LiveTV

Live

Gulf

'വോട്ടിന്​ പകരം ഷാപ്പ്​' എന്ന വാഗ്ദാനം എല്‍ഡിഎഫ് നടപ്പാക്കിയെന്ന് എം എം ഹസന്‍

'വോട്ടിന്​ പകരം ഷാപ്പ്​' എന്ന വാഗ്ദാനം എല്‍ഡിഎഫ് നടപ്പാക്കിയെന്ന് എം എം ഹസന്‍
Summary
സിപിഎമ്മും ബിജെപിയും വെച്ചുപുലർത്തുന്നത് ​പകയുടെയും വിദ്വേഷത്തിന്‍റെയും രാഷ്ട്രീയമെന്നും​ കെപിസിസി അധ്യക്ഷൻ

കേരളത്തിൽ സി.പി.എമ്മും ബി.ജെ.പിയും വെച്ചുപുലർത്തുന്നത്​ പകയുടെയും വിദ്വേഷത്തിന്റെയും രാഷ്ട്രീയമെന്ന്​ കെപിസിസി അധ്യക്ഷൻ എം എം ഹസൻ. അക്രമത്തെ അക്രമം കൊണ്ട്​ നേരിടാതെ ബി.ജെ.പിയുടെ ഫാഷിസ്റ്റ്​ അജണ്ട ജനങ്ങൾക്ക്​ മുന്നിൽ തുറന്നുകാണിക്കുകയാണ്​ വേണ്ടതെന്ന്​ ഒ.​ഐ.സി.സി നാഷണൽ കമ്മിറ്റി സംഘടിപ്പിച്ച ഇഫ്​ത്താറിൽ പങ്കെടുക്കാൻ മസ്കത്തിലെത്തിയ ഹസൻ മീഡിയാവണ്ണിനോട്​പറഞ്ഞു.

എൽ.ഡി.എഫ്​സർക്കാരിന്റെ കഴിഞ്ഞ ഒരു വർഷത്തെ ഭരണം വിലയിരുത്തി മാർക്കിട്ടാൽ പാസ്​മാർക്ക്​ പോലും നൽകാൻ കഴിയില്ല. യു.ഡി.എഫിന്റെ മദ്യനയം പൂർണമായും അട്ടിമറിച്ചതിനെതിരെ ശക്തമായ പ്രക്ഷോഭം നടത്തും. ഈ മാസം 15ന്​ എല്ലാ നിയോജക മണ്ഡലങ്ങളിലും സായാഹ്ന ജനസദസുകൾ സംഘടിപ്പിക്കും. ഷിബു ബേബി ജോണിന്റേത്​ വ്യക്തിപരമായ അഭിപ്രായമാണ്​. മുരളീധരന്റെ അഭിപ്രായങ്ങളും വളച്ചൊടിക്കപ്പെട്ടു. സർക്കാരിനെ അട്ടിമറിച്ചാൽ തങ്ങൾ അധികാരത്തിൽ എത്തുമ്പോൾ പൂട്ടിയ ബാറുകൾ തുറക്കാൻ അനുവദിക്കാമെന്നായിരുന്നു എൽഡിഎഫ്​ വാഗ്​ദാനം. 'വോട്ടിന്​ പകരം ഷാപ്പ്​' എന്ന മുമ്പ്​ നൽകിയ വാഗ്​ദാനമാണ്​ എൽ.ഡി.എഫ്​ ഇപ്പോൾ നടപ്പിലാക്കുന്നതെന്നും എം.എം ഹസൻ പറഞ്ഞു.

ജനങ്ങൾക്ക്​ ഗുണകരമായ ഒന്നും കഴിഞ്ഞ ഒരു വർഷത്തിനിടെ സംഭവിച്ചിട്ടില്ല. ഏത്​ സർക്കാർ വന്നാലും ജനങ്ങളുടെ ജീവിതഭാരം കുറക്കാൻ നടപടിയെടുക്കും. എന്നാൽ പാലിന്​ വിലകൂട്ടുകയും വെള്ളക്കരം കൂട്ടുകയും റേഷൻ സ്തംഭിപ്പിക്കുകയും ചെയ്ത്​ ജനങ്ങളുടെ ജീവിതഭാരം കൂട്ടുകയാണ്​ പിണറായി സർക്കാർ ചെയ്​തത്​. ഒരു വർഷത്തിനകം എടുത്തുപറയത്തക്ക ഒരു വികസന പ്രവർത്തനവും നടന്നിട്ടുമില്ല. പബ്ലിസിറ്റി മാത്രമാണ്​ സർക്കാരിന്റെ ഉന്നവും നേട്ടവും. പരിസ്​ഥിതിദിനത്തിന്റെ ഭാഗമായി ഒരുകോടി വൃക്ഷത്തൈകൾ നടുന്നതിന്​ രണ്ടുകോടി രൂപയുടെ പരസ്യമാണ്​ സർക്കാർ നൽകിയതെന്നും എം.എം ഹസൻ പറഞ്ഞു. വിദേശ രാജ്യങ്ങളിലെ കോൺഗ്രസ്​ പോഷക സംഘടനയായ ഒ.​ഐ.സി.സിയുടെ പ്രവർത്തനം കൂടുതൽ ശക്തമാക്കുമെന്ന്​ എം.എം ഹസൻ പറഞ്ഞു.