യുഎഇ ദേശീയദിനാഘോഷത്തില്‍ കാര്‍ അലങ്കരിക്കലില്‍ താരമായി മലയാളി

യുഎഇ 46ാം ദേശീയദിനാഘോഷ പരിപാടികളിൽ കാർ അലങ്കരിക്കൽ ഇനത്തിൽ ഇത്തവണയും താരമായത്​ മലയാളി ഇഖ്​ബാൽ അബ്​ദുൽ ഹമീദ്. ആഘോഷത്തിന്​ മാറ്റ്​ കൂട്ടാൻ യു.എ.ഇ ചരിത്രവും ​നേതാക്കളുടെ ചിത്രങ്ങളും ഉൾപ്പെടുത്തിയാണ്​ ഇഖ്​ബാൽ തന്റെ ആഡംബര കാറിന്​ പൊലിമ പകർന്നത്.

ഇത്​ കാസർകോട്​ ബേക്കൽ ഹദ്ദാദ്​ നഗർ സ്വദേശി ഇഖ്​ബാൽ അബ്​ദുൽ ഹമീദ്​. തുടർച്ചയായ പത്താം വർഷമാണ്​ യു.എ.ഇ ദേശീയ ദിനാഘോഷങ്ങളിൽ ഈ മലയാളി മിന്നും താരമാകുന്നത്​. ഓരോ വർഷവും കാറും അലങ്കാര രീതിയും മാറും. ഇത്തവണ ബെൻറ്​ലി ബെൻറയ്ഗ എസ്​.യു.വി വാഹനത്തിനാണ്​ ഇഖ്​ബാൽ നിറച്ചാർത്തണിയിച്ചത്​. എല്ലാ തവണയും എന്ന പോലെ കാർ അലങ്കരിക്കൽ മൽസരത്തിൽ ഇഖ്​ബാൽ തന്നെയാണ്​ തിളങ്ങിയത്​. ദുബൈ ഖിസെസ്​ പൊലിസ്​ സ്റ്റേഷനിൽ ഒരുക്കിയ പരേഡിൽ എല്ലാവരും താൽപര്യപൂർവം വീക്ഷിച്ചത്​ ഇഖ്​ബാലിന്റെ ഈ അലങ്കരിച്ച വാഹനം തന്നെ. താൻ ഉൾപ്പെടെ ആയിരങ്ങൾക്ക്​ തുണയാകുന്ന യു.എ.ഇയോടും നേതാക്കളോടുമുള്ള കൃതജ്ഞത അറിയിക്കൽ കൂടിയാണിതെന്ന്​ ഇഖ്​ബാൽ അബ്​ദുൽ ഹമീദ്​ പറയുന്നു.

കാർ അലങ്കരിക്കലിനു പിന്നിലെ അധ്വാനം ചെറുതല്ല. മൂന്നു മാസം വേണ്ടി വന്നു സ്​റ്റിക്കറുകളിൽ തീർത്ത ചിത്രങ്ങളും ചരി്ത്രവും കൊണ്ട്​ കാറിനെ ഇവ്വിധം കമനീയമാക്കാൻ. സ്വദേശികളുമായി അടുത്ത ബന്​ധം പുലർത്തുന്ന ഇഖ്​ബാൽ അബ്​ദുൽ ഹമീദിന്​ യു.എ.ഇയുടെ ഓരോ ദേശീയദിനവും ഏറെ പ്രിയപ്പെട്ടതാണ്​.. ചെറുപ്പം തൊട്ടേ കാറുകളോടും ഡ്രൈവിംഗിനോടും തോന്നിയ ഇഷ്ടമാണ് ഇഖ്​ബാലിന്റെ പ്രചോദനം. ഒപ്പം യു.എ.ഇയോടുള്ള വർധിച്ച താൽപര്യവും. അടുത്ത വർഷവും മറ്റൊരു ആഡംബര കാറുമായി ഇഖ്​ബാൽ പരേഡിലുണ്ടാകും. അലങ്കാരത്തിന്റെ തികച്ചും വേറിട്ട മറ്റൊരു മാതൃകയുമായി.

മീഡിയവൺ വാർത്തകൾ ടെലിഗ്രാമിൽ ലഭിക്കാൻ ജോയിൻ ചെയ്യുക