LiveTV

Live

Kerala

‘ആ ചിട്ടിക്കമ്പനിയല്ല കേരളത്തെ താങ്ങി നിര്‍ത്തുന്നത്’; മുത്തൂറ്റിനെതിരെ വി.എസ്

മിനിമം വേതന നിയമം തങ്ങള്‍ക്ക് ബാധകമല്ലെന്ന തരത്തിലാണ് മുത്തൂറ്റിന്റെ പ്രതികരണം

‘ആ ചിട്ടിക്കമ്പനിയല്ല കേരളത്തെ താങ്ങി നിര്‍ത്തുന്നത്’; മുത്തൂറ്റിനെതിരെ വി.എസ്

ശമ്പള വർധന നടപ്പാക്കാത്തതിൽ പ്രതിഷേധിച്ച് ഒരു മാസക്കാലമായി തൊഴിലാളി സമരം നടക്കുന്ന മുത്തൂറ്റ് മാനേജ്മെന്റിനെതിരെ രൂക്ഷ വിമർശനവുമായി വി.എസ് അച്യുതാന്ദൻ. അധികം കളിച്ചാൽ കട പൂട്ടി കേരളത്തിന് പുറത്തേക്ക് പോകുമെന്ന മുത്തൂറ്റിന്റെ ഭീഷണിക്ക് മുന്നിൽ സർക്കാർ പേടിച്ച് കാൽക്കൽ വീഴുമെന്ന ധാരണ വേണ്ടെന്ന് വി.എസ് ഫേസ്ബുക്കിൽ കുറിച്ചു.

മിനിമം വേതന നിയമം തങ്ങള്‍ക്ക് ബാധകമല്ലെന്ന തരത്തിലാണ് ഒരു ചിട്ടിക്കമ്പനിക്കാരന്റെ പ്രതികരണമെന്ന് വി.എസ് പറഞ്ഞു. സമരം പരിഹരിക്കാന്‍ നേരത്തെ സര്‍ക്കാര്‍ വിളിച്ചുകൂട്ടിയ ചര്‍ച്ചകള്‍ പരാജയപ്പെട്ടിരുന്നു. യൂണിയൻ അനുവദിക്കില്ലെന്നും, മിനിമം വേജസ് ആക്ട് നടപ്പാക്കില്ലെന്നുമുള്ള മുത്തൂറ്റിന്റെ ധാർഷ്ട്യത്തിന് മറുപടി നൽകേണ്ടതുണ്ട്. ഇത്തരക്കാർ ഉള്ളത് കൊണ്ടാണ് കേരളത്തിൽ വികസനം നടക്കുന്നതെന്നാണ് ഇവരെല്ലാം വിചാരിച്ചിരിക്കുന്നതെന്നും വി.എസ് പറഞ്ഞു.

മുത്തൂറ്റിലുള്ളത് ജനങ്ങളുടെ പണമാണ്. എന്നിരിക്കെ രാജ്യത്തെ നിയമം പാലിക്കാൻ കൂട്ടാക്കാത്ത സ്ഥാനപത്തെ സർക്കാർ ബഹിഷ്ക്കരിക്കണമെന്നും, ഇടപാടുകളെ കുറിച്ച് പ്രത്യേക സംഘത്തെ കൊണ്ട് അന്വേഷിപ്പിക്കണമെന്നും അച്യുതാനന്ദൻ ആവശ്യപ്പെട്ടു.

ഫേസ്ബുക്ക് പോസ്റ്റിന്റ പൂര്‍ണ്ണ രൂപം:

ഒരു ചിട്ടിക്കമ്പനിക്കാരന്‍ തന്‍റെ സ്ഥാപനത്തില്‍ തൊഴിലാളി യൂണിയനുകള്‍ അനുവദിക്കില്ലെന്നും മിനിമം വേതന നിയമം തനിക്ക് ബാധകമല്ലെന്നും പ്രഖ്യാപിച്ചിരിക്കുന്നു. കളി തന്നോട് വേണ്ടെന്നും, കളിച്ചാല്‍ കട പൂട്ടി കേരളത്തിനു പുറത്തേക്ക് പോകുമെന്നുമാണ് ഭീഷണി. ഈ ഭീഷണി കേട്ടാല്‍ കേരള സര്‍ക്കാര്‍ ഞെട്ടി വിറയ്ക്കുമെന്നും, കാലില്‍ വീഴുമെന്നുമാണ് അയാളുടെ വിചാരം എന്ന് തോന്നുന്നു.

മുത്തൂറ്റിന്‍റെ ഭീഷണി കേരള ജനതയോടും തൊഴിലാളി വര്‍ഗത്തോടുമാണ്. നിയമവും നീതിപീഠവും സംസ്ഥാന സര്‍ക്കാര്‍ നടത്തുന്ന അനുരഞ്ജന ചര്‍ച്ചകളും എന്തിന്, ഇന്ത്യന്‍ പ്രധാനമന്ത്രി പോലും തനിക്കു മുന്നില്‍ ഒന്നുമല്ല എന്ന ഈ ധാര്‍ഷ്ട്യത്തെ കയറൂരി വിട്ടുകൂട. ഈ ബ്ലേഡ് കമ്പനിയുടെ ഊറ്റ് അവസാനിപ്പിച്ചാല്‍ കേരളം ഒലിച്ചു പോവുകയൊന്നുമില്ല. ഇത്തരം ഊറ്റ് കമ്പനികള്‍ ഉള്ളതുകൊണ്ടാണ് കേരളത്തില്‍ വികസനം നടക്കുന്നതെന്ന ധാരണപ്പിശക് അവസാനിപ്പിക്കണം. മിനിമം വേജസ് ആക്റ്റ് നടപ്പിലാക്കണം. യൂണിയന്‍ അനുവദിക്കില്ല എന്ന നിലപാടിനെ ശക്തമായി നേരിടണം.

കേരളത്തിലെ ജനങ്ങളുടെ പണമാണ് ഈ സ്ഥാപനത്തില്‍ നിക്ഷേപിച്ചിരിക്കുന്നത്. ഈ സ്ഥാപനം പൂട്ടിയാല്‍ കേരളത്തില്‍ത്തന്നെയുള്ള മറ്റൊരു സ്ഥാപനത്തില്‍ ജനങ്ങള്‍ ആ പണം നിക്ഷേപിച്ചുകൊള്ളും. അല്ലെങ്കില്‍ ആ പണമെടുത്ത് കേരളത്തില്‍ മറ്റെന്തെങ്കിലും സംരംഭം തുടങ്ങും. അല്ലാതെ മുത്തൂറ്റ് ബാങ്കിനു പിന്നാലെ അവരും കേരളത്തില്‍നിന്ന് അന്യ സംസ്ഥാനങ്ങളിലേക്ക് പോവില്ല.

കേരളത്തിലെ പണമിടപാട് അവസാനിപ്പിച്ചാലും, മുത്തൂറ്റിനെ അങ്ങനെ നാടുവിടാന്‍ അനുവദിച്ചുകൂട. രാജ്യത്തെ നിയമങ്ങളൊന്നും പാലിക്കാന്‍ തയ്യാറാവാത്ത ഈ സ്ഥാപനത്തെ സര്‍ക്കാര്‍ എല്ലാ തരത്തിലും ബഹിഷ്കരിക്കണം. സ്വര്‍ണ നിക്ഷേപങ്ങളുടെയും പണയത്തിന്‍റെയും കാര്യത്തില്‍ ഉള്‍പ്പെടെ ഈ സ്ഥാപനത്തിന്‍റെ മുഴുവന്‍ പ്രവര്‍ത്തനങ്ങളും സാമ്പത്തിക വിദഗ്ധരടങ്ങുന്ന ഒരു പ്രത്യേക സംഘത്തെക്കൊണ്ട് അന്വേഷിപ്പിച്ച് ശക്തമായ നിയമനടപടി സ്വീകരിക്കുകയും വേണം.