LiveTV

Live

Kerala

ലോക് ഡൌണ്‍ ലംഘിച്ച് കണ്ണൂരില്‍ നിരത്തിലിറങ്ങിയത് നൂറുകണക്കിന് വാഹനങ്ങള്‍

അനാവശ്യമായി പുറത്തിറങ്ങുന്നവരെ ക്വാറന്‍റെന്‍ ചെയ്യുമെന്നും വാഹനങ്ങള്‍ പിടിച്ചെടുക്കുമെന്നും ഐ.ജി അശോക് യാദവ് അറിയിച്ചു

ലോക് ഡൌണ്‍ ലംഘിച്ച് കണ്ണൂരില്‍ നിരത്തിലിറങ്ങിയത് നൂറുകണക്കിന് വാഹനങ്ങള്‍

കോവിഡ് വ്യാപനം മൂലം റെഡ്സോണില്‍പെട്ട കണ്ണൂരില്‍ കടുത്ത നിയമന്ത്രണങ്ങള്‍ക്കിടയിലും വ്യാപകമായി വാഹനങ്ങള്‍നിരത്തിലിറങ്ങി. കിലോമീറ്ററുകള്‍ നീണ്ട ഗതാഗതക്കുരുക്ക് മണിക്കൂറുകള്‍ നീണ്ട പരിശ്രമത്തിനൊടുവിലാണ് പൊലീസ് നിയന്ത്രിച്ചത്. അനാവശ്യമായി പുറത്തിറങ്ങുന്നവരെ ക്വാറന്‍റെന്‍ ചെയ്യുമെന്നും വാഹനങ്ങള്‍പിടിച്ചെടുക്കുമെന്നും ഐ.ജി അശോക് യാദവ് അറിയിച്ചു. മൂന്ന് എസ്.പിമാര്‍ക്ക് ജില്ലയുടെ വിവിധ മേഖലകളുടെ ചുമതല വിഭജിച്ച് നല്‍കിയിട്ടുണ്ട്. ജില്ലയില്‍ കൊവിഡ് 19 കേസുകള്‍വര്‍ദ്ധിക്കുന്ന സാഹചര്യത്തിലാണ് നിയന്ത്രണങ്ങള്‍ കടുപ്പിക്കാന്‍ പൊലീസും ജില്ലാഭരണകൂടവും തീരുമാനിച്ചത്.

ഇതനുസരിച്ച് രാവിലെ മുതല്‍ അതിര്‍ത്തി ചെക്ക്പോസ്റ്റുകളിലും ജില്ലയിലെ പ്രധാന റോഡുകളിലും പോലീസ് പരിശോധന ശക്തമാക്കിയിരുന്നു. ഒപ്പം ഗ്രാമീണ മേഖലകളിലും ഇടവഴികളും ബാരിക്കേഡ് കെട്ടി അടച്ചു. എന്നാല്‍ ഒമ്പതുമണിയോടെ വലിയതോതില്‍ വാഹനങ്ങള്‍ നിരത്തിലിറങ്ങുകയായിരുന്നു. ഇതോടെ കണ്ണൂര്‍നഗരത്തില്‍ കിലോമീറ്ററുകളോളും നീണ്ട ട്രാഫിക് ബ്ലോക്ക് രൂപപ്പെട്ടു. തുടര്‍ന്ന് മണിക്കൂറുകള്‍ നീണ്ട ശ്രമത്തിനൊടുവിലാണ് പോലീസ് ഗതാഗതം പുനസ്ഥാപിച്ചത്.

അനാവശ്യമായി പുറത്തിറങ്ങുന്നവരെ ക്വാറന്‍റെന്‍ ചെയ്യുമെന്നും വാഹനങ്ങള്‍പിടിച്ചെടുക്കുമെന്നും ഐ.ജി അശോക് യാദവ് പറഞ്ഞു. എന്നാല്‍ ട്രിപ്പിള്‍ ലോക് ഡൌണിലേക്ക് പോകണ്ട സാഹചര്യം നിലവിലില്ല. ഇതിനിടെ നിയന്ത്രണങ്ങള്‍ ശക്തമാക്കുന്നതിന്‍റെ ഭാഗമായി ജില്ലയെ മൂന്ന് സോണുകളായി തിരിച്ച് മൂന്ന് എസ്.പിമാര്‍ക്ക് ചുമതല നല്‍കി. കണ്ണൂരില്‍ എസ്.പി യതീശ്ചന്ദ്രക്കും തളിപ്പറമ്പില്‍ നവനീത് ശര്‍മ്മക്കും, തലശേരി, ഇരിട്ടി സോണുകളുടെ ചുമതല അരവിന്ദ് സുകുമാറിനുമാണ് നല്‍കിയിട്ടുളളത്