LiveTV

Live

Kerala

സി.പി.എം ക്വാറൻ്റീനിൽ; പാർട്ടി സംസ്ഥാന സെക്രട്ടറിയേറ്റ് അംഗങ്ങളും നിരീക്ഷണത്തില്‍

ധനമന്ത്രി ഡോ.തോമസ്​ ​ഐസക്കിന്​ കോവിഡ്​ സ്ഥിരീകരിച്ചതോടെ സി.പി.എം സംസ്ഥാന നേതൃത്വത്തിൽ നേതാക്കളൊട്ടാകെ നിരീക്ഷണത്തിലായി.

സി.പി.എം ക്വാറൻ്റീനിൽ;
പാർട്ടി സംസ്ഥാന സെക്രട്ടറിയേറ്റ് അംഗങ്ങളും നിരീക്ഷണത്തില്‍

ധനമന്ത്രി ഡോ.തോമസ്​ ​ഐസക്കിന്​ കോവിഡ്​ സ്ഥിരീകരിച്ചതോടെ സി.പി.എം സംസ്ഥാന നേതൃത്വത്തിൽ നേതാക്കളൊട്ടാകെ നിരീക്ഷണത്തിലായി. മുഖ്യമന്ത്രി പിണറായി വിജയനും സി.പി.എം സംസ്ഥാന സെക്രട്ടറി കോടിയേരി ബാലകൃഷ്​ണനും മുതിർന്ന പി.ബി അംഗം എസ്​. രാമചന്ദ്രൻ പിള്ളയുമടക്കം 18 മുതിർന്ന നേതാക്കളാണ്​ ക്വാറന്റീനിലായത്.

പിണറായി വിജയനും കോടിയേരി ബാലകൃഷ്​ണനും ഉൾപ്പെടെ 16 അംഗ സംസ്​ഥാന സെക്രട്ടറിയേറ്റാണ് സി.പി.എമ്മിന്​. പിണറായി വിജയൻ, കോടിയേരി ബാലകൃഷ്​ണൻ, പി. കരുണാകരൻ, പി.കെ. ശ്രീമതി, ഇ.പി. ജയരാജൻ, ടി.എം. തോമസ്​ ​ഐസക്, എളമരം കരീം, എ.കെ. ബാലൻ, എം.വി. ഗോവിന്ദൻ, ബേബി ജോൺ, ആനത്തലവട്ടം ആനന്ദൻ, ടി.പി. രാമകൃഷ്​ണൻ, എം.എം. മണി, കെ.​ജെ തോമസ്​, കെ.എൻ. ബാലഗോപാൽ, പി. രാജീവ്​ എന്നിവർ അടങ്ങുന്നതാണ്​ സെക്രട്ടേറിയറ്റ്. ഇതിൽ നേരത്തേ സ്വയം നിരീക്ഷണത്തിൽ പോയ മന്ത്രി എ.കെ. ബാലൻ മാത്രമാണ്​ സെക്ര​ട്ടേറിയറ്റില്‍ പങ്കെടുക്കാതിരുന്നത്.

സെക്ര​​ട്ടേറിയറ്റ്​​ അംഗങ്ങളെ കൂടാതെ നിലവിൽ തിരുവനന്തപുരത്തുള്ള പി.ബി അംഗം എസ്​.രാമചന്ദ്രൻപിള്ളയും കേ​​ന്ദ്ര കമ്മിറ്റി അംഗങ്ങളായ മന്ത്രി കെ.കെ. ശൈലജയും കെ. രാധാകൃഷ്​ണനും സെക്ര​ട്ടേറിയറ്റ്​ യോഗത്തിൽ പ​ങ്കെടുത്തിരു​ന്നു. മറ്റൊരു കേന്ദ്രകമ്മിറ്റി അംഗവും വനിത കമീഷൻ ചെയർപേഴ്​സണുമായ എം.സി. ജോസഫൈൻ പങ്കെടുത്തിരുന്നില്ല.

ധനമന്ത്രിക്ക്​ ഞാറയാഴ്​ച നടത്തിയ ആന്റിജന്‍ ടെസ്​റ്റിലാണ്​ കോവിഡ്​ കണ്ടെത്തിയത്​​. തുടർന്നാണ്​ ഇക്കഴിഞ്ഞ സംസ്ഥാന സെക്ര​ട്ടേറിയറ്റ്​ യോഗത്തിൽ അദ്ദേഹത്തോടൊപ്പം പങ്കെടുത്ത നേതാക്കളും എ.കെ.ജി സെന്ററില്‍ മന്ത്രിയോട്​ ഇട​പഴകിയ പ്രവർത്തകരും ജീവനക്കാരും ക്വാറന്റീനില്‍ പ്രവേശിച്ചത്​. സെപ്​റ്റംബർ നാലിനായിരുന്നു​ സംസ്​ഥാന സെക്ര​ട്ടറിയറ്റ്​ യോഗം അവസാനം ചേർന്നത്.

കോവിഡ്​ വ്യാപനം സംസ്ഥാനത്ത്​ അതിരൂക്ഷമാകവെ ഒരു രാഷ്​ട്രീയ പാർട്ടിയുടെ നേതൃനിര ഒട്ടാകെ ക്വാറന്റീനില്‍ പ്രവേശിക്കേണ്ടിവരുന്നത്​ ഇതാദ്യം. ​സംസ്​ഥാന രാഷ്​ട്രീയത്തിൽ നിർണായകമായ സംഭവ വികാസങ്ങൾ ഉരുത്തിരിയു​മ്പോഴാണ്​ ഭരണത്തിന്​ നേതൃത്വം നൽകുന്ന സി.പി.എമ്മിന്​ പുതിയ പ്രതിസന്ധി. ഇതോടെ സെപ്​റ്റംബർ 11ലെ അടുത്ത സംസ്ഥാന സെക്ര​ട്ടേറിയറ്റ്​ ചേരുന്നതും അനിശ്ചിതത്വത്തിലായി.