LiveTV

Live

Gulf

അഫ്ഗാനിസ്ഥാനിലെ അസ്ഥിരതയും സമാധാനവും; അന്താരാഷ്ട്ര പണ്ഡിത സമ്മേളനത്തിന് തുടക്കം

അഫ്ഗാനിസ്ഥാനിലെ അസ്ഥിരതയും സമാധാനവും; അന്താരാഷ്ട്ര പണ്ഡിത സമ്മേളനത്തിന് തുടക്കം

അഫ്ഗാനിസ്ഥാനിലെ അസ്ഥിരതയും ഭീകരവാദവും പരിഹാരവും ചര്‍ച്ച ചെയ്യുന്ന അന്താരാഷ്ട്ര പണ്ഡിത സമ്മേളനത്തിന് സൌദിയിലെ ജിദ്ദയില്‍ തുടക്കമായി. ഇസ്ലാമിക രാജ്യങ്ങളുടെ കൂട്ടായ്മയായ ഒ.ഐ.സിയുടെ നേതൃത്വത്തിലാണ് സമ്മേളനം. വിവിധ വിഷയങ്ങളില്‍ ചര്‍ച്ച പുരോഗമിക്കുകയാണ്. സമ്മേളനത്തിന്റെ പ്രമേയ പ്രഖ്യാപനം നാളെ മക്കയില്‍ നടക്കും.

ജിദ്ദയിലെ കോണ്‍ഫറന്‍സ് പാലസിലാണ് അന്താരാഷ്ട്ര പണ്ഡിത സമ്മേളനത്തിന് തുടക്കമായത്. ഇസ്ലാമിക രാഷ്ട്രങ്ങളുടെ കൂട്ടായ്മയായ ഒഐസിയുടെ നേതൃത്വത്തിലാണ് സമ്മേളനം. മക്ക ഗവര്‍ണറുടെ മേല്‍ നേട്ടത്തില്‍ നടക്കുന്ന സമ്മേളനത്തില്‍ ഒഐസി സെക്രട്ടറി ജനറല്‍ ഡോ.യൂസുഫ് അല്‍ ഒതൈമീന്‍ ആമുഖ പ്രഭാഷണം നടത്തി. പ്രതിസന്ധിയിലൂടെ കടന്നു പോകുന്ന അഫ്ഗാനിലെ പ്രശ്നങ്ങള്‍ക്ക് ഇസ്ലാമിക രാഷ്ട്രങ്ങളുടെ കൂട്ടായ നീക്കം വേണമെന്നും അദ്ദേഹം ആവശ്യപ്പെട്ടു. സമ്മേളനത്തോട് അഫ്ഗാനിസ്ഥാന്‍ പ്രതികരിക്കണമെന്നും അദ്ദേഹം പറഞ്ഞു.

സൌദി ഇസ്ലാമിക കാര്യ മന്ത്രി ഡോ. അബ്ദുല്ലത്തീഫ് ബിന്‍ അബ്ദുല്‍ അസീസ് അല്‍ ശൈഖ് സംസാരിച്ചു. അഫ്ഗാന്‍ പണ്ഡിത സഭാ അധ്യക്ഷന്‍ ഖിയാമുദ്ദീന്‍ ഖഷാഫ് അഫ്ഗാന്‍ വിഷയത്തില്‍ പണ്ഡിതര്‍ക്ക് ചെലുത്താവുന്ന പങ്കിനെക്കുറിച്ച ആശയങ്ങള്‍ പങ്കു വെച്ചു. റോയല്‍ കോര്‍ട്ട് ഉപദേഷ്ടാവും മക്ക ഗ്രാന്റ് മോസ്ക് ഇമാമുമായ ഡോ. സാലിഹ് ബിന്‍ അബ്ദുള്ള ബിന്‍ ഹുമൈദ് സമ്മേളനത്തെ അഭിസംബോധന ചെയ്തു. ഉച്ചക്ക് ശേഷം അഫ്ഗാന്‍ പ്രശ്ന പരിഹാരത്തിന് പണ്ഡിതര്‍ക്ക് നല്‍കാവുന്ന പങ്കിനെക്കുറിച്ച് ചര്‍ച്ച നടന്നു.

തീവ്രവാദത്തോടും ഭീകരവാദത്തോടും ഇസ്ലാം സ്വീകരിച്ച നിലപാടായിരുന്നു വൈകുന്നേരത്തെ ചര്‍ച്ച. സൌദി, ഈജിപ്ത്, അഫ്ഗാന്‍ തുടങ്ങി വിവിധ രാജ്യങ്ങളിലെ പണ്ഡിതരാണ് സമ്മേളനത്തിലെ ക്ഷണിതാക്കള്‍. നാളെ മക്ക സഫ കൊട്ടാരത്തില്‍ നടക്കുന്ന സമാപന സമ്മേളനത്തില്‍ അഫ്ഗാനിസ്ഥാന്റെ സമാധാനത്തിനും സ്ഥിരതക്കും വേണ്ട സമ്മേളനത്തിന്റെ നിലപാട് പ്രഖ്യാപിക്കും. ഭരണ നേതൃത്വത്തിലെ പ്രമുഖര്‍ സമാപന സമ്മേളനത്തിന് എത്തും.