LiveTV

Live

Gulf

കറൻസി വിനിമയ സ്ഥാപനങ്ങൾ വഴി പണമയക്കുന്നതിനുള്ള ഫീസിന് വാറ്റ് ബാധകമാകും

കറൻസി വിനിമയ സ്ഥാപനങ്ങൾ വഴി പണമയക്കുന്നതിനുള്ള ഫീസിന് വാറ്റ് ബാധകമാകും
Summary
ജനുവരി ഒന്നിന്​ വാറ്റ്​ പ്രാബല്യത്തിലാകുമ്പോൾ മറ്റു ഉൽപന്നങ്ങൾക്കും സേവനങ്ങൾക്കുമൊപ്പം അഞ്ച്​ ശതമാനം നികുതിയാണ്​ പണവിനിമയ ഫീസിനും ബാധകമാകുക

കറൻസി വിനിമയ സ്ഥാപനങ്ങൾ വഴി പണമയക്കുന്നതിനുള്ള ഫീസിന്​ മൂല്യവർധിത നികുതി ബാധകമാകും. ജനുവരി ഒന്നിന്​ വാറ്റ്​ പ്രാബല്യത്തിലാകുമ്പോൾ മറ്റു ഉൽപന്നങ്ങൾക്കും സേവനങ്ങൾക്കുമൊപ്പം അഞ്ച്​ ശതമാനം നികുതിയാണ്​ പണവിനിമയ ഫീസിനും ബാധകമാകുക.

ജനുവരി ഒന്നു മുതൽ യുഎഇയിൽനിന്ന്​ നാട്ടിലേക്ക്​ പണമയക്കാനുള്ള ചെലവ്​ നേരിയ തോതിൽ വർധിക്കും. 80 ഫിൽസോ ഒരു ദിർഹമോ വർധിക്കുമെന്നാണ്​ കണക്കാക്കുന്നത്​. നിലവിൽ 1000 ദിർഹം വരെ അയക്കാൻ 16 ദിർഹവും 1000 ദിർഹത്തിന്​ മുകളിൽ 22 ദിർഹവുമാണ്​ മിക്ക കറൻസി വിനിമയ സ്ഥാപനങ്ങളും ഈടാക്കി വരുന്നത്​.

പണമയക്കുന്ന ഫീസിൽ നേരിയ വർധനയാണ്​ വരുന്നതെന്നും അതിനാൽ ഇത്​ യുഎഇയിൽനിന്ന്​ അയക്കപ്പെടുന്ന തുകയിൽ കുറവുണ്ടാകില്ലെന്നുമാണ്​ കറൻസി വിനിമയ സ്ഥാപനങ്ങൾ കരുതുന്നത്​. യുഎഇ സെൻട്രൽ ബാങ്കിന്റെ കണക്ക്​ പ്രകാരം യു.എ.ഇയിലെ പ്രവാസികൾ 2017ൽ ജൂൺ 30 വരെ 7800 കോടി ദിർഹമാണ്​ നാട്ടിലേക്ക്​ അയച്ചിരിക്കുന്നത്​. 2016 വർഷത്തിൽ അയച്ചതിന്റെ 48.5 ശതമാനമാണിത്​. 2016ൽ 16080 ദിർഹമായിരുന്നു പ്രവാസികൾ നാട്ടിലേക്ക്​ അയച്ച ആകെ തുക. ഏറ്റവും കൂടുതൽ തുക അയക്കുന്നത്​ ഇന്ത്യക്കാരാണ്​. പാകിസ്താനികൾ, ഫിലിപ്പീൻസുകാർ, ഈജിപ്തുകാർ, ബ്രിട്ടീഷുകാർ എന്നിവരാണ്​ യഥാക്രമം ഇന്ത്യക്കാർക്ക്​ പിറകിൽ.