LiveTV

Live

Kerala

കുഞ്ഞിനെ ആറ്റിലെറിഞ്ഞ് കൊന്നത് ഭാര്യയെ ഒഴിവാക്കാനെന്ന് പ്രതി

ചിഞ്ചുമായുള്ള ബന്ധം ഉണ്ണികൃഷ്ണന്‍റെ വീട്ടുകാര്‍ക്കും ഇഷ്ടമല്ലായിരുന്നു, പല തവണ വീട്ടില്‍ വഴക്കുമുണ്ടായി.

കുഞ്ഞിനെ ആറ്റിലെറിഞ്ഞ് കൊന്നത് ഭാര്യയെ ഒഴിവാക്കാനെന്ന് പ്രതി

തിരുവനന്തപുരം തിരുവല്ലത്ത് കുഞ്ഞിനെ ആറ്റില്‍ എറിഞ്ഞ് കൊലപ്പെടുത്തിയ സംഭവത്തില്‍ പ്രതിയുടെ ലക്ഷ്യം ഭാര്യയായ ചിഞ്ചുവിനെ ഒഴിവാക്കാനായിരുന്നുവെന്ന് പോലീസ്. കൂടുതല്‍ ചോദ്യം ചെയ്യലിനായി പ്രതിയെ ഉടന്‍ പോലീസ് കസ്റ്റഡിയില്‍ വാങ്ങും, ഇതിന് ശേഷമാകും തെളിവെടുപ്പ് ഉള്‍പ്പടെയുള്ള കാര്യങ്ങളിലേക്ക് പോലീസ് കടക്കുക.

കുഞ്ഞിനെ ഇല്ലാതാ‌ക്കുന്നതോടെ ഭാര്യ ചിഞ്ചുവിനെയും ജീവിതത്തില്‍ നിന്ന് ഒഴിവാക്കാമെന്ന് ഉണ്ണികൃഷ്ണന്‍ കണക്കുകൂട്ടി. അതിനായി ഒരാഴ്ച നീണ്ട കൊലപാതക ആസൂത്രണവും നടത്തി. എന്നാല്‍ കുഞ്ഞിനെ കൊലപ്പെടുത്തി ശേഷം ആറ്റില്‍ നിന്ന് മടങ്ങുന്നത് നാട്ടുകാര്‍ കണ്ടതോടെ പദ്ധതി പൊളിഞ്ഞു.

പോലീസ് ചോദ്യം ചെയ്യലില്‍ ഒറ്റയ്ക്കാണ് കൃത്യം നടത്തിയതെന്ന് പ്രതി സമ്മതിച്ചിട്ടുണ്ട്. ചിഞ്ചുമായുള്ള ബന്ധം ഉണ്ണികൃഷ്ണന്‍റെ വീട്ടുകാര്‍ക്കും ഇഷ്ടമല്ലായിരുന്നു, പല തവണ വീട്ടില്‍ വഴക്കുമുണ്ടായി. ഇത് സംബന്ധിച്ച് ഒരു കേസ് തിരുവല്ലം പോലീസ് സ്റ്റേഷനില്‍ ഉണ്ട്. ചിഞ്ചുവിനെ ഉപേക്ഷിച്ച ശേഷം മറ്റൊരു വിവാഹം കഴിക്കാനും പ്രതി പദ്ധതിയിട്ടിരുന്നു. ഉണ്ണികൃഷ്ണനെ കസ്റ്റഡിയില്‍ വാങ്ങിയ ശേഷമാകും തെളിവെടുപ്പ് ഉള്‍പ്പടെയുള്ള കാര്യങ്ങളിലേക്ക് പോലീസ് കടക്കുക.