LiveTV

Live

International

കുടിയേറ്റത്തില്‍ നിലപാട് കടുപ്പിച്ച് ട്രംപ്; മൂന്ന് രാജ്യങ്ങള്‍ക്കുള്ള സഹായം വെട്ടിക്കുറച്ചു

അനധികൃത കുടിയേറ്റം തടയുന്നതില്‍ പരാജയപ്പെട്ടതിനെ തുടര്‍ന്നാണ് ഈ കടുത്ത നടപടി.

കുടിയേറ്റത്തില്‍ നിലപാട് കടുപ്പിച്ച് ട്രംപ്; മൂന്ന് രാജ്യങ്ങള്‍ക്കുള്ള സഹായം വെട്ടിക്കുറച്ചു

മൂന്ന് മധ്യ അമേരിക്കന്‍ രാഷ്ട്രങ്ങള്‍ക്കുള്ള സഹായം വെട്ടിക്കുറച്ച് അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. അനധികൃത കുടിയേറ്റം തടയുന്നതില്‍ പരാജയപ്പെട്ടതിനെ തുടര്‍ന്നാണ് ഈ കടുത്ത നടപടി. ഗ്വോട്ടിമാല, ഹോണ്ടുറാസ്, എല്‍ സാല്‍വഡോര്‍ എന്നീ രാജ്യങ്ങള്‍ക്കുള്ള സഹായങ്ങളാണ് വെട്ടിച്ചുരുക്കിയത്.

കടുത്ത ദാരിദ്ര്യവും മനുഷ്യാവകാശ ലംഘനങ്ങളും കാരണം നിരവധിയാളുകളാണ് ഹോണ്ടുറാസ്, ഗ്വാട്ടിമാല തുടങ്ങിയ മധ്യ അമേരിക്കന്‍ രാജ്യങ്ങളില്‍ നിന്ന് യുഎസിലേക്ക് കുടിയേറുന്നത്. ഈ രാജ്യങ്ങളില്‍ നിന്നുള്ള അയ്യായിരത്തിലധികം ആളുകളാണ് മെക്സിക്കോയില്‍ തമ്പടിച്ചിരിക്കുന്നത്. മെക്സിക്കന്‍ അതിര്‍ത്തി കടന്ന് അമേരിക്കയിലേക്ക് കടക്കാനാണ് ഇവര്‍ ശ്രമിക്കുന്നത്. ഓരോ വര്‍ഷവും ദശലക്ഷക്കണക്കിന് ഡോളറിന്റെ സഹായമാണ് അമേരിക്ക ഈ രാഷ്ട്രങ്ങള്‍ക്ക് നല്‍കുന്നത്.

2016ല്‍ ഗ്വാട്ടിമാലക്ക് 131.2 മില്യന്‍ ഡോളറും ഹോണ്ടുറാസിന് 98.3 മില്യന്‍ ഡോളറും എല്‍ സാല്‍വഡോറിന് 67.9 മില്യന്‍ ഡോളറുമാണ് നല്‍കിയത്. എന്നാല്‍ 2017ല്‍ ഗ്വാട്ടിമാലക്ക് 69.4ഉം ഹോണ്ടുറാസിന് 65.8ഉം എല്‍ സാല്‍വഡോറിന് 45.7 മില്യന്‍ ഡോളറും നല്‍കിയിരുന്നു. 2016നെ അപേക്ഷിച്ച് 2017ല്‍ 40 ശതമാനം വെട്ടിക്കുറിച്ചാണ് സാമ്പത്തിക സഹായം നല്‍കിയത്. ഇനി എത്ര കുറയ്ക്കും എന്നതിന് കുറിച്ച് ട്രംപ് ഒന്നും പറഞ്ഞിട്ടില്ല.

അനധികൃത കുടിയേറ്റം തടയുന്നതിന് മെക്സിക്കോയ്ക്ക് ഒന്നും ചെയ്യാന്‍ സാധിക്കുന്നില്ലെന്ന് ട്രംപ് കുറ്റപ്പെടുത്തി. അധികാരത്തില്‍ കയറിയതിന് ശേഷം ട്രംപ് കുടിയേറ്റത്തിനെതിരെ കടുത്ത നടപടികളാണ് സ്വീകരിക്കുന്നത്.