വത്തിലായത്. ഇവര്‍ മുംബൈയിലെ റിസോര്‍ട്ടിലാണ് ഇപ്പോഴുള്ളത്. രാജിവെച്ച കോണ്‍ഗ്രസ് എം.എല്‍.എമാരില്‍ ചിലര്‍ സിദ്ധരാമയ്യയെ മുഖ്യമന്ത്രിയാക്കണമെന്ന നിര്‍ദേശം മുന്നോട്ടുവച്ചതായാണ് റിപ്പോര്‍ട്ട്. രാജിവെച്ച എം.എല്‍.എമാരുമായി സംസാരിക്കുന്നുണ്ടെന്ന് സിദ്ധരാമയ്യയും പ്രതികരിച്ചു.

കോണ്‍ഗ്രസ് നേതാവ് ഡി.കെ ശിവകുമാര്‍ ജെ.ഡി.എസ് അധ്യക്ഷന്‍ എച്ച്.ഡി ദേവഗൌഡയുമായി ചര്‍ച്ച നടത്തി. വിമത എം.എല്‍.എമാരെ ഉള്‍പ്പെടുത്തി മന്ത്രിസഭ അഴിച്ചുപണിത് പ്രതിസന്ധി പരിഹരിക്കണമെന്നാണ് ജെ.ഡി.എസ് നിര്‍ദേശം. മല്ലികാര്‍ജുന ഖാര്‍ഗെയെ മുഖ്യമന്ത്രിയാക്കണമെന്ന നിര്‍ദേശവും ഉയരുന്നുണ്ട്. എന്നാല്‍ ഇത് ഖാര്‍ഗെ നിഷേധിച്ചു.

അതേസമയം മുഖ്യമന്ത്രിയാകാനുള്ള സിദ്ധരാമയ്യയുടെ ശ്രമമാണ് കര്‍ണാടകയില്‍ നടക്കുന്നതെന്നാണ് ബി.ജെ.പി ദേശീയ നേതൃത്വത്തിന്റെ ആരോപണം. ബി.ജെ.പിയില്‍ ചേരുമെന്ന് രാജിവെച്ച ചില എം.എല്‍.എമാര്‍ ഭീഷണി മുഴക്കിയിട്ടുണ്ട്.

കര്‍ണാടകയില്‍ വീണ്ടും പ്രതിസന്ധി; 11 എം.എല്‍.എമാര്‍ രാജിവെച്ചു
Also Read

കര്‍ണാടകയില്‍ വീണ്ടും പ്രതിസന്ധി; 11 എം.എല്‍.എമാര്‍ രാജിവെച്ചു