LiveTV

Live

Kerala

വിശ്വാസ് മേത്ത ചീഫ് സെക്രട്ടറി; ഉദ്യോഗസ്ഥ തലത്തില്‍ അഴിച്ചുപണി

തിരുവനന്തപുരം, ആലപ്പുഴ കലക്ടര്‍മാര്‍ക്കും മാറ്റമുണ്ട്.

വിശ്വാസ് മേത്ത ചീഫ് സെക്രട്ടറി; ഉദ്യോഗസ്ഥ തലത്തില്‍ അഴിച്ചുപണി

സംസ്ഥാനത്തെ ഉദ്യോഗസ്ഥ തലത്തില്‍ അഴിച്ചുപണി. ആഭ്യന്തര സെക്രട്ടറി വിശ്വാസ് മേത്ത സംസ്ഥാനത്തെ അടുത്ത ചീഫ് സെക്രട്ടറിയാകും. ടി.കെ ജോസാണ് പുതിയ ആഭ്യന്തര സെക്രട്ടറി. സര്‍ക്കാരുമായി ഇടഞ്ഞ വി വേണുവിനെ ആസൂത്രണ ബോര്‍ഡ് സെക്രട്ടറിയായി മാറ്റി നിയമിച്ചു. തിരുവനന്തപുരം, ആലപ്പുഴ കലക്ടര്‍മാര്‍ക്കും മാറ്റമുണ്ട്.

ടോം ജോസ് ഈ മാസം 31ന് വിരമിക്കുന്ന ഒഴിവിലേക്കാണ് നിലവില്‍ ആഭ്യന്തര സെക്രട്ടറിയും മുഖ്യമന്ത്രിയുമായി അടുപ്പം പുലര്‍ത്തുന്ന ഉദ്യോഗസ്ഥനുമായ വിശ്വാസ് മേത്തയെ ചീഫ് സെക്രട്ടറിയായി നിയമിച്ചത്. 1986 ബാച്ചിലെ ഐഎഎസ് ഉദ്യോഗസ്ഥനായ വിശ്വാസ് മേത്തയ്ക്ക് 2021 ഫെബ്രുവരി വരെയാണ് സര്‍വ്വീസുള്ളത്. വിശ്വാസ് മേത്തയെക്കാള്‍ മൂന്ന് മുതിര്‍ന്ന ഉദ്യോഗസ്ഥര്‍ ഉണ്ടായിരുന്നെങ്കിലും അവര്‍ കേന്ദ്രഡെപ്യൂട്ടേഷനില്‍ ആയതും വിശ്വാസ് മേത്തയ്ക്ക് അനുകൂല ഘടകമായി.

വിശ്വാസ് മേത്ത ഒഴിയുമ്പോള്‍ ടി.കെ ജോസ് ആയിരിക്കും പുതിയ ആഭ്യന്തര സെക്രട്ടറി. ബി ജയതിലകിനെ റവന്യൂ സെക്രട്ടറിയായും വി വേണുവിനെ ആസൂത്രണ ബോര്‍ഡ് സെക്രട്ടറിയായും നിയമിച്ചു. തിരുവനന്തപുരം കലക്ടര്‍ കെ ഗോപാലകൃഷ്ണനെ മലപ്പുറം കലക്ടറായി നിയമിച്ചു. നവ് ജ്യോത് ഖോസ തിരുവനന്തപുരം കലക്ടറാകും. ആലപ്പുഴ കലക്ടര്‍ എം അഞ്ജനയെ കോട്ടയം കലക്റായും നിയമിച്ചു. റിഷിത റോയ് ആണ് പുതിയ കാര്‍ഷികോത്പാദന കമ്മീഷണര്‍.