LiveTV

Live

Bahrain

ഇന്ത്യന്‍ സ്കൂളിനെതിരായ  പ്രചാരണം: നിയമനടപടിയെന്ന  നിലപാടിൽ മാറ്റമില്ലെന്ന് ഐ.എസ്.ബി

നിയമനടപടി സ്വീകരിക്കാൻ നിർബന്ധിതമാവുകയായിരുന്നു എന്ന് എക്സിക്യൂട്ടീവ് കമ്മിറ്റി

ഇന്ത്യന്‍ സ്കൂളിനെതിരായ  പ്രചാരണം: നിയമനടപടിയെന്ന  നിലപാടിൽ മാറ്റമില്ലെന്ന് ഐ.എസ്.ബി

ഇന്ത്യൻ സ്‌കൂളിനെതിരെ അപവാദം പ്രചരിപ്പിക്കുന്നവർക്കെതിരെ നിയമ നടപടി സ്വീകരിക്കുമെന്ന സ്‌കൂളിന്റെ നിലപാടിൽ മാറ്റമില്ലെന്ന് ഇന്ത്യൻ സ്‌കൂൾ മാനേജ്മെന്റ് വാർത്താക്കുറിപ്പില്‍ വ്യക്തമാക്കി.

സ്കൂളിനെതിരെ ക്ഷുദ്ര പ്രചരണം നടത്തരുതെന്ന് മാധ്യമങ്ങളിലൂടെയും സർക്കുലറുകളിലൂടെയും പലതവണ എല്ലാവരെയും അറിയിച്ചിരുന്നതായും എന്നിട്ടും ചില വ്യക്തികൾ മുന്നറിയിപ്പുകൾ അവഗണിക്കുകയും രാഷ്ട്രീയ ആവശ്യങ്ങൾക്കായി സ്കൂളിനെതിരെ തെറ്റായ പ്രചാരണത്തിൽ ഏർപ്പെടുകയും ചെയ്തുവെന്നും എക്സിക്യുട്ടീവ് കമ്മറ്റി കുറിപ്പിൽ അറിയിച്ചു.

വാർത്താക്കുറിപ്പിലെ മറ്റ് വിശദാംശങ്ങൾ : ഫീസടക്കാന്‍ കഴിയാത്ത കുട്ടികളെ ഓൺലൈൻ ക്ലാസുകളിൽ നിന്ന് പുറത്താക്കിയെന്നും അതിനോട് പ്രതികരിക്കുന്നവരെ കള്ളക്കേസില്‍ കുടുക്കിയെന്നുമാണ് പ്രചരിപ്പിക്കുന്ന പ്രധാന ആരോപണങ്ങളിലൊന്ന്. വലിയ ഫീസ് കുടിശ്ശിക കാരണം സ്കൂളിൽ നിന്ന് നിരവധി തവണ അറിയിച്ചിട്ടും അവരുടെ പരാതികൾ പരിഹരിക്കുന്നതിന് സ്കൂൾ മാനേജ്മെന്റിനെയോ അധ്യാപകരെയോ സമീപിക്കാത്ത മാതാപിതാക്കളുടെ കുട്ടികളെ മാത്രമാണ് കുറച്ച് ദിവസത്തേക്ക് ഓൺലൈൻ ക്ലാസുകളിൽ നിന്ന് താൽക്കാലികമായി ഒഴിവാക്കിയത്.

കുടിശ്ശികയുടെ ഒരു ചെറിയ ഭാഗം അടച്ചതിനുശേഷം അല്ലെങ്കിൽ അവരുടെ പ്രശ്നങ്ങൾ സ്കൂൾ അധികാരികളെ അറിയിക്കുന്ന ശേഷം ക്ലാസ് അവർക്ക് തുറന്നു കൊടുക്കുകയും ചെയ്യുന്നു. സ്കൂൾ നൽകുന്ന സൗകര്യങ്ങളെക്കുറിച്ച് സർക്കുലറുകളിലൂടെ മാതാപിതാക്കളെ നിരന്തരം അറിയിച്ചിരുന്നു.ഫീസ് കുടിശ്ശിക അടയ്ക്കാൻ കുട്ടികളെ സഹായിക്കുക എന്ന കാരണം പറഞ്ഞ് കുറച്ച് ആളുകൾ ഫണ്ട് സ്വരൂപിക്കുന്നുണ്ടെന്ന കാര്യം സോഷ്യൽ മീഡിയയിലൂടെയും മറ്റ് ഉറവിടങ്ങളിലൂടെയും പുറത്തുവന്നിട്ടുണ്ട്. അതിനിടയിൽ, ഇങ്ങനെ ശേഖരിച്ച പണത്തിന്റെ ആനുകൂല്യം തങ്ങള്‍ക്കും കിട്ടണമെന്നു ആവശ്യപ്പെട്ട് ചില മാതാപിതാക്കൾ സ്കൂളിനെ സമീപിച്ചിരുന്നു.

ഈ സാഹചര്യത്തിലാണ് ഇന്ത്യൻ സ്കൂൾ കുട്ടികളുടെ പേരിൽ ധനസമാഹരണത്തിനായി ഏതെങ്കിലും സംഘടനകളെയോ വ്യക്തികളെയോ അധികാരപ്പെടുത്തിയിട്ടില്ലെന്ന് വ്യക്തമാക്കുന്ന ഒരു പത്രക്കുറിപ്പും സർക്കുലറും സ്കൂൾ മാനേജ്മെന്റ് പുറത്തിറക്കിയത്.ഇതിനിടെ സ്‌കൂൾ ഫീസ് കുടിശിക തീർക്കാൻ സ്‌കൂൾ അധികൃതർ നിർബന്ധിച്ചതിനെ തുടർന്ന് മാതാപിതാക്കളിലൊരാൾ ആത്മഹത്യ ചെയ്തതായി വ്യാജ സന്ദേശം സോഷ്യൽ മീഡിയയിൽ ചിലര്‍ പ്രചരിച്ചിരുന്നു. കഴിഞ്ഞ ആറ് വർഷത്തിനിടെ അത്തരമൊരു സംഭവം നടന്നതായി അറിയില്ല. കൊറോണ വൈറസിന്റെ പശ്ചാത്തലത്തിൽ ഇന്ത്യൻ സ്കൂൾ ജീവനക്കാരുടെ ശമ്പളം നാല് മാസമായി നിർത്തിവച്ചിരിക്കുകയാണെന്ന് മറ്റൊരു ആരോപണം പ്രചരിക്കുന്നു.

2020 ജൂലൈ മുതൽ സെപ്റ്റംബർ വരെ എല്ലാ ജീവനക്കാർക്കും ശമ്പളത്തിന്റെ 75% നല്‍കിയിട്ടുണ്ട്. പ്രസ്തുത മാസങ്ങളില്‍ ഫീസ് പിരിവ് വളരെ കുറവായിരുന്നു. ഈ മാസങ്ങളിൽ, ഫീസ് അടയ്ക്കരുതെന്ന് ചില വ്യക്തികൾ നടത്തിയ നിഷേധാത്മക പ്രചാരണത്തിന്റെ ഫലമായിരിക്കാം അങ്ങനെ സംഭവിച്ചത്. ഇക്കാരണത്താൽ, ഈ മാസങ്ങളിൽ ശമ്പളത്തിന്റെ 75% മാത്രമാണ് നല്കാനായത്. എന്നിരുന്നാലും, രക്ഷകർത്താക്കളുടെയും അധ്യാപകരുടെയും സഹകരണത്തോടെ സ്കൂൾ മാനേജ്മെന്റിന്റെ ഇടപെടലിന്റെ ഫലമായി, ഘട്ടം ഘട്ടമായി ബാക്കി 25% ശമ്പളം നല്‍കാന്‍ നടപടി സ്വീകരിച്ചുവരുന്നു.

ഫീസ് ഇളവ് അനുവദിക്കുന്നതിൽ ചില അഴിമതികളുണ്ടെന്നും അതിനാൽ ആനുകൂല്യങ്ങൾ ലഭിച്ച കുട്ടികളുടെ പട്ടിക പരസ്യമാക്കണമെന്നും ചിലര്‍ അവകാശപ്പെടുന്നു. വിവിധ കാരണങ്ങളാൽ സാമ്പത്തികമായി ദുരിതമനുഭവിക്കുന്ന നൂറുകണക്കിന് കുട്ടികൾ ഇന്ത്യന്‍ സ്കൂളിൽ പഠിക്കുന്നു. വിശദമായ പരിശോധനയ്ക്ക് ശേഷം സ്കൂൾ നിശ്ചയിച്ച മാനദണ്ഡങ്ങളുടെ അടിസ്ഥാനത്തിൽ യോഗ്യതയുള്ള എല്ലാ വിദ്യാർത്ഥികൾക്കും ഫീസ് ഇളവ് നല്കിവരുന്നുണ്ട്..

ഇന്ത്യൻ സ്കൂളിന്റെ സൽപ്പേരിന് കളങ്കം വരുത്താനുള്ള ശ്രമത്തിന്റെ ഭാഗമാണ് സ്കൂളിനു എതിരായ ഇത്തരം പ്രചരണം. രാഷ്ട്രീയ ആവശ്യങ്ങൾക്കോ മറ്റ് സ്വാർത്ഥപരമായ കാരണങ്ങൾക്കോ വേണ്ടി മാത്രം അവർ മികച്ച പഠന കേന്ദ്രമായ ഇന്ത്യൻ സ്കൂളിന്റെ പ്രതിച്ഛായയെ കളങ്കപ്പെടുത്തുകയാണ്. 2016ലെ വാർഷിക ജനറൽ ബോഡിയുടെ ഐകകണ്ഠ്യേനയുള്ള തീരുമാനത്തിന്റെ അടിസ്ഥാനത്തിൽ ഇന്ത്യൻ സ്‌കൂളിനെതിരെ അപകീർത്തികരമായ പ്രചരണം നടത്തിയവർക്കെതിരെ നിയമനടപടി സ്വീകരിക്കാൻ നിർബന്ധിതമാവുകയായിരുന്നു എന്നും എക്സിക്യൂട്ടീവ് കമ്മിറ്റി വാർത്താക്കുറിപ്പിൽ വ്യക്തമാക്കി.