LiveTV

Live

National

ഗുജറാത്തില്‍ ബിജെപിയും കോണ്‍ഗ്രസും ഒപ്പത്തിനൊപ്പമെന്ന് സര്‍വ്വേഫലം

ഗുജറാത്തില്‍  ബിജെപിയും കോണ്‍ഗ്രസും ഒപ്പത്തിനൊപ്പമെന്ന് സര്‍വ്വേഫലം
Summary
ഇരുകൂട്ടര്‍ക്കും 43 ശതമാനം വീതം വോട്ട് ലഭിക്കുമെന്നാണ് എബിപി ന്യൂസ് - സിഎസ്ഡിഎസ് സര്‍വ്വേ സൂചിപ്പിക്കുന്നത്.

ഗുജറാത്തില്‍ ബിജെപിയും കോണ്‍ഗ്രസും ഒപ്പത്തിനൊപ്പമെന്ന് അഭിപ്രായ സര്‍വ്വേഫലം. ഇരുകൂട്ടര്‍ക്കും 43 ശതമാനം വീതം വോട്ട് ലഭിക്കുമെന്നാണ് എബിപി ന്യൂസ് - സിഎസ്ഡിഎസ് സര്‍വ്വേ സൂചിപ്പിക്കുന്നത്. ഹര്‍ദിക് പട്ടേലിന്റെ ജനപ്രീതി കുറഞ്ഞതായും സര്‍വ്വേ ഫലം പറയുന്നു.

ശനിയാഴ്ച്ച ആദ്യഘട്ട തെരഞ്ഞെടുപ്പ് നടക്കാനിരിക്കെയാണ് എബിപി ന്യൂസ് - സിഎസ്ഡിഎസ് സര്‍വ്വേ ഫലം പുറത്തു വന്നിരിക്കുന്നത്. വാശിയേറിയ പോരാട്ടമാണ് ഇത്തവണ ഗുജറാത്തിലെന്ന് വ്യക്തമാക്കുന്നതാണ് സര്‍വ്വേ ഫലം. 43 ശതമാനം വീതം വോട്ട് ഇരുപാര്‍ട്ടികള്‍ക്കും ലഭിക്കുമെന്ന് പറയുന്ന സര്‍വ്വേഫലം ഭൂരിപക്ഷം ബിജെപിക്കാകുമെന്നും പ്രവചിക്കുന്നു. കോണ്‍ഗ്രസിന് 82 സീറ്റുകള്‍ ലഭിക്കുമ്പോള്‍ ബിജെപി 95 സീറ്റുകള്‍ നേടി അധികാരം നിലനിര്‍ത്തുമെന്നാണ് പ്രവചനം. തെക്കന്‍ ഗുജറാത്തിലൊഴികെയുള്ള പ്രദേശങ്ങളിലെ റൂറല്‍ മേഖലകളില്‍ കോണ്‍ഗ്രസിന് മേല്‍ക്കൈ ലഭിക്കും. എന്നാല്‍ അര്‍ബന്‍ മേഖലകളെല്ലാം ബിജെപിക്കൊപ്പമാണ്. മോദി പ്രചാരണത്തിനെത്തിയിട്ടില്ലാത്ത വടക്കന്‍ ഗുജറാത്തിലാണ് കോണ്‍ഗ്രസിന് വലിയ മേധാവിത്വം നിലവിലുള്ളത്.

അതേസമയം സൌരാഷ്ട്ര - കച്ച് മേഖലകളില്‍ ബിജെപി ശക്തമായ നിലയിലാണ്. ജിഎസ്ടിയും പട്ടേല്‍ പ്രക്ഷോഭവുമാണ് വിധിനിര്‍ണയിക്കുന്നതില്‍ വലിയ പങ്ക് വഹിക്കുന്നത്. അതേസമയം, ഹര്‍ദിക് പട്ടേലിന്റെ ജനപിന്തുണയില്‍ വലിയ ഇടിവുണ്ടായതായും സര്‍വ്വേ ഫലം സൂചിപ്പിക്കുന്നു. ഒക്ടോബറില്‍ 64 ശതമാനമുണ്ടായിരുന്ന പിന്തുണയില്‍ 6 ശതമാനത്തിന്റെ ഇടിവുണ്ടായതായി സര്‍വ്വേഫലം സൂചിപ്പിക്കുന്നു.