LiveTV

Live

Kerala

ഗോത്രഭാഷാ നിഘണ്ടുവുമായി ഒരു വയനാട്ടുകാരന്‍

ഗോത്രഭാഷാ നിഘണ്ടുവുമായി ഒരു വയനാട്ടുകാരന്‍
Summary
മലയാള പദങ്ങള്‍ക്ക് ചേരുന്ന കുറുമ, അടിയ, പണിയ, കാട്ടുനായ്ക്ക, ഊരാളി തുടങ്ങിയ ഭാഷകളിലുള്ള വാക്കുകള്‍ ചേര്‍ത്താണ് നിഘണ്ടുവിന്റെ നിര്‍മാണം...

ചെറിയ ക്ലാസുകള്‍ മുതല്‍ പലതരം നിഘണ്ടുകള്‍ കണ്ടാണ് ഓരോ വിദ്യാര്‍ഥിയും വളരുന്നത്. എന്നാല്‍ ഗോത്രഭാഷയ്ക്കായി ഒരു നിഘണ്ടു എന്ന സങ്കല്‍പം തന്നെ നമുക്കില്ല. ഇല്ലാതാകുന്ന ഭാഷയെ തിരിച്ചുപിടിക്കാന്‍ ആദിവാസി ഭാഷാ നിഘണ്ടു നിര്‍മിക്കുന്ന ഒരു വയനാട്ടുകാരനെ പരിചയപ്പെടാം ഇനി.

മറവിയിലേക്ക് കുതിക്കുന്ന ഒരു ഭാഷയെ തിരിച്ചുപിടിക്കാനുള്ള ശ്രമത്തിലാണ് വയനാട് പുല്‍പള്ളി വേലിയമ്പം കുറുമ കോളനിയിലെ കണ്ടാമല രാമചന്ദ്രന്‍. വയനാട്ടിലെ അഞ്ച് ആദിവാസി വിഭാഗക്കാര്‍ വാമൊഴിയായി ഉപയോഗിക്കുന്ന വാക്കുകളുടെ അര്‍ഥം മലയാളത്തില്‍ പ്രസിദ്ധീകരിക്കുകയാണ് ലക്ഷ്യം. ആറായിരത്തിലധികം വാക്കുകളാണ് രാമചന്ദ്രന്‍ നിഘണ്ടുവിലുള്ളത്. ആദിവാസി ഗോത്രഭാഷാ നിഘണ്ടുവിന്റെ പണി തുടങ്ങിയിട്ട് പത്ത് വര്‍ഷം പിന്നിട്ടിരിക്കുന്നു. ആദിവാസി ഭാഷകളില്‍നിന്ന് പുതുതലമുറ അകലുമ്പോള്‍ അവ നശിച്ചുപോകരുതെന്ന ആഗ്രഹമാണ് ഈ ദൌത്യത്തിന് രാമചന്ദ്രനെ പ്രേരിപ്പിച്ചത്.

മലയാള പദങ്ങള്‍ക്ക് ചേരുന്ന കുറുമ, അടിയ, പണിയ, കാട്ടുനായ്ക്ക, ഊരാളി തുടങ്ങിയ ഭാഷകളിലുള്ള വാക്കുകള്‍ ചേര്‍ത്താണ് നിഘണ്ടുവിന്റെ നിര്‍മാണം. വാക്കുകളും അര്‍ഥവും തെരഞ്ഞ് രാമചന്ദ്രന്‍ എത്താത്ത ആദിവാസി കോളനികള്‍ കേരളത്തില്‍ ചുരുക്കമായിരിക്കും. നൂറുകണക്കിന് കടലാസുകളിലായി എഴുതിത്തയാറാക്കിയിരിക്കുന്ന നിഘണ്ടുവിന്റെ ജോലി അവസാനഘട്ടത്തിലാണ്. രാമചന്ദ്രന്‍ ഒരുക്കുന്ന ഗോത്ര ഭാഷാ നിഘണ്ടു ഭാഷാ ഇന്‍സ്റ്റിറ്റിയൂട്ട് പ്രസിദ്ധീകരിക്കും.