LiveTV

Live

Gulf

വെസ്​റ്റ്​ ബാങ്കിൽ ജൂത കുടിയേറ്റത്തിന്​ അനുമതി നൽകിയതിനെതിരെ അറബ്​ പ്രതിഷേധം

വെസ്​റ്റ്​ ബാങ്കിൽ ജൂത കുടിയേറ്റത്തിന്​ അനുമതി നൽകിയതിനെതിരെ അറബ്​ പ്രതിഷേധം
Summary
ഡൊണാൾഡ്​ ​ട്രംപ്​ നൽകിയ രാഷ്​ട്രീയ പിൻബലമാണ്​ കടുത്ത നടപടികളുമായി മുന്നോട്ടു പോകാൻ ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിന്​ പ്രേരണ.

രണ്ടു പതിറ്റാണ്ടിനിപ്പുറം വെസ്​റ്റ്​ ബാങ്കിൽ പുതിയ ജൂത കുടിയേറ്റത്തിന്​ അനുമതി നൽകിയ ഇസ്രായേൽ മന്ത്രിസഭാ തീരുമാനത്തിനെതിരെ അറബ്​ ലോകത്ത്​ പ്രതിഷേധം. ഫലസ്​തീൻ ജനതയുടെ അവകാശം സംരക്ഷിക്കാൻ അന്തർദേശീയ സമൂഹം ശക്​തമായി രംഗത്തു വരണമെന്ന ആവശ്യമാണ്​ അറബ്​ ലോകം മുന്നോട്ടുവെക്കുന്നത്​.

വെസ്​റ്റ്​ ബാങ്കിൽ പുതിയ കുടിയേറ്റത്തിന്​ അനുമതി നൽകിയതോടെ പശ്ചിമേഷ്യൻ സമാധാന ദൗത്യത്തെ തന്നെയാണ്​ ഇസ്രായേൽ വെല്ലുവിളിക്കുന്നതെന്ന്​ അറബ്​ രാഷ്​ട്രങ്ങൾ കുറ്റപ്പെടുത്തി. കഴിഞ്ഞ ദിവസം ജോർദാനിൽ ചേർന്ന അറബ്​ ലീഗ്​ ഉച്ചകോടി ഫലസ്​തീൻ പ്രശ്​ന പരിഹാരം അട്ടിമറിക്കാനുള്ള ഇസ്രായേൽ നീക്കത്തെ നിശിതമായി വിമർശിച്ചിരുന്നു. എന്നാൽ യുഎസ്​ പ്രസിഡൻറ്​ ഡൊണാൾഡ്​ ​ട്രംപ്​ നൽകിയ രാഷ്​ട്രീയ പിൻബലമാണ്​ കടുത്ത നടപടികളുമായി മുന്നോട്ടു പോകാൻ ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിന്​ പ്രേരണ. ബറാക്​ ഒബാമയുടെ കാലത്ത്​ കുടിയേറ്റ പദ്ധതിയുമായി മുന്നോട്ടു പോകാൻ ഇ​സ്രായേൽ തുനിഞ്ഞിരുന്നില്ല.

​ഐക്യരാഷ്​ട്ര സംഘടന ഇസ്രായേൽ നീക്ക​ത്തിനെതിരെ പ്രതികരിച്ചി​ട്ടുണ്ടെങ്കിലും വൻശക്​തി രാജ്യങ്ങൾ പലതും മൗനം അവലംബിക്കുകയാണ്​. ഫലസ്​തീൻ അവകാശം കവരാനുള്ള നീക്കം ചെറുത്തു തോൽപിക്കണം എന്നാവശ്യപ്പെട്ട്​ മഹ്​മൂദ്​ അബ്ബാസ്​ ഉൾപ്പെടെയുള്ള നേതാക്കൾ അറബ്​ ലോകത്തി​ന്‍റെ പിന്തുണ തേടി. 1991ലാണ്​ അവസാനമായി ഇസ്രായേൽ സുരക്ഷാ കാബിനറ്റ്​ പുതിയ കുടിയേറ്റത്തിന്​ അനുമതി നൽകുന്നത്​. ഇസ്രായേൽ നീക്കം ഗുരുതരമായ പ്രത്യാഘാതങ്ങൾക്കാവും വഴിയൊരുക്കുക.