LiveTV

Live

International

2021ന് മുമ്പ് കോവിഡ് വാക്‌സിൻ പ്രതീക്ഷിക്കരുത്: ലോകാരോ​ഗ്യ സംഘടന

നിർണായകഘട്ടത്തിലാണ് പരീക്ഷണമെന്നും ലോകാരോ​ഗ്യ സംഘടന

2021ന് മുമ്പ് കോവിഡ് വാക്‌സിൻ പ്രതീക്ഷിക്കരുത്: ലോകാരോ​ഗ്യ സംഘടന

2021ന് മുമ്പ് കോവിഡ് വാക്‌സിൻ ഉപയോ​ഗിക്കാനാവുമെന്ന് പ്രതീക്ഷിക്കരുതെന്ന് ലോകാരോഗ്യ സംഘടന. നിലവിൽ വാക്‌സിൻ പരീക്ഷണം നല്ല രീതിയിൽ പുരോഗമിക്കുന്നുണ്ട്. നിർണായകഘട്ടത്തിലാണ് പരീക്ഷണമെന്നും ലോകാരോ​ഗ്യ സംഘടന അറിയിച്ചു.

വിവേചനമില്ലാതെ തുല്യമായി വാക്‌സിൻ ലഭ്യമാക്കുകയാണ് ലക്ഷ്യമെന്ന് ലോകാരോഗ്യ സംഘടനാ എമർജൻസി പ്രോഗ്രാം തലവൻ മൈക്ക് റയാൻ പറഞ്ഞു. അതേസമയം തന്നെ കോവിഡ് വ്യാപനം തടയുക എന്നതിനാണ് മുഖ്യ പരി​ഗണന നൽകേണ്ടത്. ആ​ഗോളതലത്തിൽ പ്രതിദിന വ്യാപന നിരക്ക് റെക്കോർഡിലെത്തുകയാണെന്നും മൈക്ക് റയാൻ ഓർമിപ്പിച്ചു.

പല രാജ്യങ്ങളും വാക്‌സിൻ പരീക്ഷണത്തിന്റെ മൂന്നാം ഘട്ടത്തിലാണ്. ഇതുവരെ ഒരു ഘട്ടത്തിലും പരാജയപ്പെട്ടിട്ടില്ല. അടുത്ത വർഷം ആദ്യ മാസങ്ങളിൽ വാക്സിൻ ജനങ്ങളിലെത്തുമെന്നാണ് പ്രതീക്ഷിക്കുന്നത്. വാക്സിൻ സമ്പന്നർക്കോ ദരിദ്രർക്കോ മാത്രമായിട്ടുള്ളതല്ല. എല്ലാവർക്കുമുള്ളതാണ്. ആ​ഗോള തലത്തിൽ നല്ലതിന് വേണ്ടിയാണെന്നും റയാൻ പറഞ്ഞു. റഷ്യ, അമേരിക്ക, ഇന്ത്യ തുടങ്ങി നിരവധി രാജ്യങ്ങളുടെ കോവിഡ് വാക്സിൻ പരീക്ഷണം പുരോ​ഗമിക്കുന്നതിനിടെയാണ് ലോകാരോ​ഗ്യ സംഘടനയുടെ പ്രതികരണം.

സ്കൂളുകൾ തുറക്കും മുൻപ് കോവിഡ് സമൂഹ വ്യാപനം നിയന്ത്രണവിധേയമാണെന്ന് ഉറപ്പ് വരുത്തണം. അമേരിക്കയിൽ കോവിഡ് വ്യാപനം റെക്കോർഡിൽ നിൽക്കുമ്പോൾ സ്കൂളുകൾ തുറക്കാൻ നീക്കം നടക്കുന്നുണ്ട്. ഇതിനിടെയാണ് ലോകാരോ​ഗ്യ സംഘടനയുടെ പ്രതികരണം.