LiveTV

Live

Kerala

എല്ലാ വർഗീയതയും മോശമാണ്, അതിൽ തരംതിരിവെന്തിന്: പി.കെ കുഞ്ഞാലിക്കുട്ടി

"ന്യൂനപക്ഷ വികാരം മുതലെടുത്ത് സിപിഎം പല വേളകളിൽ എടുത്ത നിലപാടുകൾ ശരിയല്ല എന്ന് പറഞ്ഞിട്ടുണ്ട്"

എല്ലാ വർഗീയതയും മോശമാണ്, അതിൽ തരംതിരിവെന്തിന്: പി.കെ കുഞ്ഞാലിക്കുട്ടി

കോഴിക്കോട്: ന്യൂനപക്ഷ വർഗീയതയാണ് ഏറ്റവും വലിയ വർഗീയത എന്ന സിപിഎം സെക്രട്ടറി എ വിജയരാഘവന്റെ പ്രസ്താവനയ്‌ക്കെതിരെ മുസ്‌ലിംലീഗ് ദേശീയ ജനറൽ സെക്രട്ടറി പി.കെ കുഞ്ഞാലിക്കുട്ടി. എല്ലാ വർഗീയതയും മോശമാണ് എന്നും ഇക്കാര്യത്തിൽ എന്തിനാണ് തരംതിരിവ് എന്നും അദ്ദേഹം ചോദിച്ചു.

' എത്ര നിഷേധിച്ചിട്ടും മനസ്സിലുള്ള കാര്യങ്ങൾ പുറത്തു വരികയാണ്. പറയുകയും തിരുത്തുകയും ചെയ്യുന്നു. എല്ലാ വർഗീയതയും മോശമാണ്. വർഗീയതയുടെ കാര്യത്തിൽ തരംതിരിവ് എന്തിനാണ്? അത് അപലപിക്കേണ്ടതാണ്. ന്യൂനപക്ഷ വികാരം മുതലെടുത്ത് സിപിഎം പല വേളകളിൽ എടുത്ത നിലപാടുകൾ ശരിയല്ല എന്ന് ഞങ്ങൾ പറഞ്ഞിട്ടുണ്ട്. വോട്ടിനു വേണ്ടിയാണ് അത്തരം സമീപനങ്ങൾ എടുത്തത്. ആ തരംതിരിവാണ് മോശം. നമ്മുടെ രാജ്യത്ത് ബിജെപി ഉള്ളതു കൊണ്ട് ഇവിടത്തെ ഗൗരവമുള്ള പ്രശ്‌നം അവരുണ്ടാക്കുന്ന വർഗീയതയാണ്' - അദ്ദേഹം പറഞ്ഞു.

മതേതര കക്ഷികൾ കേരളത്തിൽ യുഡിഎഫിന്റെ പിന്നിൽ അണിനിരക്കുകയാണ് വേണ്ടത് എന്നും കുഞ്ഞാലിക്കുട്ടി പറഞ്ഞു. അഖിലേന്ത്യാ തലത്തിൽ കോൺഗ്രസിന്റെ നേതൃത്വത്തിലുള്ള യുപിഎയിൽ അണിനിരക്കണം. പഞ്ചാബിൽ ജാതിമത വ്യത്യാസങ്ങൾക്കപ്പുറം കാർഷിക പ്രശ്‌നങ്ങളിൽ കോൺഗ്രസിന് പിന്നിൽ ജനം അണിനിരന്നു- കുഞ്ഞാലിക്കുട്ടി ചൂണ്ടിക്കാട്ടി.

വിജയരാഘവൻ പറഞ്ഞത്

'ഒരു വർഗീയതയ്ക്ക് വേറൊരു വർഗീയത ഉത്തരം പറയുമോ? ഞങ്ങളാ ചോദ്യം ചോദിച്ചു. ഒരു വർഗീയതയ്ക്ക് മറ്റൊരു വർഗീയത കൊണ്ട് പരിഹാരം കാണാൻ കഴിയുമോ? ന്യൂനപക്ഷ വർഗീയത ഉയർത്തിപ്പിടിച്ചു കൊണ്ട് ഭൂരിപക്ഷ വർഗീയതയെ ചെറുക്കാൻ കഴിയുമോ? അത് ഭൂരിപക്ഷ വർഗീയതയുടെ അക്രമ പ്രവർത്തനങ്ങളെ ന്യായീകരിക്കില്ലേ? ഏറ്റവും തീവ്രമായ വർഗീയത ന്യൂനപക്ഷ വർഗീയതയല്ലേ?' - എന്നായിരുന്നു വിജയരാഘവവൻ ഇന്നലെ നടത്തിയ പ്രസ്താവന.

വികസന മുന്നേറ്റ യാത്രയ്ക്ക് ഇന്നലെ കോഴിക്കോട് മുക്കത്ത് നൽകിയ സ്വീകരണത്തിൽ സംസാരിക്കുകയായിരുന്നു വിജയരാഘവൻ.

എന്നാൽ പരാമർശം വിവാദമായതോടെ ഇന്ന് വിജയരാഘവൻ വിശദീകരണവുമായി രംഗത്തെത്തി. താൻ അങ്ങനെ പറഞ്ഞിട്ടില്ല എന്നും മാധ്യമങ്ങൾ പ്രസ്താവന വളച്ചൊടിക്കുകയുമാണ് എന്നുമാണ് അദ്ദേഹം ആരോപിച്ചത്.

'ഞാൻ അങ്ങനെ പറഞ്ഞിട്ടില്ല. ഞങ്ങളുടെ നിലപാട് അക്കാര്യത്തിൽ വ്യക്തമാണ്. മാധ്യമസുഹൃത്തുക്കൾ വാർത്തകളെ തലകീഴാക്കി നിർത്തി അവരുടെ പ്രവർത്തനം നടത്തുകയാണ്. കുറച്ചു കളവു കൊടുത്താലേ കാശു കിട്ടൂ എന്നുള്ളതു കൊണ്ട് അങ്ങനെ പ്രവർത്തിക്കുന്ന ചില മാന്യസുഹൃത്തുക്കളും നിങ്ങളുടെ കൂട്ടത്തിൽ ഉണ്ട് എന്നത് ഒരു വസ്തുതയാണ്. ജനങ്ങൾക്ക് അതറിയുകയും ചെയ്യാം. ഭൂരിപക്ഷ വർഗീയത രാജ്യത്ത് അധികാരത്തിലിരിക്കുന്ന വർഗീയതയാണ്. ന്യൂനപക്ഷ വർഗീയത നമ്മുടെ നാട്ടിലെ ഭൂരിപക്ഷത്തിന്റെ വർഗീയതയാണ്. അതിന്റെ ആപത്ത് എപ്പോഴും കൂടുതലല്ലേ?' - എന്നാണ് വിജയരാഘവൻ പ്രസ്താവന വിശദീകരിച്ചത്.