LiveTV

Live

Entertainment

മുഖ്യാതിഥിയായി മോഹന്‍ലാല്‍ വേണ്ടെന്ന് ഭീമഹര്‍ജി 

107 പേരടങ്ങുന്ന ചലച്ചിത്ര, സാംസ്കാരിക പ്രവര്‍ത്തകര്‍ ഇക്കാര്യം ആവശ്യപ്പെട്ട് സംയുക്ത പ്രസ്താവനയിറക്കി.

മുഖ്യാതിഥിയായി മോഹന്‍ലാല്‍ വേണ്ടെന്ന് ഭീമഹര്‍ജി 

സംസ്ഥാന ചലച്ചിത്ര പുരസ്കാര വിതരണ ചടങ്ങില്‍ മുഖ്യാതിഥിയായി മോഹന്‍ലാലിനെ പങ്കെടുപ്പിക്കരുതെന്ന് ആവശ്യപ്പെട്ട് 107 പേര്‍ ഒപ്പിട്ട ഭീമ ഹ‍ര്‍ജി മുഖ്യമന്ത്രിക്ക് നല്‍കി. നടന്‍ പ്രകാശ് രാജ്, എഴുത്തുകാരായ എന്‍ എസ് മാധവന്‍, സേതു, സച്ചിതാനന്ദന്‍ സംവിധായകരായ രാജീവ് രവി, ഡോക്ട‍ര്‍ ബിജു എന്നിങ്ങനെ സാംസ്കാരിക ചലച്ചിത്ര മാധ്യമ പ്രവര്‍ത്തകരാണ് ഭീമ ഹ‍ര്‍ജി നല്‍കിയത്.

കേരളത്തിലെ ചലച്ചിത്ര പ്രവര്‍ത്തകര്‍ക്ക് നല്‍കുന്ന ഏറ്റവും ഉന്നതമായ അവാര്‍ഡാണ് സംസ്ഥാന ചലച്ചിത്ര പുരസ്കാരം. അത് നല്‍കേണ്ടത് അത്രത്തോളം ഗൌരവത്തോടു കൂടിയായിരിക്കണമെന്ന് ആവശ്യപ്പെട്ടു കൊണ്ടാണ് കേരളത്തിലെ സാംസ്കാരിക ചലച്ചിത്ര പ്രവര്‍ത്തകര്‍ കത്ത് നല്‍കിയിരിക്കുന്നത്. ദേശീയ പുരസ്കാരം രാഷ്ട്രപതി നല്‍കുന്നത് പോലെ മുഖ്യമന്ത്രി അവാര്‍ഡ് സമ്മാനിക്കുന്ന രീതിയാണ് കേരളത്തിലും വേണ്ടത്. മുഖ്യമന്ത്രിക്കും സാംസ്കാരിക വകുപ്പ് മന്ത്രിക്കും പുറമെ മുഖ്യാതിഥികള്‍ ഉണ്ടാകുന്നത് പരിപാടിയുടെ ശോഭ കെടുത്തുമെന്ന് ഹര്‍ജിയില്‍ പറയുന്നു.

തങ്ങള്‍ക്കൊപ്പം മത്സരിച്ച ഒരാളെ മുഖ്യാതിഥിയായി കൊണ്ട് വരുന്നത് വിജയികളെ അവഹേളിക്കുന്നതിന് തുല്യമാണ്. താരനിശകളും സൂപ്പ‍ര്‍ താരങ്ങളും ഇല്ലാതെ സംസ്ഥാനത്തിന്റെ ഔദ്യോഗിക ബഹുമതിയായി ചലച്ചിത്ര പുരസ്താരങ്ങള്‍ നല്‍കുകയാണ് വേണ്ടതെന്ന് സംവിധായകന്‍ ഡോക്ട‍ര്‍ ബിജു പ്രതികരിച്ചു.

ഇത്തവണത്തെ ചലച്ചിത്ര പുരസ്കാര വിതരണ ചടങ്ങില്‍ മുഖ്യാതിഥിയായി മോഹന്‍ലാലിനെ ക്ഷണിക്കാമെന്ന നിര്‍ദേശം സാംസ്കാരിക വകുപ്പ് മന്ത്രി എ കെ ബാലനാണ് മുന്നോട്ട് വെച്ചതെന്നാണ് വിവരം. അപ്പോള്‍ തന്നെ വലിയ പ്രതിഷേധം സിനിമാ മേഖലയില്‍ നിന്നുയര്‍ന്നിരുന്നു.

പ്രസ്താവനയുടെ പൂര്‍ണരൂപം

സിനിമയിലെ ക്രിയാത്മകമായ കലാപ്രവര്‍ത്തനങ്ങള്‍ക്ക് ഒരു സംസ്ഥാനം നല്‍കുന്ന ഉന്നതമായ പുരസ്‌കാരമാണ് കേരള സംസ്ഥാന ചലച്ചിത്ര അവാര്‍ഡ്. മലയാള സിനിമയിലെ കലാകാരന്മാര്‍ക്ക് സ്വന്തം നാട്ടില്‍ നിന്നും ലഭിക്കുന്ന ഏറ്റവും വലിയ ആദരവാണ് ഈ പുരസ്‌കാരം. അതുകൊണ്ടുതന്നെ ഈ പുരസ്‌കാരം അവര്‍ക്ക് സമ്മാനിക്കേണ്ടതും സാംസ്‌കാരികപൂര്‍ണ്ണമായ ഒരു കലാന്തരീക്ഷത്തില്‍ ആകേണ്ടതുണ്ട്. ദേശീയ പുരസ്‌കാരം രാഷ്ട്രപതി നല്‍കുന്ന മാതൃകയില്‍ സംസ്ഥാനം ഔദ്യോഗികമായി നല്‍കുന്ന ഒരു പുരസ്‌കാര ചടങ്ങ് ആണ് കേരളത്തിലും ഉണ്ടാകേണ്ടത്. സാംസ്‌ക്കാരിക മന്ത്രിയുടെ സാന്നിധ്യത്തില്‍ ബഹുമാനപ്പെട്ട മുഖ്യമന്ത്രി അവാര്‍ഡ് ജേതാക്കള്‍ക്ക് പുരസ്‌കാരം നല്‍കുന്ന ലളിതവും അന്തസ്സുറ്റതുമായ ഒരു ചടങ്ങായിരിക്കണം കേരള സംസ്ഥാന അവാര്‍ഡ് വിതരണ വേദി. ഈ ചടങ്ങില്‍ മുഖ്യമന്ത്രിയെയും അവാര്‍ഡ് ജേതാക്കളെയും മറികടന്ന് ഒരു മുഖ്യാതിഥിയെ ക്ഷണിച്ചു കൊണ്ടുവരുന്നത് തീര്‍ത്തും അനൗചിത്യം മാത്രമല്ല പുരസ്‌കാര ജേതാക്കളുടെ നേട്ടത്തെ കുറച്ചു കാട്ടുക കൂടിയാണ്. മുഖ്യാതിഥിയായി സിനിമയിലെ തന്നെ ഒരു താരം വരുമ്പോള്‍ ആ താരം അഭിനയിച്ച സിനിമകള്‍ കൂടി ഉള്‍പ്പെട്ട ഒരു വിധിനിര്‍ണ്ണയത്തില്‍ പുരസ്‌കാരം നേടിയ ആളുകളെ വല്ലാതെ ചെറുതാക്കുന്ന ഒരു നടപടി ആകും അത്. അത്തരം ഒരു കീഴ്‌വഴക്കം സംസ്ഥാന ചലച്ചിത്ര പുരസ്‌കാര ചടങ്ങില്‍ അനുവര്‍ത്തിക്കരുത് എന്ന് ഞങ്ങള്‍ ഓര്‍മപ്പെടുത്തുന്നു. ആ ചടങ്ങിലെ മുഖ്യ അതിഥികള്‍ മുഖ്യമന്ത്രിയും സാംസ്‌കാരിക മന്ത്രിയും അവാര്‍ഡ് ജേതാക്കളും മാത്രം ആയിരിക്കണം. അതിന് കോട്ടം തട്ടുന്ന തരത്തില്‍ ഒരു മുഖ്യഅതിഥിയെ അവാര്‍ഡ് ദാന ചടങ്ങില്‍ ക്ഷണിക്കുന്ന രീതി ഒട്ടും നല്ല സന്ദേശമല്ല നല്‍കുന്നത്. ഈ ഒരു രീതി ഒരു വര്‍ഷവും അനുവര്‍ത്തിക്കാന്‍ പാടുള്ളതല്ല. ഇത് ദൂരവ്യാപകമായ ദോഷം ചെയ്യുന്ന ഒരു കീഴ്വഴക്കം ആയി മാറും. ആയതിനാല്‍ സംസ്ഥാന ചലച്ചിത്ര പുരസ്‌കാര വിതരണ ചടങ്ങില്‍ മുഖ്യമന്ത്രിയും സാംസ്‌കാരിക മന്ത്രിയും അവാര്‍ഡ് ജേതാക്കളും അല്ലാതെ ഒരു മുഖ്യ അതിഥിയും ഉണ്ടാകരുത് എന്ന നിലപാട് ഇപ്പോഴും തുടര്‍ന്നും സര്‍ക്കാര്‍ സ്വീകരിക്കണം എന്ന് ഞങ്ങള്‍ സംയുക്തമായി ആവശ്യപ്പെടുന്നു.