LiveTV

Live

Entertainment

പത്ത് മാസത്തോളം എല്ലാ രീതിയിലുമുള്ള തയാറെടുപ്പ്, ഭാഗമാവാന്‍ കഴിഞ്ഞത് ഭാഗ്യം; മാമാങ്കത്തെക്കുറിച്ച് ഉണ്ണിമുകുന്ദന്‍ മീഡിയവണിനോട്

വലിയ ക്യാന്‍വാസില്‍ ഒരുങ്ങുന്ന ചിത്രം വരുത്തിയ വിവാദങ്ങളും ചെറുതായിരുന്നില്ല

പത്ത് മാസത്തോളം എല്ലാ രീതിയിലുമുള്ള തയാറെടുപ്പ്, ഭാഗമാവാന്‍ കഴിഞ്ഞത് ഭാഗ്യം; മാമാങ്കത്തെക്കുറിച്ച് ഉണ്ണിമുകുന്ദന്‍ മീഡിയവണിനോട്

മാമാങ്കം സിനിമയിലെ കഥാപാത്രത്തിനായി പത്ത് മാസത്തോളം എല്ലാ രീതിയിലും തയാറെടുത്തെന്നും ചിത്രത്തിന്‍റെ ഭാഗമാവാന്‍ കഴിഞ്ഞത് വലിയ ഭാഗ്യമായി കണക്കാക്കുന്നുവെന്നും നടന്‍ ഉണ്ണി മുകുന്ദന്‍. ചരിത്ര സിനിമയായത് കൊണ്ടും ഒരു യോഥാവിന്‍റെ കഥാപാത്രമാണ് കൈകാര്യം ചെയ്യുന്നത് എന്നത് കൊണ്ടും ശാരീരികമായും മാനസികമായും അതിനായി തയാറെടുക്കേണ്ടി വന്നു. ശാരീരിക തലത്തിലുപരി കഥാപാത്രത്തിന്‍റെ വൈകാരിക തലം രൂപപ്പെടുത്തുന്നതിലും വലിയ പ്രയത്നങ്ങളുടെ ഫലത്താല്‍ തയാറെടുത്തെന്നും ഉണ്ണി മുകുന്ദന്‍ പറയുന്നു.

ഒരു ചാവേറായ, കളരിപ്പയറ്റ് അറിയുന്ന ഒരു യോഥാവിന്‍റെ ജീവിതശൈലി അയാളുടെ മെയ്‍വഴക്കത്തിലും ശാരീരിക ക്ഷമതയിലുമെല്ലാം പ്രതിഫലിക്കും എന്നു തന്നെയാണ് വിശ്വസിക്കുന്നത്. എത്ര പേര്‍ വന്നാലും നേരിടാന്‍ ധൈര്യവും ആകാരവുമുള്ള ചന്ദ്രോത്ത് പണിക്കര്‍ എന്ന കഥാപാത്രത്തെയാണ് അവതരിപ്പിക്കുന്നത്. ആയതിനാല്‍, 400 വര്‍ഷം മുമ്പ് നടന്ന ഈ കഥയെ തിരശീലയില്‍ കാണുമ്പോള്‍ ഉണ്ണി മുകുന്ദനെ മറന്ന് ഏവര്‍ക്കും ചന്ദ്രോത്ത് പണിക്കരെ കാണണമെന്ന് ആഗ്രഹമുണ്ടായിരുന്നു. അതിനായുള്ള തയാറെടുപ്പുകള്‍ നടത്തിയിട്ടുമുണ്ട്. ഉണ്ണി മുകുന്ദന്‍ പറയുന്നു.

അഞ്ച് ഭാഷകളില്‍, വലിയ ക്യാന്‍വാസിലാണ് ചിത്രമൊരുങ്ങുന്നത്. സാധാരണ അന്യഭാഷ ചിത്രങ്ങളിലാണ് ഇത്തരം രീതി നമ്മള്‍ കണ്ടുവരുന്നത്. പക്ഷെ, മാമാങ്കത്തിലൂടെ അത്തരത്തിലുള്ള ഒരു സിനിമയുടെ ഭാഗമാവാന്‍ കഴിഞ്ഞു. അത് തന്നെ വലിയ ഭാഗ്യമാണ്. ഉണ്ണി കൂട്ടിച്ചേര്‍ത്തു.

എം. പത്മകുമാര്‍ സംവിധാനം ചെയ്ത് മമ്മൂട്ടി നായകനായെത്തുന്ന ചരിത്ര സിനിമയാണ് മാമാങ്കം. കാവ്യ ഫിലിം കമ്പനിയുടെ ബാനറില്‍ വേണു കുന്നമ്പള്ളിയാണ് ചിത്രം നിര്‍മ്മിക്കുന്നത്. വലിയ ക്യാന്‍വാസില്‍ ഒരുങ്ങുന്ന ചിത്രം വരുത്തിയ വിവാദങ്ങളും ചെറുതായിരുന്നില്ല.