LiveTV

Live

Entertainment

'ഞാന്‍ ആരെയെങ്കിലും വേദനപ്പിച്ചിട്ടുണ്ടെങ്കിൽ അവരോട് നിരുപാധികം ക്ഷമ ചോദിക്കുന്നു'; മാപ്പ് പറഞ്ഞ് അഹാന

ഇത് ഒട്ടും ശരിയല്ലെന്നും സൈബര്‍ ബുള്ളിങ്ങിനെതിരെ ശബ്ദമുയര്‍ത്തിയ അഹാന തന്നെ സൈബര്‍ ബുള്ളിങ് ചെയ്യുന്നു എന്നാരോപിച്ചായിരുന്നു രൂക്ഷ വിമര്‍ശനം

'ഞാന്‍ ആരെയെങ്കിലും വേദനപ്പിച്ചിട്ടുണ്ടെങ്കിൽ അവരോട് നിരുപാധികം ക്ഷമ ചോദിക്കുന്നു'; മാപ്പ് പറഞ്ഞ് അഹാന

കഴിഞ്ഞ ദിവസങ്ങളില്‍ സോഷ്യല്‍ മീഡിയയിലൂടെ വലിയ രീതിയിലുള്ള വിമര്‍ശനങ്ങളാണ് നടി അഹാന കൃഷ്ണക്ക് നേരിടേണ്ടി വന്നിട്ടുണ്ടായിരുന്നത്. തിരുവനന്തപുരത്തെ ട്രിപ്പിള്‍ ലോക്ക് ഡൌണും സ്വര്‍ണക്കടത്ത് കേസും പരാമര്‍ശിച്ചുകൊണ്ട് അഹാനയിട്ട ഒരു ഇന്‍സ്റ്റാഗ്രാം സ്റ്റോറിയുടെ ചുവട് പിടിച്ചാണ് ഇതെല്ലാം ആരംഭിക്കുന്നത്.

മേല്‍പ്പറഞ്ഞ സ്റ്റോറിക്ക് മറുപടിയായി ഒരു വ്യക്തിയിട്ട കമന്‍റിന്‍റെ പകുതിയിലേറെ ഭാഗം കട്ട് ചെയ്ത് ബാക്കി മാത്രം നിലനിര്‍ത്തി അതിനുള്ള ഉത്തരമെന്നോണം അഹാന ഇന്‍സ്റ്റാഗ്രാമില്‍ സ്റ്റോറിയിട്ടു. ഇത് ഒട്ടും ശരിയല്ലെന്നും സൈബര്‍ ബുള്ളിങ്ങിനെതിരെ ശബ്ദമുയര്‍ത്തിയ അഹാന തന്നെ സൈബര്‍ ബുള്ളിങ് ചെയ്യുന്നു എന്നാരോപിച്ചായിരുന്നു രൂക്ഷ വിമര്‍ശനം.

എന്നാല്‍ താന്‍ ചെയ്തത് ആരെയെങ്കിലും വേദനിപ്പിച്ചിട്ടുണ്ടെങ്കില്‍ ക്ഷമ ചോദിക്കുന്നുവെന്നും തന്‍റെ ഉദ്ദേശ ശുദ്ധി തെളിയിക്കുന്നതിലും കൂടുതല്‍ പ്രാധാന്യം അതിലാണെന്നും അഹാന പറയുന്നു. സാമൂഹ്യ മാധ്യമങ്ങളിലൂടെയാണ് അഹാനയുടെ ഈ തുറന്ന കത്ത്.

അഹാന കൃഷ്ണയുടെ പോസ്റ്റിന്‍റെ പൂര്‍ണ്ണ രൂപം

ഒരുപാട് വർഷങ്ങളായി സോഷ്യൽ മീഡിയയിലും പുറത്തും നിങ്ങളെല്ലാവരുടെയും അകമഴിഞ്ഞ സ്നേഹം അനുഭവിക്കാൻ ഭാഗ്യം ലഭിച്ചവരാണ് ഞാനും എന്റെ കുടുംബവും. അതു കൊണ്ടു തന്നെ നിങ്ങളോരോരുത്തരും ഞങ്ങൾക്ക് അത്രയേറെ പ്രിയപ്പെട്ടവരാണ്.

ഞാൻ പോസ്റ്റ് ചെയ്ത ഒരു ഇൻസ്റ്റാഗ്രാം സ്റ്റോറിയുടെ ചുവട് പിടിച്ച് ഒട്ടനവധി മെസേജുകളാണ് ഈ കഴിഞ്ഞ ദിവസങ്ങളിൽ എനിക്ക് ലഭിച്ചത്, അതിൽ ഭൂരിപക്ഷവും ആവശ്യപ്പെട്ടത് ആ സ്റ്റോറിയിൽ പരാമർശിക്കപ്പെട്ട വ്യക്തിയോടും, അതോടൊപ്പം ആ സ്റ്റോറി ആരെയെങ്കിലും വേദനിപ്പിച്ചിട്ടുണ്ടെങ്കിൽ അവരോടും ഒരു വിശദീകരണം നൽകണം എന്നാവശ്യപ്പെട്ടു കൊണ്ടുള്ളതായിരുന്നു. ഈ കഴിഞ്ഞ ദിവസങ്ങളിൽ എന്റെ ചുറ്റിലും ഒരുപാട് കാര്യങ്ങൾ സംഭവിക്കുന്നുണ്ടെന്ന് അറിയാമായിരുന്നെങ്കിലും, അതെല്ലാം പ്രോസസ്സ് ചെയ്തെടുക്കാൻ എനിക്കൊരല്പം സാവാകാശം ആവശ്യമായിരുന്നു. ഒരിക്കലും ആ വ്യക്തിയെ വേദനിപ്പിക്കുക എന്നതോ, കുറ്റക്കാരനായി ഫ്രെയിം ചെയ്യുക എന്നതോ ആയിരുന്നില്ല എന്റെ ഉദ്ദേശം. എന്റെ പോസ്റ്റിനു താഴെ ആ വ്യക്തിയിട്ട കമന്റിലെ ചില ഭാഗങ്ങളോടുള്ള എന്റെ അഭിപ്രായ വ്യത്യാസം അറിയിക്കുക എന്ന ഉദ്ദേശത്തോടെയാണ് ആ ഭാഗം മാത്രമായി സ്റ്റോറിയിൽ ഉൾപ്പെടുത്തിയത്.

മുകളിൽ പറഞ്ഞത് പോലെ ഒരാളെയും വേദനിപ്പിക്കുക എന്നതോ, തെറ്റുക്കാരനായി ചിത്രീകരിക്കുക എന്നതോ ഒന്നുമായിരുന്നില്ല എന്റെ ഉദ്ദേശം, മറിച്ച് അദ്ദേഹത്തിന്റെ പരാമർശത്തിനു മറുപടി കൊടുക്കുക എന്നത് മാത്രമായിരുന്നു. ഈ നിമിഷത്തിൽ എന്റെ ഉദ്ദേശശുദ്ധി തെളിയിക്കുക എന്നതിനുമപ്പുറം പ്രാധാന്യം എന്റെ പ്രവൃത്തികൾ ആരെയെങ്കിലും വേദനപ്പിച്ചിട്ടുണ്ടെങ്കിൽ അവരോട് നിരുപാധികം ക്ഷമ ചോദിക്കുക എന്നതിനാണെന്നു ഞാൻ മനസ്സിലാക്കുന്നു.

വ്യക്തിപരമായി അറിയില്ലെങ്കിലും എന്റെ‌ ഫോളോവേഴ്സ് ലിസ്റ്റിലുള്ള ഒരോരുത്തരും എന്റെ ജീവിതത്തിന്റെ ഭാഗമാണ്, വില മതിക്കാനാകാത്ത സമ്പാദ്യമാണ്. അതു കൊണ്ടാണ് നിങ്ങളുമായി ബന്ധപ്പെട്ട ഒരോ മൈൽസ്റ്റോണുകളും നമ്മൾ ഒരുമിച്ച് ആഘോഷിച്ചിട്ടുള്ളത്‌. നാളിതു വരെ നിങ്ങൾ നൽകിയ സ്നേഹവും പിന്തുണയും കരുതലുമാണു എന്നെ വഴി നടത്തിയത്, അതിനൊട്ടും കുറവു വന്നിട്ടില്ലെന്നും, അതിനിയും ഉണ്ടാകും എന്നുമുള്ള പ്രതീക്ഷയോടെ

നിങ്ങളുടെ സ്വന്തം

അഹാന കൃഷ്ണ