Gulf

ആഗോള ഇന്നൊവേഷൻ സൂചികയിൽ നില മെച്ചപ്പെടുത്തി ഒമാൻ

ഈ വർഷത്തെ ആഗോള ഇന്നൊവേഷൻ സൂചികയിൽ നില മെച്ചപ്പെടുത്തി ഒമാൻ. ലോക ബൗദ്ധികാവകാശ സംഘടന തയാറാക്കുന്ന സൂചികയിൽ 69ാം സ്ഥാനമാണ്​ ഒമാന്​ ഉള്ളത്​.

സാമ്പത്തിക പുരോഗതിക്കും സുസ്ഥിര വികസനത്തിനും നവീന ആശയങ്ങൾ നടപ്പിലാക്കുന്ന 126 സമ്പദ്​വ്യവസ്ഥകളാണ്​ സൂചികയിൽ ഉൾപ്പെടുത്തിയിട്ടുള്ളത്​. ബൗദ്ധിവകാശത്തിനുള്ള അപേക്ഷകളുടെ എണ്ണം, മൊബൈൽ ആപ്ലിക്കേഷൻ, വിദ്യാഭ്യാസ രംഗത്തെ ചെലവഴിക്കൽ രീതികൾ തുടങ്ങി 80 ഓളം മാനദണ്ഡങ്ങൾ ഉൾപ്പെടുത്തിയാണ്​ രാഷ്​ട്രങ്ങളുടെ തെരഞ്ഞെടുപ്പ്​. ബൗദ്ധിവകാശത്തിനുള്ള അപേക്ഷകളുടെ എണ്ണത്തിൽ ആറ്​ ശതമാനത്തിന്റെ വർധനവാണ്​ ഉണ്ടായത്​.

ബൗദ്ധിവകാശങ്ങളുടെ രജിസ്​ട്രേഷൻ സംബന്ധിച്ച അവബോധം പകർന്നുനൽകുന്നതിന്​ വ്യവസായ,വാണിജ്യ മന്ത്രാലയം നിരവധി സെമിനാറുകൾ നടത്തിയിരുന്നു. സ്വിറ്റ്​സർലൻറ്​, നെതർലൻറ്സ്​, സ്വീഡൻ, ബ്രിട്ടൻ, സിംഗപൂർ എന്നീ രാഷ്​ട്രങ്ങളാണ്​ ആദ്യ അഞ്ചു സ്​ഥാനങ്ങളിൽ. കഴിഞ്ഞ വർഷം 60ാം സ്​ഥാനത്തെത്തിയ ഇന്ത്യക്ക്​ ഇക്കുറി 57ാം സ്​ഥാനമാണ്​. മലേഷ്യ,ഇന്തോനേഷ്യ, തായ്​ലൻറ്​, വിയറ്റ്​നാം എന്നീ രാഷ്​ട്രങ്ങളും കഴിഞ്ഞ വർഷത്തെ അപേക്ഷിച്ച്​ സൂചികയിൽ മുന്നേറ്റം നടത്തി.