LiveTV

Live

National

‘ബാബരി തകര്‍ത്തതില്‍ അഭിമാനിക്കുന്നു’; വര്‍ഗീയ പരാമര്‍ശത്തില്‍ പ്രഗ്യാ താക്കൂറിനെതിരെ എഫ്.ഐ.ആര്‍ രേഖപ്പെടുത്താന്‍ ഉത്തരവ്

‘ബാബരി തകര്‍ത്തതില്‍ അഭിമാനിക്കുന്നു’; വര്‍ഗീയ പരാമര്‍ശത്തില്‍ പ്രഗ്യാ താക്കൂറിനെതിരെ എഫ്.ഐ.ആര്‍ രേഖപ്പെടുത്താന്‍ ഉത്തരവ്

അയോധ്യയില്‍ ബാബരി മസ്ജിദ് തകര്‍ത്തതില്‍ താന്‍ ഖേദിക്കുന്നില്ലെന്നും അതേസമയം അതില്‍ അഭിമാനം കൊള്ളുന്നതായും പറഞ്ഞ ബി.ജെ.പി നേതാവ് സാധ്വി പ്രഗ്യ സിങ് താക്കൂറിന്റെ വര്‍ഗീയ പരമാമര്‍ശത്തില്‍ എഫ്.ഐ.ആര്‍ രേഖപ്പെടുത്താന്‍ ഉത്തരവായി. തെരഞ്ഞെടുപ്പ് കമ്മീഷനിലെ ഓഫീസറാണ് എഫ്.ഐ.ആര്‍ രേഖപ്പെടുത്താന്‍ ഉത്തരവിട്ടത്.

2008ലെ മാലേഗാവ് സ്ഫോടനക്കേസില്‍ പ്രതിയായി ജാമ്യത്തിലിറങ്ങിയ പ്രഗ്യാ ലോക്സഭ തെരഞ്ഞെടുപ്പില്‍ മധ്യപ്രദേശ് ഭോപ്പാലില്‍ നിന്നുള്ള ബി.ജെ.പി സ്ഥാനാര്‍ഥിയാണ്.

''ബാബരി തകര്‍ത്തതില്‍ എന്തിനാണ് നാം ഖേദിക്കുന്നത്? ഞങ്ങള്‍ അതില്‍ അഭിമാനിക്കുന്നു. രാം മന്ദിറിന്റെ ചില അവശിഷ്ടങ്ങളുണ്ടായിരുന്നു, ഞങ്ങള്‍ അത് നീക്കം ചെയ്തു. ഇത് നമ്മുടെ രാജ്യത്തിന്റെ ആത്മാഭിമാനം ഉയര്‍ത്തി. ഇനി നമ്മള്‍ രാമക്ഷേത്രം നിര്‍മിക്കും.'' പ്രഗ്യാ സിങ് ടി.വി9 ചാനലുമായിട്ടുള്ള അഭിമുഖത്തില്‍ പറഞ്ഞു.

രണ്ട് വിഭാഗങ്ങള്‍ക്കിടയില്‍ വിദ്വേഷ പ്രചരണം നടത്തിയതിനാണ് പ്രഗ്യക്കെതിരെ എഫ്.ഐ.ആര്‍ രേഖപ്പെടുത്താന്‍ ഉത്തരവിട്ടത്. മുംബൈ ഭീകരവിരുദ്ധ സ്ക്വാഡിന്‍റെ തലവനായിരുന്ന ഹേമന്ദ് കര്‍ക്കരെ കൊല്ലപ്പെടാന്‍ കാരണം തന്‍റെ ശാപമാണെന്ന പ്രഗ്യാസിങ് താക്കൂറിന്‍റെ പ്രസ്താവനയും വിവാദമായിരുന്നു. വിവാദ പ്രസ്താവനയില്‍ പ്രഗ്യാ സിങിന് തെരഞ്ഞെടുപ്പ് കമ്മീഷന്‍ നോട്ടീസ് അയക്കുകയും ചെയ്തിരുന്നു. പ്രഗ്യ സിങ് പ്രതിയായ മാലേഗാവ് സ്ഫോടനക്കേസ് അന്വേഷിച്ചിരുന്നത് ഹേമന്ദ് കര്‍ക്കരെയായിരുന്നു. ഈ കേസില്‍ കൊലപാതകവും കലാപശ്രമവും അടക്കമുള്ള വകുപ്പുകളിലാണ് പ്രഗ്യാ സിങ് പ്രതിയായത്.