LiveTV

Live

Kerala

വയനാട് സ്വദേശിനിയെ തീവണ്ടി യാത്രക്കിടെ കാണാതായ സംഭവത്തില്‍ അന്വേഷണം തുടരുന്നു

പെണ്‍കുട്ടിയുടെ സുഹൃത്തിന്‍റെ മൊഴി പൊലീസ് രേഖപ്പെടുത്തി.

വയനാട് സ്വദേശിനിയെ തീവണ്ടി യാത്രക്കിടെ കാണാതായ സംഭവത്തില്‍ അന്വേഷണം തുടരുന്നു

തീവണ്ടി യാത്രക്കിടെ കാണാതായ വയനാട് മീനങ്ങാടി സ്വദേശിയായ പെണ്‍കുട്ടി അങ്കമാലി വരെ സൃഹൃത്തിനൊപ്പം യാത്ര ചെയ്തിരുന്നുവെന്ന് പൊലീസിന്‍റെ സ്ഥിരീകരണം. സുഹൃത്തുക്കളുടെ ഫോണ്‍കോളുകള്‍ പരിശോധിച്ചാണ് പൊലീസിന്‍റെ കണ്ടെത്തല്‍. പെണ്‍കുട്ടിയുടെ സുഹൃത്തിന്‍റെ മൊഴിയും പൊലീസ് രേഖപ്പെടുത്തി.

മൂന്ന് ദിവസം മുന്‍പാണ് എറണാകുളത്തെ അമ്മവീട്ടിലേക്ക് പെണ്‍കുട്ടി പോയത്. ഈ യാത്രയില്‍ കോഴിക്കോട് മുതല്‍ അങ്കമാലി വരെ സുഹൃത്ത് ഒപ്പമുണ്ടായിരുന്നതായി പൊലീസ് സ്ഥിരീകരിച്ചു. സുഹൃത്ത് അങ്കമാലിയില്‍ ഇറങ്ങി. യാത്രക്കിടയില്‍ പെൺകുട്ടിയുമായി പ്രശ്നങ്ങളൊന്നും ഉണ്ടായിട്ടില്ലെന്നും പോലീസിന് ബോധ്യമായിട്ടുണ്ട്. മൊബൈൽ ഫോൺ രേഖകൾ പരിശോധിച്ചതിൽ നിന്ന് സുഹൃത്തിൻറെ മൊഴി സത്യമാണെന്നാണ് പൊലീസ് നിഗമനം.

യാത്ര പുറപ്പെട്ട ശേഷം കാണാതായ പെണ്‍കുട്ടിയെ കുറിച്ച് മൂന്ന് ദിവസം കഴിഞ്ഞിട്ടും പോലീസിന് കാര്യമായ വിവരം ലഭിച്ചിട്ടില്ല. ഇതിനകം നിരവധി സി.സി.ടി.വി ദൃശ്യങ്ങൾ പരിശോധിച്ചെങ്കിലും ഒരു സൂചനയും ലഭിച്ചിട്ടില്ല. യാത്ര പുറപ്പെട്ട ശേഷം പെൺകുട്ടിയെ കുറിച്ച് വിവരം ഇല്ലെന്ന് കാണിച്ച് രക്ഷിതാക്കള്‍ മീനങ്ങാടി പോലീസിൽ പരാതി നൽകിയിരുന്നു. സംഭവത്തിൽ ചോറ്റാനിക്കര പോലീസ് അന്വേഷണം ആരംഭിച്ചിട്ടുണ്ട്. ഇതിനിടെ കോഴിക്കോട് കെ.എസ്.ആർ.ടി.സി ബസ് സ്റ്റാൻഡിൽ വച്ച് പെൺകുട്ടിയെ കണ്ടതായി ഒരു സഹപാഠി കുടുംബത്തെ അറിയിച്ചു. ബസ് സ്റ്റാന്റിലെ സി.സി.ടി.വി ദൃശ്യങ്ങള്‍ ബന്ധുക്കളുടെ സാന്നിധ്യത്തില്‍ ഉടന്‍ പരിശോധിക്കും.