LiveTV

Live

Kerala

ലോക്‌ഡൗണ്‍ തീര്‍ന്നാലും സ്വകാര്യ ബസുകള്‍ നിരത്തിലിറങ്ങില്ല 

സ്റ്റോപ്പേജ് ലഭിച്ചാല്‍ നികുതിയിളവിനു പുറമേ ഇന്‍ഷൂറന്‍സ് അടക്കുന്നതിലുള്ള സാവകാശവും ലഭിക്കുമെന്നതിനാലാണ് ഉടമകള്‍ കടുത്ത തീരുമാനത്തിലേക്ക് നീങ്ങിയത്

 ലോക്‌ഡൗണ്‍ തീര്‍ന്നാലും സ്വകാര്യ ബസുകള്‍ നിരത്തിലിറങ്ങില്ല 

സര്‍വീസ് സ്റ്റോപ്പേജിന് അപേക്ഷ കൊടുത്തതിനാല്‍ ലോക്ക് ഡൌണ്‍ അവസാനിച്ചാലും ഭൂരിഭാഗം സ്വകാര്യ ബസുകളും നിരത്തിലിറങ്ങില്ല. രണ്ടു മാസമെങ്കിലും സ്റ്റോപ്പേജ് നീളുമെന്നതിനാല്‍ ജൂണ്‍ മാസമായാലേ ഇത്തരം ബസുകള്‍ക്ക് സര്‍വീസുകള്‍ പുനരാരംഭിക്കാനാവൂ. സ്റ്റോപ്പേജ് ലഭിച്ചാല്‍ നികുതിയിളവിനു പുറമേ ഇന്‍ഷൂറന്‍സ് അടക്കുന്നതിലുള്ള സാവകാശവും ലഭിക്കുമെന്നതിനാലാണ് ഉടമകള്‍ കടുത്ത തീരുമാനത്തിലേക്ക് നീങ്ങിയത്. ലോക്ക് ഡൌണ്‍ തുടങ്ങുന്നതിനും ആഴ്ചകള്‍ക്ക് മുമ്പേ യാത്രക്കാരില്ലാത്തതിനാല്‍ സംസ്ഥാനത്തെ ബസുകള്‍ ഭൂരിഭാഗവും ഓട്ടം നിര്‍ത്തിയിരുന്നു.

പക്ഷേ മാര്‍ച്ച് മാസത്തെ നികുതിയില്‍ ഇളവ് ലഭിച്ചിരുന്നില്ല. റോഡ് നികുതിയിനത്തില്‍ മൂന്ന് മാസം കൂടുമ്പോള്‍ മുപ്പത്തിനാലായിരത്തോളം രൂപ ബസുടകമള്‍ അടക്കണം. ഇന്‍ഷൂറന്‍സ് ഇതിനു പുറമേ. ഇതു മൂലമാണ് സ്വകാര്യ ബസുകള്‍ ഈ മാസം ഒന്നു മുതല്‍ സ്റ്റോപ്പേജിനായി അപേക്ഷിച്ചിരിക്കുന്നത്. ഇന്‍ഷൂറന്‍സ് അടക്കുന്നതിന് സാവകാശം ലഭിക്കണമെങ്കില്‍ ചുരുങ്ങിയത് രണ്ടുമാസമെങ്കിലും സ്റ്റോപ്പേജ് എടുത്തിരിക്കണം.

ഇതു മൂലം ജൂണ്‍ ആദ്യവാരമാകുമ്പോഴേ രണ്ടുമാസത്തെ കാലാവധി കഴിയൂ. ഒരു വര്‍ഷത്തേക്കാണ് ബസുടമകള്‍ സ്റ്റോപ്പേജിനായി അപേക്ഷിച്ചിരിക്കുന്നത്. ഏതു സമയത്തു വേണമെങ്കിലും മോട്ടോര്‍വാഹനവകുപ്പിന് അപേക്ഷ നല്‍കി സ്റ്റോപ്പേജ് അവസാനിപ്പിക്കാന്‍ സാധിക്കും. ബസുകളിലെ യാത്രക്കാരുടെ എണ്ണത്തില്‍ സര്‍ക്കാര്‍ കൂടുതല്‍ നിയന്ത്രണങ്ങള്‍ കൊണ്ടു വന്നാല്‍ സ്റ്റോപ്പേജ് കാലാവധി നീട്ടാനാണ് തീരുമാനം.