LiveTV

Live

Kerala

സ്വപ്ന സുരേഷ് കൊച്ചിയില്‍; സഹായം തേടി കസ്റ്റംസ്

അറസ്റ്റ് ചെയ്യാനുള്ള സഹായമാണ് കസ്റ്റംസ് അധികൃതര്‍‌ പൊലീസിനോട് ഔദ്യോഗികമായി ആവശ്യപ്പെട്ടത്

സ്വപ്ന സുരേഷ് കൊച്ചിയില്‍; സഹായം തേടി കസ്റ്റംസ്

തിരുവനന്തപുരം വിമാനത്താവള സ്വര്‍ണ്ണക്കടത്ത് കേസില്‍ കസ്റ്റംസ് തിരയുന്ന പ്രധാന കണ്ണി സ്വപ്ന സുരേഷ് കൊച്ചിയിലുണ്ടെന്ന് വിവരം. കസ്റ്റംസ് അധികൃതരാണ് സ്വപ്ന കൊച്ചിയിലുള്ള വിവരം സംബന്ധിച്ച് സൂചന നല്‍കിയത്. കേസില്‍ കൊച്ചി പൊലീസ് കമ്മീഷണറുടെ സഹായവും കസ്റ്റംസ് അധികൃതര്‍ ആവശ്യപ്പെട്ടിട്ടുണ്ട്. അറസ്റ്റ് ചെയ്യാനുള്ള സഹായമാണ് കസ്റ്റംസ് അധികൃതര്‍‌ പൊലീസിനോട് ഔദ്യോഗികമായി ആവശ്യപ്പെട്ടത്.

അതേസമയം സ്വര്‍ണക്കള്ളക്കടത്തുമായി ബന്ധപ്പെട്ട് എന്‍.ഐ.എയുടെ എഫ്ഐആര്‍ പുറത്തായി. നാല് പ്രതികളാണ് കേസിലുള്ളത്. ഒന്നാം പ്രതി കേസില്‍ അറസ്റ്റിലായ സരിത്, രണ്ടാം പ്രതി സ്വപ്ന സുരേഷ്, മൂന്നാം പ്രതി ഫൈസല്‍ പരീത്, നാലാംപ്രതി സ്വപ്നയുടെ ബിസിനസ് പങ്കാളിയായ സന്ദീപ് നായര്‍ എന്നിവരാണുള്ളത്. കേസിൽ നേരത്തെ എൻ.ഐ.എ യു.എ.പി.എ ചുമത്തിയിരുന്നു. യു.എ.പി.എ 16, 17, 18 വകുപ്പുകള്‍ ചുമത്തിയതായാണ് എന്‍.ഐ.എ ഹൈക്കോടതിയില്‍ അറിയിച്ചത്. കേസ് അന്വേഷിക്കാനുള്ള എൻ.ഐ.എ തീരുമാനം യു.എ.ഇയെ അറിയിച്ചു.

കൊച്ചി യൂണിറ്റിനായിരിക്കും അന്വേഷണ ചുമതല. തീവ്രവാദ ബന്ധവും സാമ്പത്തിക ഇടപാടുകളും അന്വേഷിക്കുമെന്ന് എൻ.ഐ.എ പറഞ്ഞു. സന്ദീപിനും സരിത്തിനും സ്വപ്നക്കും കുറ്റകൃത്യത്തില്‍ പങ്കുണ്ടെന്നും എൻ.ഐ.എ പറഞ്ഞു. കേസ് ഇനി 14ാം തിയ്യതി കോടതി പരിഗണിക്കും.