LiveTV

Live

International

ഹൂത്തികളുടെ മിസൈൽ ആക്രമണം ആസൂത്രിത നീക്കമെന്ന്​ അമേരിക്ക

ഹൂത്തികളുടെ മിസൈൽ ആക്രമണം ആസൂത്രിത നീക്കമെന്ന്​ അമേരിക്ക
Summary
മൂന്നു വർഷമായി തുടരുന്ന യെമൻ യുദ്ധം അവസാനിപ്പിച്ച്​ രാജ്യത്ത്​ സമാധാനം ഉറപ്പാക്കാനുള്ള യു.എൻ നീക്കം അട്ടിമറിക്കുകയാണ്​ ഇറാന്‍റെയും ഹൂത്തികളുടെയും ലക്ഷ്യമെന്ന്​ ​വൈറ്റ്​ ഹൗസ്​ കുറ്റപ്പെടുത്തി.

സൗദിക്കു നേരെയുള്ള ഹൂത്തികളുടെ മിസൈൽ ആക്രമണം യെമൻ പ്രശ്​നപരിഹാര നീക്കങ്ങൾ അട്ടിമറിക്കാനുള്ള ഇറാ​ന്‍റെയും ഹൂത്തികളുടെയും ആസൂത്രിത നീക്കമാണെന്ന്​ അമേരിക്ക. യു.എൻ മേൽനോട്ടത്തിൽ പ്രഖ്യാപിച്ച വെടിനിർത്തൽ കരാർ ലംഘിക്കാനുള്ള നീക്കത്തെ ഗൗരവത്തിൽ കാണണമെന്നും അമേരിക്ക മുന്നറിയിപ്പ്​ നൽകി. സൗദിക്കു നേരെ ശനിയാഴ്​ച വീണ്ടും ഹൂത്തികൾ മിസൈൽ തൊടുത്തുവിട്ട സാഹചര്യത്തിലാണ്​ യു.എസ്​ പ്രതികരണം.

മൂന്നു വർഷമായി തുടരുന്ന യെമൻ യുദ്ധം അവസാനിപ്പിച്ച്​ രാജ്യത്ത്​ സമാധാനം ഉറപ്പാക്കാനുള്ള യു.എൻ നീക്കം അട്ടിമറിക്കുകയാണ്​ ഇറാന്‍റെയും ഹൂത്തികളുടെയും ലക്ഷ്യമെന്ന്​ ​വൈറ്റ്​ ഹൗസ്​ കുറ്റപ്പെടുത്തി. ഹൂത്തികൾക്ക്​ മിസൈലുകളും ആയുധങ്ങളും എത്തിച്ചു കൊടുക്കുന്ന ഇറാൻ യെമനിൽ സമാധാനം കൊണ്ടുവരുന്നതിന്​ വലിയ ഭീഷണി ഉയർത്തുന്നതായും അമേരിക്ക ആരോപിച്ചു. തുടർച്ചയായ മിസൈൽ ആക്രമണങ്ങളെ പ്രതിരോധിക്കുന്നതിൽ സൗദി വിജയിച്ചു.

എന്നാൽ തുടർച്ചയായ ദിവസങ്ങളിൽ മിസൈലുകൾ അയച്ച്​ യെമൻ യുദ്ധത്തിന്​ കൂടുതൽ വ്യാപ്​തി നൽകാനുള്ള നീക്കമാണ്​ ഇറാനും ഹൂത്തികളും സ്വീകരിക്കുന്നതെന്നാണ്​ അമേരിക്കയുടെ ആരോപണം. തെഹ്​റാൻ തന്നെയാണ്​ ഹൂത്തികൾക്ക്​ ആയുധങ്ങൾ കൈമാറുന്നതെന്ന്​ അമേരിക്കക്ക്​ പുറമെ യു.എന്നും കുറ്റപ്പെടുത്തിയിരുന്നു. എന്നാൽ ആരോപണം ഇറാൻ നിഷേധിച്ചു. ഹൂത്തികൾ ഉൾപ്പെടെ മറ്റു രാജ്യങ്ങളിലെ ഒരു കൂട്ടർക്കും ആയുധങ്ങൾ കൈമാറിയില്ലെന്നാണ്​ ഇറാ​ന്‍റെ വിശദീകരണം.

അതേ സമയം പ്രശ്​നത്തിൽ ഉറച്ച നിലപാട്​ സ്വീകരിക്കാൻ അമേരിക്ക ഉൾപ്പെടെയുള്ള രാജ്യങ്ങൾ യു.എന്നിനു മേൽ സമ്മർദം തുടരുകയാണ്​. യെമനിലെത്തിയ യു.എൻ പ്രത്യേക പ്രതിനിധി ഹൂത്തികളുമായി ചർച്ച നടത്തി. വരും ദിവസങ്ങളിൽ യെമൻ പ്രശ്​നത്തിൽ കുറേക്കൂടി കടുത്ത നടപടി സ്വീകരിക്കാനുള്ള തയ്യാറെടുപ്പിലാണ്​ ​ഐക്യരാഷ്​ട്ര സംഘടന.