LiveTV

Live

National

2019 മാര്‍ച്ചോടെ എല്ലാ തീവണ്ടികളിലും ജൈവ കക്കൂസുകള്‍ സ്ഥാപിക്കുമെന്ന് റെയില്‍വെ

2019 മാര്‍ച്ചോടെ എല്ലാ തീവണ്ടികളിലും  ജൈവ കക്കൂസുകള്‍ സ്ഥാപിക്കുമെന്ന് റെയില്‍വെ
Summary
റെയില്‍വേയുടെ കീഴിലുള്ള പണിശാലകളില്‍ അറ്റകുറ്റപ്പണിക്കായി എത്തിക്കുന്ന എല്ലാ കോച്ചുകളിലും നിര്‍ബന്ധമായും ജൈവ കക്കൂസ് സ്ഥാപിക്കണമെന്ന് മന്ത്രാലയം നിര്‍ദേശിച്ചു

2019 മാര്‍ച്ചോടെ എല്ലാ തീവണ്ടികളിലും ജൈവ-കക്കൂസുകള്‍ സ്ഥാപിക്കാനൊരുങ്ങി റെയില്‍വേ മന്ത്രാലയം. റെയില്‍വേയുടെ കീഴിലുള്ള പണിശാലകളില്‍ അറ്റകുറ്റപ്പണിക്കായി എത്തിക്കുന്ന എല്ലാ കോച്ചുകളിലും നിര്‍ബന്ധമായും ജൈവ കക്കൂസ് സ്ഥാപിക്കണമെന്ന് മന്ത്രാലയം നിര്‍ദേശിച്ചു. നിലവില്‍ സര്‍വിസ് നടത്തുന്ന കോച്ചുകളിലും ഇത് സ്ഥാപിക്കുന്നതിനായി നടപടി സ്വീകരിക്കാനും ആവശ്യപ്പെട്ടിട്ടുണ്ട്.

ഇതുവരെ ആകെ കോച്ചുകളുടെ 55 ശതമാനം എണ്ണത്തില്‍ മാത്രമാണ് ജൈവ ശുചിമുറി സ്ഥാപിക്കാന്‍ കഴിഞ്ഞത്. സ്വച്ഛ്ഭാരത് പദ്ധതിക്ക് കീഴില്‍ ഇതിന് മുന്തിയ പരിഗണന നല്‍കുന്നതിന്റെ ഭാഗമായാണ് പദ്ധതി പൂര്‍ത്തീകരിക്കാന്‍ കേന്ദ്രസര്‍ക്കാര്‍ കാലാവധി നിശ്ചയിച്ചത്. റെയില്‍വേ സഹമന്ത്രി രാജന്‍ ഗോഹൈന്‍ ഇക്കാര്യം ലോക്‌സഭയിലും സ്ഥിരീകരിച്ചു.

റെയില്‍വേയും പ്രതിരോധ ഗവേഷണ വികസന സംഘടനയായ ഡി.ആര്‍.ഡി.ഒയും സംയുക്തമായാണ് ഇത് വികസിപ്പിച്ചത്. കക്കൂസുകളുടെ അടിയില്‍ സ്ഥാപിക്കുന്ന കണ്ടെയ്‌നറില്‍ പ്രാണവായുവില്ലാതെ ജീവിക്കാന്‍ കഴിയുന്ന ബാക്ടീരിയയെ ഉപയോഗിച്ച് മനുഷ്യ വിസര്‍ജ്യത്തെ വെള്ളവും മീഥൈന്‍ വാതകവുമായി വിഘടിപ്പിക്കുക എന്ന തത്വത്തിന്റെ അടിസ്ഥാനത്തിലാവും പ്രവര്‍ത്തിക്കുക. ക്ലോറിന്‍ ഉപയോഗിച്ച് അണുവിമുക്തമാക്കുന്ന വെള്ളം റെയില്‍വേ ട്രാക്കില്‍ തന്നെ ഒഴുക്കും. എന്നാല്‍, കഴിഞ്ഞ നാലുവര്‍ഷമായി റെയില്‍വേ ഉപയോഗിക്കുന്ന ജൈവ കക്കൂസ് ഫലപ്രദമല്ലെന്നും സെപ്റ്റിക് ടാങ്കില്‍ നിന്നും വലിയ വ്യത്യാസമില്ലെന്ന ആരോപണവുമുണ്ട്.