LiveTV

Live

Gulf

പകർച്ചവ്യാധിചട്ടങ്ങളിൽ ഭേദഗതി വരുത്തി കുവൈത്ത്: നിയമലംഘകർക്ക് പിഴയും തടവും

ബോധപൂർവം രോഗവിവരം മറച്ചുവെച്ചാൽ പിഴ അരലക്ഷം ദിനാർ വരെ

പകർച്ചവ്യാധിചട്ടങ്ങളിൽ ഭേദഗതി വരുത്തി കുവൈത്ത്: നിയമലംഘകർക്ക് പിഴയും തടവും

കോവിഡ് നയന്റീൻ പ്രതിരോധ നടപടികളുമായി സഹകരിക്കാത്തവർക്കു കനത്ത ശിക്ഷ ഉറപ്പാക്കുന്ന കരട് നിർദേശത്തിനു കുവൈത്ത് മന്ത്രി സഭ അംഗീകാരം നൽകി. സാമൂഹ്യാരോഗ്യസംരക്ഷണത്തിൽ സഹകരിക്കാത്തവർക്ക് ആറു മാസം വരെ തടവും 10000 ദീനാർ മുതൽ 50000 ദീനാർ വരെ പിഴയും വ്യവസ്ഥ ചെയ്യുന്നതാണ് നിർദിഷ്ട നിയമം.

സാംക്രമികരോഗങ്ങൾ തടയുന്നതുമായി ബന്ധപ്പെട്ട നിയമത്തിലെ വിവിധ വകുപ്പുകൾ ഭേദഗതി ചെയ്യാനുള്ള നിർദേശത്തിനാണ് തിങ്കളാഴ്ച വൈകീട്ട് ചേർന്ന മന്ത്രിസഭായോഗം അംഗീകാരം നൽകിയത്. ഇതനുസരിച്ചു പകർച്ചവ്യാധികൾ തടയുന്നതിനുള്ള ചട്ടങ്ങളും നിർദേശങ്ങളും ലംഘിക്കുന്നവർക്ക് മൂന്നു മാസത്തിൽ കവിയാത്ത തടവും അയ്യായിരം ദിനാറിൽ കവിയാത്ത പിഴയും അല്ലെങ്കിൽ ഇവയിലേതെങ്കിലും ഒന്ന്എന്നതാണ് ശിക്ഷ.

കോവിഡ് നയന്റീൻ പോലുള്ള മഹാമാരികൾ ഉണ്ടാകുന്ന സന്ദർഭങ്ങളിൽ സർക്കാർ സ്വീകരിക്കുന്ന പ്രതിരോധ നടപടികളോട് സഹകരിക്കാത്തവർക്ക് ആറുമാസം വരെ തടവും 10000 ദീനാർ മുതൽ 30000 ദീനാർ വരെ പിഴയും അല്ലെങ്കിൽ ഇവയിലേതെങ്കിലും ഒന്ന് ശിക്ഷയായി ലഭിക്കും. നിർബന്ധിത വീട്ടുനിരീക്ഷണം ലംഘിക്കുന്നത് ഉൾപ്പെടെ ഇതിന്റെ പരിധിയിൽ വരും.

മാരകമായ പകർച്ചവ്യാധി ഉള്ള കാര്യം ബോധപൂർവം മറച്ചുവെക്കുകയും അതുവഴി രോഗവ്യാപനത്തിനു കാരണക്കാരനാവുകയും ചെയ്‌താൽ അഞ്ചുവർഷം വരെ തടവും 10000 മുതൽ 50000 ദീനാർ വരെ പിഴയും കൽപിക്കുന്നതാണ് മന്ത്രിസഭ അംഗീകരിച്ച കരടുനിയമം. അമീറിന്റെ അനുമതിയോടെ നിയമനിർമാണം വേഗത്തിലാക്കാനാണ് മന്ത്രിസഭാ തീരുമാനം. പ്രത്യേക പാർലമെന്റ് സമ്മേളനം വിളിച്ചു കരട് നിർദേശം ചർച്ച ചെയ്തു വോട്ടിനിടണമെന്നും കാബിനറ്റ് നിർദേശം നൽകി.