ദുബൈയിലെ സർക്കാർ ഓഫീസുകളില്‍ നിന്ന്​ കടലാസ്​ ഒഴിവാക്കുന്നു

മാലിന്യവും പരിസ്​ഥിതി നാശവും കുറക്കാനും ഇടപാടുകൾ എളുപ്പത്തിലാക്കാനും ദുബൈയിലെ സർക്കാർ ഓഫീസുകളിൽ നിന്ന്​ കടലാസ്​ ഒഴിവാക്കുന്നു. 2021നകം ഒഫീസുകളിൽ നിന്ന്​ കടലാസ്​ ഫയലുകൾ പൂർണമായി ഒഴിവാക്കാനുള്ള സമഗ്ര പദ്ധതിക്ക്​ ദുബൈ കിരീടാവകാശിയും എക്​സിക്യൂട്ടീവ്​ കൗൺസിൽ ചെയർമാനുമായ ശൈഖ്​ ഹംദാൻ ബിൻ മുഹമ്മദ്​ ബിൻ റാശിദ്​ ആൽ മക്​തൂം തുടക്കം കുറിച്ചു. ഡിജിറ്റൽ ഇടപാടുകൾ സമയവും അധ്വാനവും ലാഭിക്കാൻ സഹായകമാകുമെന്നും സ്​മാർട്​ ദുബൈ വകുപ്പ്​ ഇൗ പദ്ധതിയുടെ മേൽനോട്ടം വഹിക്കുമെന്നും വ്യക്​തമാക്കി.

ജനങ്ങളുടെ സമയനഷ്​ടം ഒഴിവാക്കാനും ജീവിത നിലവാരം ഉയർത്താനും എല്ലാ പദ്ധതികളും സർക്കാർ ഒരുക്കും. ഡിജിറ്റൽ വത്​കരണത്തിൽ ദുബൈ ഇതിനകം തന്നെ ഏറെ മുന്നിലെത്തിയിരിക്കുന്നു. സ്​മാർട്ട്​ നഗരം സാധ്യമാക്കുന്നതിന്​ ആവശ്യമായ എമിറേറ്റിന്റെ രേഖകളും വിശദാംശങ്ങളും ദുബൈ പൾസ്​ പ്ലാറ്റ്​ഫോമിനു കീഴിൽ തയ്യാറാക്കി സൂക്ഷിക്കുമെന്ന്​ സ്​മാർട്​ ദുബൈ ഒഫീസ്​ ഡയറക്​ടർ ജനറൽ ഡോ. ആഇഷാ ബിൻത്​ ബുട്ടി ബിൻ ബിഷ്​ർ അറിയിച്ചു.

മൂന്നു വർഷം മുൻപ്​ യു.എ.ഇ വൈസ്​ പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂം തുടക്കമിട്ട ദുബൈ സ്​മാർട്ട്​ സിറ്റി പദ്ധതിയുടെ മുന്നേറ്റങ്ങളിലും നേട്ടങ്ങളിലുമൂന്നിയാണ്​ ദുബൈ പൾസ്​ പ്രവർത്തിക്കുക. വിവര വിപ്ലവത്തിന്റെ കാലത്ത്​ സർക്കാർ രേഖകൾക്ക്​ ഒരു കേന്ദ്രീകൃത പ്ലാറ്റ്​ഫോം ഉണ്ടാവൽ അത്യാവശ്യമാണെന്ന്​ ഹംദാൻ അഭിപ്രായപ്പെട്ടു. പൊതു സ്വകാര്യ മേഖലയിലെ എല്ലാ വിശദാംശങ്ങളും ദുബൈ പൾസിൽ സ്വരൂപിക്കും. നാലു ഘട്ടമായാണ്​ ഇതു സാധ്യമാക്കുക.

2071ൽ ശതാബ്​ദി ആഘോഷിക്കുമ്പോഴേക്കും ലോകത്തെ ഏറ്റവും മികച്ച രാജ്യമായി യു.എ.ഇയെ മാറ്റിയെടുക്കുക എന്ന പദ്ധതിയുടെ കൂടി ഭാഗമായാണിത്​. സന്തോഷവും തുല്യതയുമുള്ള യഥാർഥ സ്​മാർട്ട്​ നഗരം കെട്ടിപ്പടുക്കാനാണ്​ നാം പരിശ്രമിക്കുന്നതെന്നും ശൈഖ്​ ഹംദാൻ കൂട്ടിച്ചേർത്തു.

മീഡിയവൺ വാർത്തകൾ ടെലിഗ്രാമിൽ ലഭിക്കാൻ ജോയിൻ ചെയ്യുക