മക്കയിൽ ടാക്സി സ്വദേശിവത്കരണം ; 7000 സ്വദേശികള്‍ക്ക് ജോലി

മക്കയിൽ ടാക്സി സ്വദേശിവത്കരണം പൂര്‍ത്തിയാകുന്നതോടെ ഏഴായിരം സ്വദേശികള്‍ക്ക് ജോലി ഉറപ്പാകും. നിലവില്‍ വിദേശികളാണ് ഈ മേഖലയില്‍ ജോലി ചെയ്യുന്നവരില്‍ കൂടുതലും. കഴിഞ്ഞ ദിവസം മക്ക ഡെപ്യൂട്ടി ഗവര്‍ണറാണ് നിര്‍ദേശം മുന്നോട്ട് വെച്ചത്.

ഹജ്ജ്​ഉംറ സീസണുകളിലെ ടാക്സി ജോലികളാണ് സ്വദേശിവത്കരണത്തിന് വിധേയമാകുന്നത്. മക്ക നഗരപരിധിയിലായിരിക്കും ഇത്. സ്വദേശിവത്കരിക്കുന്നതിലൂടെ ഏഴായിരം പേർക്ക്​ ജോലി ഉറപ്പാക്കുകയാണ് ലക്ഷ്യം. സീസണുകളിൽ മക്കക്കുള്ളിലെ ടാക്സി ജോലികളില്‍ വിദേശികളുമുണ്ടേറെ. 150 ഓളം ടാക്സി കമ്പനികൾക്ക്​കീഴിൽ 7000 ത്തിലധികം കാറുകളുണ്ട്. ഇത് സ്വദേശികൾക്ക്​ മാത്രമാക്കണമെന്ന്​ കഴിഞ്ഞ ദിവസമാണ്​ ഡെപ്യൂട്ടി ഗവർണർ നിർദേശം വെച്ചത്​​​. ഇതിനെ മക്കയിലെ സ്വദേശികൾ സ്വാഗതം ചെയ്തു.

ഡെപ്യൂട്ടി ഗവർണറുടെ നിർദേശം വന്നതോടെ ബന്ധപ്പെട്ട വകുപ്പുകൾക്ക്​പദ്ധതി നടപ്പിലാക്കുന്നതിനുള്ള നടപടികൾ ആരംഭിച്ചു​. സീസണില്‍ വലിയ നേട്ടമുണ്ടാകും ഡ്രൈവര്‍മാര്‍ക്കിവിടെ. വിദേശികളെ പക്ഷേ തീരുമാനം പ്രതികൂലമായി ബാധിക്കും. നിലവിൽ ടാക്സി മേഖലയിൽ ഇന്ത്യക്കാരടക്കമുള്ള നിരവധി വിദേശികൾ മക്കയിൽ ജോലി ചെയ്തുവരുന്നുണ്ട്​. തീരുമാനം നടപ്പിലാക്കുന്നതോടെ ഇവർക്ക്​ ജോലി നഷ്ടമാവും.

മീഡിയവൺ വാർത്തകൾ ടെലിഗ്രാമിൽ ലഭിക്കാൻ ജോയിൻ ചെയ്യുക