LiveTV

Live

Kerala

അവകാശ ലംഘനം നടത്തിയിട്ടില്ല, മുൻ നിലപാടിൽ മാറ്റമില്ല: ധനമന്ത്രി എത്തിക്സ് കമ്മിറ്റിക്ക് മുന്നിൽ ഹാജരായി

സിഎജി റിപ്പോർട്ട് ചോർത്തിയെന്ന പരാതിയിൽ ധനമന്ത്രി തോമസ് ഐസക്ക് എത്തിക്സ് കമ്മിറ്റിക്ക് മുന്നിൽ ഹാജരായി വിശദീകരണം നൽകി.

അവകാശ ലംഘനം നടത്തിയിട്ടില്ല, മുൻ നിലപാടിൽ മാറ്റമില്ല: ധനമന്ത്രി എത്തിക്സ് കമ്മിറ്റിക്ക് മുന്നിൽ  ഹാജരായി

സിഎജി റിപ്പോർട്ട് ചോർത്തിയെന്ന പരാതിയിൽ ധനമന്ത്രി തോമസ് ഐസക്ക് എത്തിക്സ് കമ്മിറ്റിക്ക് മുന്നിൽ ഹാജരായി വിശദീകരണം നൽകി. അവകാശ ലംഘനം നടത്തിയിട്ടില്ലെന്നും മുൻ നിലപാടിൽ മാറ്റമില്ലെന്നും ധനമന്ത്രി. സർക്കാരുമായി ചർച്ച ചെയ്യാത്ത കാര്യങ്ങളാണ് സിഎജി റിപ്പോർട്ടിൽ ഉൾപ്പെടുത്തിയിരുന്നത്. സംസ്ഥാനത്തിന്‍റെ വികസന പ്രവർത്തനങ്ങൾ അട്ടിമറിക്കുന്ന അസാധാരണ സാഹചര്യം ഉണ്ടായി. എത്തിക്സ് കമ്മിറ്റി എന്ത് തീരുമാനിച്ചാലും അത് സ്വീകരിക്കുമെന്നും ധനമന്ത്രി തോമസ് ഐസക്ക് പറഞ്ഞു.

സഭയിൽ വെയ്ക്കും മുമ്പ് റിപ്പോർട്ട് പരസ്യപ്പെടുത്തിയ മന്ത്രിയുടെ നടപടി സഭാ അംഗങ്ങളുടെ അവകാശങ്ങളുടെ ലംഘനമാണെന്നായിരുന്നു വി.ഡി സതീശന്‍റെ പരാതി. കഴിഞ്ഞയാഴ്ച സതീശൻ എത്തിക്സ് കമ്മറ്റിക്ക് ഐസക്കിനെതിരേ തെളിവ് നൽകിയിരുന്നു. മന്ത്രിയുടെ വിശദീകരണം കേട്ട ശേഷം എത്തിക്സ് കമ്മിറ്റി തുടർ നടപടികളിലേക്ക് കടക്കും.

അതീവരഹസ്യമായി സൂക്ഷിക്കേണ്ട സിഎജി റിപ്പോർട്ട് ധനമന്ത്രി മാധ്യമങ്ങൾക്ക് ചോർത്തി നൽകി. ഇതുമായി ബന്ധപ്പെട്ട് ചാനലുകളിലടക്കം നടന്ന ചർച്ചയിൽ പങ്കെടുക്കുകയും ചെയ്തു. സഭാവകാശങ്ങളിന്മേലുള്ള കടന്നുകയറ്റവും ചട്ടലംഘനവുമാണിതെന്നായിരുന്നു വി. ഡി സതീശന്‍റെ പരാതി.

ഗവർണർക്കാണ് സിഎജി റിപ്പോർട്ട് സമർപ്പിക്കേണ്ടത്. അത് അതീവരഹസ്യമായി സൂക്ഷിക്കേണ്ടതാണ്. ഈ റിപ്പോർട്ട് ഗവർണറുടെ അംഗീകാരത്തോടെ സഭയിൽ വയ്ക്കേണ്ടതായിരുന്നു. ഇതൊന്നുമുണ്ടായില്ല. സഭയിൽ എത്തുന്നത് വരെ റിപ്പോർട്ട് രഹസ്യമായി സൂക്ഷിക്കേണ്ട ഉത്തരവാദിത്വം ധനമന്ത്രിക്കുണ്ടായിരുന്നു. അതിനാല്‍ ധനമന്ത്രിയുടെ ഭാഗത്തുനിന്നുണ്ടായത് ഗുരുതരമായ ചട്ടലംഘനമാണെന്നും പരാതിയില്‍ പറയുന്നു.