LiveTV

Live

General

സൗദിയില്‍ മുഴുവന്‍ പ്രദേശങ്ങളിലും ഏകീകൃത കർഫ്യൂ പാസ് പ്രാബല്യത്തിലായി; പുതിയ പാസില്ലാതെ പുറത്തിറങ്ങിയാല്‍ പതിനായിരം റിയാല്‍ പിഴ

ഏപ്രില്‍ 13ന് റിയാദിലും തൊട്ടടുത്ത ദിവസം മക്കയിലും മദീനയിലും ഏകീകൃത കര്‍ഫ്യൂ പാസ് നിലവില്‍ വന്നിരുന്നു. ഇന്ന് മുതല്‍‌ രാജ്യവ്യാപകമായി ഈ പാസുപയോഗിച്ചേ പുറത്തിറങ്ങാനാകൂ

സൗദിയില്‍ മുഴുവന്‍ പ്രദേശങ്ങളിലും ഏകീകൃത കർഫ്യൂ പാസ് പ്രാബല്യത്തിലായി; പുതിയ പാസില്ലാതെ പുറത്തിറങ്ങിയാല്‍ പതിനായിരം റിയാല്‍ പിഴ

സൌദിയിൽ രാജ്യവ്യാപകമായി ഏകീകൃത കർഫ്യൂ പാസ് പ്രാബല്യത്തിലായി.ഇന്ന് മുതൽ ആഭ്യന്തര മന്ത്രാലയത്തിന്‍റെ പ്രത്യേക സീൽ പതിപ്പിച്ച പാസുകൾ ഉള്ളവർക്ക് മാത്രമേ കർഫ്യൂ സമയങ്ങളിൽ യാത്ര ചെയ്യുവാൻ അനുവാദമുള്ളൂ. കോവിഡ് വ്യാപനം തടയുന്നതിന്‍റെ ഭാഗമായാണ് നടപടി.

ഏപ്രില്‍ 13ന് റിയാദിലാണ് പുതിയ ഏകീകൃത കര്‍ഫ്യൂ പാസ് ആദ്യമായി പ്രാബല്യത്തിലായത്. തൊട്ടുടത്ത ദിവസം മുതല്‍ മക്ക, മദീന എന്നീ നഗരങ്ങളിലും ഇത് നിര്‍ബന്ധമാക്കി. ഇന്ന് മൂന്ന് മണിമുതൽ രാജ്യത്തുടനീളം ഇതേ രീതിയിലുള്ള പുതിയ പാസ് നിര്‍ബന്ധമായെന്ന് ആഭ്യന്തര മന്ത്രാലയം അറിയിച്ചു. നിലവിൽ മുഴുസമയ കർഫ്യൂ പ്രഖ്യാപിച്ച സ്ഥലങ്ങളിൽ എല്ലാ സമയവും വാഹനത്തില്‍ പുറത്തിറങ്ങാന്‍ പാസ് നിർബന്ധമാണ്. എന്നാൽ മൂന്ന് മണിമുതൽ മാത്രം കർഫ്യൂ പ്രഖ്യാപിച്ചിരിക്കുന്ന സ്ഥലങ്ങളിൽ മൂന്ന് മണിമുതൽ മാത്രമേ പാസ് ആവശ്യമായി വരൂ. കർഫ്യൂ സമയങ്ങളിൽ വാനങ്ങളിൽ യാത്ര ചെയ്യുന്നതിനും, വാഹനമോടിക്കുന്നതിനും പുതിയ പാസ് ഉള്ളവർക്ക് മാത്രമേ അനുമതിയുള്ളൂ.

നിലവിൽ മുഴുസമയ കർഫ്യൂ പ്രഖ്യാപിച്ച സ്ഥലങ്ങളിലും, രാവിലെ ആറ് മുതൽ വൈകിട്ട് മൂന്ന് വരെ അവശ്യ സാധനങ്ങൾ വാങ്ങുന്നതിനായി തൊട്ടടുത്ത കടകളിലേക്ക് പോകുവാൻ അനുവാദമുണ്ട്. എന്നാൽ ഇവിടങ്ങളിലുള്ളവർ വാഹനങ്ങളിൽ യാത്ര ചെയ്യുവാൻ എല്ലാ സമയങ്ങളിലും പാസ് ഉപയോഗിക്കണം. സാധനങ്ങൾ വാങ്ങി കഴിഞ്ഞവർ വേഗത്തിൽ വീടുകളിലെത്തണമെന്നാണ് ചട്ടം.

അനാവശ്യമായി പുറത്ത് കറങ്ങി നടക്കുന്നതും, കൂടുതൽ സമയം പുറത്ത് അകാരണമായി ചെലവഴിക്കുന്നതും പിഴ ചുമത്തപ്പെടുത്ത കുറ്റമാണ്. മതിയായ രേഖകള്‍ സഹിതം കമ്പനി മുഖേന ഓണ് ലൈനിൽ പാസിനായി അപേക്ഷിക്കാം. വ്യാജ പാസ് നിർമ്മിക്കുന്നവർക്ക് അഞ്ച് വർഷം വരെ തടവും അഞ്ച് ലക്ഷം റിയാൽ വരെ പിഴയും ചുമത്തും. പാസില്ലാതെ വാഹനത്തില്‍ യാത്ര ചെയ്ത് പിടിക്കപ്പെട്ടാല്‍ പതിനായിരം റിയാലാണ് ആദ്യ ഘട്ടത്തിൽ പിഴ ചുമത്തുക.